a4.1Sir 24.23
b4.30Bar 5.4

Bar 4

Mini gigabi wulene mbuga Ngode Datagaliwabenagamana lowini ngagoha ngago mana ogoni wiaho wiaabobo bu wulebira. Mbirali bi mana ogoni yu kago ibu holene yu holebira. Anigo mbirali mana lo winigo waho kago ibu homolebira. a  Isaraele bu kemiru tígua mini gigabi wulene taya bialu baya hangu minu yania halimu. Tí hariga wá holene ogoniha yagi pialu halimu. Tígua inanaga mini bayale ka lolene ogoni yu wahalu wali agali tara bu karume mo yu pelo wanahalimu. Ainde Ngode Datagaliwabe ibu hame laganego ogoale nga lalu ina Isaraele wali agalime manda bu hai kemago ainde iname turu holene nga.

Yarusaleme ibunaga genda latagi henego ogo

I̱naga wali agali bu kemiru tí hongo ho holene nga. Tígua mini Isaraele yu kemigo howa tí gi nahe halimu. Tigua tí wali agali Anduane Homogo manda nabiaga hearume tí bo wa hai helonaga ndo pelaya. Tínime Ngode Datagaliwabe mo keba halu harimigonaga Anduane Homogo ibunime tínaga waitigi bu heagoha tí minu ya haya. Ngode Datagaliwabe ibunime tí wabiniore heago helalu puwa tígua mbirale dama mitangi bialu bi pupu wiaga gime wabini wiaruhondo bi pupu wialu lomaru bu mialu Ngode Datagaliwabehondo ndo bu mialu hemigola ibugua tíhondo keba helo mo keba harimi. Tí wene galiore hemingi baya hanguore handaya ho hene Ngode Datagaliwabe ibuni haluhe haabo haga heago embeda halu pirimi. Wali ai̱yame waneigini handaya ho howa haru biragadagua Yarusaleme ibugua tí baya hangu handaya ho birayagoyu tígua Yarusaleme mo genda harimi. Ngode Datagaliwabehanda tí baba keba halu tí pani mo ngiyago Yarusaleme ibu de hondowa ibugua tano maru kaware wiaruhondo lamialu lalu, Tí de handadaba. Ai Ngode Datagaliwabehanda genda timbuniore i̱ha ibiledagoni ndobe. 10 Ngode Datagaliwabe Haluhe Haabo Haga kagome i̱ waneigini dindi taraha garabaya bu yalu piyago de handaru. 11 I̱naga waneiginiru handaya ho harungi howa i̱na tihondo turu timbuni ho harugo ainde tigua i̱ yu wahalu piyangi ti dara timbuni howa dugu bialu haru. 12 Mbiralime i̱ha genda ngago hondowa turu hayagua nde mana nakarulape bulebira. I̱ wali dalo agalini homene ibu handaya ho holene mbirali nahe hagagobi kogoni. I̱ waneiginime Anduane Homogonaga bi mana bayale lo wiago mo wahalu mana ko bima piyagola tinaga ko ogonime i̱ bameore ege to̱le̱ hangu ngaligobi kogoni. 13 Tigua Ngode Datagaliwabenaga bi mana lo wini wiaru mo wahai halu tigua dindini heangi howa talialu holene manga haya. Ti Ngode Datagaliwabehanda mana bayale tigabi bialu holene ngagoria haru howa mo tiga bialu helo hame nalaya.

14 Tano kaware ngemiru-o tí ibalu i̱ waneiginiru mitangi hami̱ya ibidaba. Ngode Datagaliwabe Haluhe kago ibugua i̱ waneigini uruni garabaya piai helaya. 15 Ibugua agali hameigini tara dindi taraha hearu ibilo olayiya. Agali uruni ti hameigini ko ngubi taraore howa tinaga bi tara hale nahene lagaya. Tigua wali agali waheore bedarunaga mini mo yaraga nahagabi waneigini bu karu dara nahagabi heneya. 16 Ainde agali tara urunime ibuwa i̱naga waneigini bu hearu haru halu piai haya. I̱ waneigini uruni hame ledago lelowa ainde i̱ni hanguore bedogoni.

17 I̱naga waneigini áyu garabaya kemiru i̱na tí biamogo bibe naheore kogoni. 18 Mbiraore hangu tí biamogo bibehe kago ibu tígua mana ko bialu hemiria tí pani ngialu ibugua tí waitigi giha minu miyago ibuni hangu karulape ka. 19 I̱naga waneiginiru-o i̱ nde i̱ni hanguore bedogo tí nde tíninaga biabe wiyadaru bima pudaba. 20 I̱na i̱naga aga baya horo debenengi karulo biraga wirugo golo wahai halu aga ko dara ho howa karulagane ko wiaru mo karulowa walime dugu bialu biragagobi bedogoni. I̱na Ngode Datagaliwabe Haluhe Haabo Haga kagohondo olalu bedogo ainde ani olalu haabo halu i̱ni homalu waholebero.

