a5.8-9Yob 9.9, 38.31
b5.11Man 28.30, 28.38-40, Mai 6.15, Seb 1.13
c5.15Iba 97.10, Yol 2.14, Mai 5.3, 5.7-8
d5.21-22Ais 1.11-14
e5.25-27Ab 7.42-43

Amos 5

Anduane Homogonaga bi manalatagi hagame dara halu dugu bia henego ogo

Isaraele wali agaliru-o mbirali homaragola dara howa dugu biagadagua tínagaore dugu bia harogo hale hadaba.

Wandari mabuage ale Isaraele pilayago ai nde ibu lone heyabe naheore.
Ibu dindini pilo ibiraho nga.
Mbiralime lone mo heya habe nahe ngagoni,
lalu larogoni.

Anigo Anduane Homogo Bibahende Haru Haame Ho Haga kago ibugua lalu, Isaraele dindi tano mbiraha howa ami agali daosini mbira (1,000) wai bule tagira piyaru ai handari mbira (100) hangu dai biya. Tano mendeha howa agali handari mbira (100) wai bule tagira piyaru ai pirali hangu dai biya, lene.

Isaraele wali agalime Anduane Homogo kagoha dai biyagua ti holene bayale mulebira, lenego ogo

Anduane Homogohanda Isaraele wali agaliruhondo lalu, I̱ni kogoha holene bayale mule dai bidaba. Tí Beaseba tanoha lotu lole napilimu. Tígua i̱ Bedele tanoha kabe toba howa tai nabilimu. Tano ogoni mo ko halu bo gialo hole bu waholebira. Giligala dindihabi lotu lole napilimu. Dindi ogoniha wali agali karu dindi mendeha garabayabu yalu polebirago tí Giligala dindi napilimu, lene.

Tí Anduane Homogo ibuni karia dai bialu holene bayale ibuha howa mo yule dai bidaba. Ai tígua ibu karia dai nabirimiyagua ibunime hariha howa ira hedo ibira haradagua bialu tí Isaraele aria karuni dai holebirago. Ira ogonime Bedele dindibi da dege bulebira. Ani dalu kagola agali mbirame ira ogoni ba hundia habe nahe holebira.

Wali agali mana ko biaga karu mo ko holene wulebira, lenego ogo

Agali manani howa tigabi dabolene ngadagua ndo ke̱ howa mo hondo haga kamiru tíha pani nolene emene ndoore timbuni wulebira.

Anduane Homogohanda yakundirubi wá haga ale marubi harini wabu heleda. a 
Ibugua wá kagoha mo aruma halu aruma haga ngago mo wá haga ka.
Ibugua iba solowara timbuni bedaru íbu lalu dindini haealame ha layagua ani biaga ka.
Ibugua agali hongo gibihe karu mo ko howa pani mialu tinaga anda hongohe bu heledaru bo gialo wahalu biaga kagoni.
Nahendene ale tara uruni biaga kago ibuninaga mini Anduane Homogoore kagoni,
lalu iba gana lene.

Amoso ibugua Isaraele wali agalime mana ko biyagonaga bi laminigo ogo

10 Agali tigabi mbirame manani dabalu howa tigabi ngadagua dabalu ko biaga kago taliragola tígua agali ogonibiru handabe manga haga kamigoni. 11 Tígua agali yagibano karunaga dabudabu emene yu karu gingila mialu tomo mbirale ngaru mo page biaga kamigoni. Ani buwa ai tí anda hongohe ege to̱le̱ anda buwa kamigonigo tíni anda ogoniha napalueberemi. Tínaga mabu ngamiruhagerebi lini hengedamirunaga ibaneme waini iba hambialu nanoleberemi. b  12 Tígua bia ko hene dewaore ngamigome tíha ko bini dewaore ngagoni manda bido. Tígua agali mana tigabi ngaru biaga karu mo ko haramili. Agali ko biaga karume tinaga bi lahabe lalu muni ngirago mo yuwa yagibano karunaga bi henene larago yula dambi halu muni ngiyagonaga ke̱ howa lahaga kamigoni. 13 Wali agalime mana tiga nabi ogonidagua mbira biyagua agali mana mandabi kamiru tígua bi mbira nale ne hambu ndibu lowa ema nabi holene karulape nga.

