a6.1Ab 2.41, 4.35, 5.14, 9.29
b6.3Man 1.13, Ab 1.21, 16.2, 1Ti 3.7
c6.5Ab 8.5
d6.6Ab 13.3, 14.23
e6.7Yo 12.42, Ab 2.41, 12.24, 16.5, Kl 1.6
f6.8Ab 2.43
h6.92 Ti 1.15
i6.10Ais 54.17, Lg 21.15, Ab 5.39
j6.11Md 26.59-61
k6.13Yar 26.11

Acts 6

Biamogo biaga agali kariali dabenego ogo

Horo uruningi Yasu talima piaga dewa ho tago haabo hayagola Yu wali agali Girigi bi laga maru hearume Hiburu bi laga maru hearu heba lai lalu hene. Lai lalu howa lalu, Tígua horo bibahendengi tomo mbiraleru tale bigi bialu howa inanaga wali dalo bedaru embeda haga beramili, lalu lai lene. a  Ani layagolaabosolo homberiali (12) biarume wali agali Yasu mana yu tiga bu hearu bibahende mo ngoai howa lalu, Ina abosolo kamarume tomo mbiraleru tale bule Ngode Datagaliwabenaga bi mana lamulenego yu waharimayagua nakarulapedago. Anigo inanaga hamene mbaliniru tígua tí aria agali kariali mini leneru Ngode Datagaliwabe Dinini to̱laihe mini gigabiwiru hondowa agali urunibi karu dabalimu. Dabowa biabe ogoni tigua haru helo helami̱ya, lene. b  Ani lowa lalu, Iname nde Ngode Datagaliwabehondo bi lolenebi wali agalihondo ibunaga bi mana lamulenebi ogoni hangu buluma̱yanaga ani helami̱ya, lene.

Ani layagola wali agali bibahendeme, Bi ogoni karulapedago, lai hene. Ani lowa tigua Sibeni dabene. Sibeni ibu Ngode Datagaliwabehondo mini mbiraore wulenebi Ngode Datagaliwabe Dininibi ibuha to̱laihe hene. Sibeni dabowa tigua Pilibi Porogorasa Nigano imaru Timono Pamenasa Nigolasi uruni ti dabene. Nigolasi ibu Andiogoali howa alaore Yu wali agalinaga mana mo yinigo ti heba ho gimbu bu hene. c  Bibahende ngoai ho hearume agali ti dabayaruabosolo hearia haru pu helayagola abosolo biarume Ngode Datagaliwabehondo bi lowa agali dabayarunaga haguaneni gi wini. d 

Ani biyagola howa Ngode Datagaliwabenaga bi mana loyogo lene. Yarusalemeni Yasu talima piaga wali agali dewaore ho tago haga bini.Loma binigo mo miaga agali dewa hearumebi Yasu mana yu tiga bini. e 

Yu agali marume godi lole Sibeni minu yalu penego ogo

Ngode Datagaliwabenaga biamogo bia holenebi hongo holenebi Sibeniha to̱lai hayagola ibugua wali agali heba howa agalime nabiagane alebi nahendene alebi bialu hene. f  Ani biyagola agali marume Sibeni baba lai lalu hene. Yu agali o biaru tingoai hagane anda mbira mini Golope Hene Agalirunaga Anda ogoninaga aria hene. Agali uruni ti Sairini howabi Alegandaria howabi agali maru Silisia howabi Esia howabi íbu howa tigua Sibeni baba lai lalu hene.
(6.9)Agali uruni ti ala garabaya biabe ale bialu henego mani golope howa tigua ngoai hagane anda ogoni bu hene. Ani buwa tigua anda ogoninaga mini Golope Hene Agalirunaga Anda wini.
,
h 
10 Lai lalu howa Ngode Datagaliwabe Dinini ibugua Sibeninaga mini mo gigabia hayagola Sibenihanda bi layago tigua bi layagome lo dambi nahabehe hene. i  11 Lo dambi nahabeheyagola tigua agali marume nde lelonaga tihondo muni mini. Muni miya handala puwa tigua lalu, Sibeni ibugua Mosese Ngode Datagaliwabela mege bialu mana layago hale harima, lene. j  12 Anidagua biyagome wali agali hearubiagali ala hene miniwi hearubiMana lowinigo lawai haga hearubi mo keba hai hene. Mo keba hayagola tiguaGanisolo agali hearia Sibeni minu yalu pene. 13 Ani buwa tigua agali marume ke̱ halu nde lelo haru ibini. Haru ibiyagola tigua ke̱ howa lalu, Agali o kagonime Anduane Homogonaga anda loma bia hene biagobi Mosese heneyangi Mana lowinigobi mege bialu bi ko laabo haga ka. k  14 Ibugua au laya, Nasareteali Yasuhanda Anduane Homogonaga anda ogoni gialo wahai halu mamalinaga mana Mosesehanda lowinigo mo aribia holebira, layago iname hale harima, lene. 15 Bi ani layagola hale howa Ganisolo agali bi lalu berearu bibahendeme Sibeni handaya halu hearia ibunaga dengui dahuliyalinaga ale hearia de hendene.

Copyright information for `HUI