21 I̱naga waneiginiru-o tígua tíninaga miniha mo hongo ho howa Ngode Datagaliwabehanda tí biamogo bilonaga ibuhondo olalu halimu. Ibugua tí waitiginaga gi hongohe kagoha howa minu yu dai bulebira. 22 Ainde Ngode Datagaliwabe Haluhe Haabo Haga kago ibugua tí garabaya kemigo golope holebira lo manda bialu ibuhondo mini mbiraore wu bedo. Ngode Datagaliwabe baya buruguleore kago ibugua tí haru dai biaga ka. Ibugua tí lone dara harangi ogonidagua biragome i̱ lone mo turu holebira. 23 Tí minu garabaya bu yalu piyangi i̱na tí dara halu dugu bialu biraru. Anigo ainde Ngode Datagaliwabehanda tí lone haru halu dai bulebirago ani haru dai birangi i̱na turu haabobo bu holebero. 24 Ai tí garabaya bu yalu piyagola tano kaware ngaru ti de handai hayago ai anidagua dege Ngode Datagaliwabe Haluhe Haabo Haga kago ibuni wá taraore holene timbuniorebi ibunaga hongo taraore holenebi heba ibalu tí biamogo birago de hondolebira. 25 I̱ waneigini bu kemaru tíguaore Ngode Datagaliwabehanda genda tandaga timbuni mo ngidago hongo ho howa baya hangu yu halimu. Ani kemigola ibugua tí ala waitigi howa tí bama talima ibaga bialu haga hayaru áyu dege uruni ti mo ko hai henego bibahende ibalu tínaga giha ya harane hondoleberemi. 26 Tí i̱ waneigini kemiru-o i̱na tíhondo gubalini ho haabo harugoni. Anigo waitigi bu hearume tí hariga ko wiagoha pialu halimulo mo pela halu tí minu yu piai halu nogo sibi igini kago minu pagebu yu piagadagua piya.

27 Waneiginiru-o tígua heyu howa Ngode Datagaliwabehondo biamogo bia lalu bi hongo howa lalu halimu. Ibugua tíhondo pani ngialu minu ba bayagonigoyu ainde ibugua tí embedaore halu wanaheore ka. 28 Ala bamba howa tígua Ngode Datagaliwabe yu wahalu pole hongo taraore ho haga harimigo ainde áyu howa tínaga mini beregedalu hongo howa hado pongo bialu ibuni kago lone taya bialu halimu. 29 Agali tí genda uruni yu halimulo mo ya haga biago ibugua tí lone biamogo bialu turu ho haabobo helolebira, lene.

Ngode Datagaliwabehanda Yarusaleme biamogo buleore lalu bi lenego ogo

30 Yarusaleme-o Ngode Datagaliwabe ibunime í̠ mini mo yaraga hene ngelalu í̠naga miniha mo palia holene karulo habelo mo yu ibulebira. b  31 Wali agali í̠ pilarigola turu ho howa í̠ genda mo ngiaga bu karu tini pani nalu mo ko holebira. 32 Dindi í̠naga waneiginiru garabaya pu hayago ibuni mo ko halu bo haealahole bini wulebira. I̱ waneiginiru genda miaga Babilono ngago ibuni gendame bope holebira. 33 Bamba í̠ pilalu mo ko haringi ibugua iba ganaru lalu turu ho hayago ainde áyu ibunibi í̠ mo ko hayadagua mo ko holebira. 34 I̱na tinaga mege bialu bi layaru mo beregedalu dara holene bi lolene ngago lo aribia helalu tinaga wali agali bu karuni bo taliatogo lai helalu mine hagane mana ngago wiamaro bilolebero. 35 I̱ni Ngode Datagaliwabe Haluhe Haabo Haga kogo i̱na ira dene bape halu irame dai helolebero. Anidagua berogola ira ogoni horo dewaore daho wiaabo holebira. Ibu mo ko halu bo gialo wahai halu bo labu hai hene ngagoria dama ko bu karu ti ogoniha ho gengeda tago bu holebira.

36 Yarusaleme-o amu ni tagira ibiragoha yagi handa dai bialu Ngode Datagaliwabehanda turu holene mo yalu ibulene wiyago yalu ibirago de handa. 37 Ainde í̠ waneigini dindi kaundiaha minu yu piyaru amu ibirago de handa. Ai Ngode Datagaliwabe baya burugule kagome ti olalu amu ni tagira ibiragoha wahalu dai bialu ni paliragohabi wahalu dai bialu dindi hanuni íbu ngoaiho hadaba lole olaya. Áyu tigua turu halu Ngode Datagaliwabehondo turu ho kagoni.

Copyright information for `HUI