Mana tigabi ngaru bialu kamigola Ngode Datagaliwabehanda ibuni tí heba haabo holebirago ogo

14 Tígua mana ko ngaru wahai howa mana bayale ngaru hangu bialu halimu. Ani beramigola tíni bayale holeberami. Tígua Anduane Homogo Ngode Datagaliwabe Hongo Haiheore kago ibuni tí heba haga ka laramiligo ai tígua mana bayale ngaru bialu harimiyagua nde heneneore ibuni tí heba mandagi haabo holebira. 15 Mana ko ngaru yu wahalu mana tigabi ngaru hangu bialu howa godi laramiru lalu manani tigabi dabolene ngadagua dabalu halimu. Tígua anidagua bialu harimiyagua Anduane Homogo ibugua wali agali emene yu wahene kamiruni baya hangu handayaho holebira. c 

Isaraele wali agalirume yilalu dugu bulebira lenego ogo

16 Anigo tígua mana ko urunibi beremiligonaga Anduane Homogo Hongo Haiheore howa Bibahende Haru Haame Ho Haga kago ibugua lalu, I̱na tí pani nguleore ngogoni. Ani berogola tígua tanonaga hariga pugupugu bidarunaga yilalu dugu bigibigi bialu holeberemi. Ogonidagua bialu howa mbirali homaragola yilalu dugu biaga karubi agali nogo sibi haru haga tano tagirahayagi karubi olowa yilalu dugu biamogo bule ibidaba lalu ololeberemi. Ani berogola agali maru waini iba wabiaga gerebi mabuha karume yilalu dugu tara bima bima ibalu holebira, lene. Anduane Homogohanda i̱na bi o ledogoniore.

Anduane Homogonaga Horo ibirangi bulebira lenego ogo

18 Tí bibahendeme Anduane Homogonaga Horo abale ibilo hamelo kamigoni. Anigo tí darabioreda. Horo ogoni tagira ibiragola tígua mbirale mbira bayale agile mo yu holeberemibe. Horo ogoningi wá holene nawi tíha aruma holene wulebira. 19 Horo ogoningi ogodagua bulebira. Agali mbira ibu laionome bo nolebiragola ibida pialu karia habolo puwa ibu balu nolene dege mende biango ale gabua timbuni bea ngola holebira. Agali mbira ibu tagira howa andaga dai bialu anda pole pialu karia puya anda haiha wuwa hayaradagua bulebira. 20 Anigo Anduane Homogonaga Horo ogoningi aruma hai howa wá holene emeneorebi nawulebira. Turu holene mbira nawi mo ko holene dege wulebira.

21 Anduane Homogohanda lalu, Tínaga horo timbuni mo ngoai howa lotu laga ngamiruni i̱ turu nahe howa hame naleore kogoni. d  22 Tígua mbirale bo lomabu delarimiyaguabi balawa wabiaga widi lini lomabu ngirimiyaguabi i̱na yamia nabulebero. Nogo bulumaga hinidemiru tomo baya hangu nelo muwa habatigiore kagola i̱hondo ka̱i̱ lalu lomabu ngule haru ibirimiyaguabi i̱na nayamulebero. 23 Tígua ngida ale balu iba gana laramiligo i̱ore hale naholego nalalimu. 24 Anigo tígua bilimulo hame ledogo mbira ogo. Tígua mana bayalebi tigabi bulene ngarubi bialu halimu. Tígua ogonidagua bialu kamigome iba timbuni hundia nabiaga poraligobi wulebira.

25 Ai Isaraele wali agaliru-o. Mali pira mariani (40) i̱ni tí heba mandagi wali agali napale dindi ko wiagoha ibagabu harimago howa i̱na tíhondo loma mbira bo ngidaba nale haruligoni. e  26 Anigo ai áyu howa tígua i̱ yu wahalu puwa mbirale ko tínaga kini lalu gime wabinigo mini Sagudu wirimigobi mende yakundinaga lalu mini Kaiwana wabu wirimigobi ogoni labohondo bi pupu wialu kamigoni. Ani birimigome i̱na dindi mbira Damasagasa tano ngagohayagi garabayabu yalu pelarogola pialu howa tínaga gime wabini ogonilabo mo yalu poleberemi, lalu Anduane Homogo ibu mini Ngode Datagaliwabe Hongo Haiheore kago ibugua bi ogoni lene.

Copyright information for `HUI