a1.1Ab 18.19-21, 19.1, Lm 1.1, 1.7, 1 Ko 1.1, Kl 1.1
b1.22 Ko 1.2, Ga 1.3, Kl 1.2, Ta 1.4
c1.3Eb 2.6
d1.4Yo 15.16, 17.24, Lm 8.28, Eb 5.27, Kl 1.22, 2 Te 2.13, 2 Ti 1.9, Ya 2.5, 1 Pi 2.20
e1.5Yo 1.12, Lm 8.29-30, 2 Ko 6.18, Ga 4.5
f1.6Md 3.17, Yo 3.35, Lm 3.24, 5.15, Kl 1.13
g1.7Ab 20.28, Eb 2.7, Kl 1.14, 1.20, Hi 9.12, 1 Pi 1.18-19
h1.9Lm 16.25, Eb 3.4, 3.9-11, Kl 1.26, 2 Ti 1.9
i1.101 Ko 3.22-23, Ga 4.4, Pb 2.9-10, Kl 1.16, 1.20, Hi 1.2, 1 Pi 1.20
j1.11Lm 8.17, 8.28-29, Kl 1.12, Ta 3.7, Ya 2.5, 1 Pi 1.4
k1.132 Ko 1.22, 6.7, Eb 4.30, Kl 1.4-6
l1.14Lg 21.28, Lm 8.23, 2 Ko 1.22, 1 Pi 2.9
m1.15Kl 1.4
n1.16Pb 1.3-4, Kl 1.3, 1 Te 1.2
o1.17Kl 1.9
p1.18Ab 26.18, Eb 2.12, 4.4, Kl 1.12
q1.19Eb 3.7, Kl 1.11, 1.29, 2.12
r1.20Iba 110.1, 2 Ko 13.4, Kl 1.16, 2.10-12, 3.1, Hi 1.3
s1.21Lm 8.38, Pb 2.9-10, Kl 2.10, 2.15, Hi 1.4
t1.22Iba 8.6, Md 28.18, Kl 1.18, Hi 2.7
u1.22-23Kl 1.18
v1.23Lm 12.5, Eb 4.10, 4.15, Kl 2.9, 3.11

Ephesians 1

I̱ Polo. Ngode Datagaliwabe ibuni hame leagome Keriso Yasunagaabosolo kogoni. Ngode Datagaliwabenaga wali agali Keriso Yasuha ho gimbu bu haabo hene Ebesani kamiru tíhondo laro. a 

Ina Aba Ngode Datagaliwabebi Anduane Homogo Yasu Kerisobi libugua biamogo bia holenebi mo palia holenebi tíhondo ngilo hamelo ko. b 

Ngode Datagaliwabehanda Kerisoha howa dinininaga mo bayale holene ngaru nginigo ogo

Ina Anduane Homogo Yasu Kerisonaga Aba Ngode Datagaliwabehanda Kerisoha howa ina mo turu halu dinininaga mo bayale holene bibahende dahuliya andaga tawe ngago nginigonaga iname ibuhondo ka̱i̱ lami̱ya. c  Ibugua dindi haribi mbirale bibahende uruniha karubi ngarubi wa nabi howa ina Kerisoha ho gimbu bu howa ibunaga holoma̱yabi ko mbira para nahe bayaleore ibu deni holoma̱yabi ibugua ina dabene. Bambaore Ngode Datagaliwabenaga gubalini holeneme d  ina Yasu Kerisoni howa mo ibu waneigini hole manda bu hene. Ibuninaga hame leagome anidagua bini. e  Ngode Datagaliwabehanda ibunaga biamogo bia holene baya taraore ngago ibu Iginioreha howa inahondo turu halu bame nginigo mitangi bialu iname ibu mini yaraga hami̱ya. f  Keriso homayagome ina golope halu iname ko birimago domo wahai hene kama. Ngode Datagaliwabenaga biamogo bia holene timbuniore nga ndobe. g  Biamogo bia holene ogoni ibugua mbuni nabi howa timbuniore inahondo ngini.

Ibu mini gigabiwi mani holene manda biahe howa
Ngode Datagaliwabehanda manda manda bu winidagua mana ala pani nahe ngelenego Kerisoni howa bia maro bulene manda bu winigo inahondo mo pani haya. h  10 Ngode Datagaliwabehanda manda bu winigo ogo. Ibugua hariha karubi ngarubi dindini karubi ngarubi bibahende wabinigo Keriso ibu haguane howa mo mbiraore halu mandagi helo manda bu wini. Ogonidagua manda bu winigo bia maro bulene horo ibugua ala pongo bo winigo lola harangi bia maro bulebira. i 

11 Ngode Datagaliwabehanda bulebero lo wuwa bulene manda bu winidagua biai hene. Ibugua ina Kerisoha ho gimbu bu howa ibunaga wali agali holoma̱ya ina dabene. Ibugua ina dabenego irane ogo. Ibugua piganengi manda bu winigo mo tene howa bulebero lo winidagua bini. j  12 Anigo Kerisohondo pigane mini dunu bia ho hene kamaru iname ibunaga mini daliga taraore ngago yaraga halu hami̱ya.

13 Henene lolene Bi Mana Debene ngagome tí pele mulene mo yu halimulonaga langinigo hale howa tí Kerisohondo mini mbiraore wirimigoni. Ani wirimigola Ngode Datagaliwabehanda ibu Dinini ngulebero lo winidagua tíhondo ngiyagome tí ibuninaga kami lalu walia hene. k  14 Ngode Datagaliwabehanda ibunaga wali agali karuhondo ngulebero lowinigo heneneore mo yuleberami lalu manane ibunaga Dinini ngini. Ngode Datagaliwabehanda ina ibunaga kamaru golope hai holebira lalu Dinini ngiyago ibugua ina langiaga. Anigo Ngode Datagaliwabenaga mini daliga taraore ngago yaraga halu hami̱ya. l 

Polohanda Ngode Datagaliwabehondo bi lenego ogo

15 Irane ogonigo tígua Anduane Homogo Yasuhondo mini mbiraore wu kamigobi Ngode Datagaliwabenaga wali agali bibahende karuhondo gubalini ho kamigobi hale harungi m  16 i̱na Ngode Datagaliwabehondo tínaga ka̱i̱ laabo halu ko. I̱na ibuhondo bi lalu howa tí mitangi bialu tínaga la halu n  17 ina Anduane Homogo Yasu Keriso ibunaga Ngode Datagaliwabe wá taraore holene Aba kago ibugua tíhondo ibu Dinini ngilo i̱na mibe lalu la haruli. Dinini ogoni ibugua tí mini mo gigabi halu Ngode Datagaliwabe manda bilimulo walia holebira. o  18 I̱na tínaga bi la halu kogo ogo. Tí mini duguahe howa ibunaga manda bulene ngago manda bilimulobi Ngode Datagaliwabehanda tí mini dunu bia ho halimulo olenegonaga irane manda bilimulobi la halu ko. Ibugua ibunaga wali agalihondo turu holene bayaleru ngulebero lowini uruni baya burugule ngago manda bilimulobi la halu ko. p  19 Ibuhondo mini mbiraorewi kamaru inaha ibugua hongo tara howa biabe birago hongo ogoni manda bilimulobi la halu ko. Ibugua hongo timbunime Keriso homayago mo heya howa dahuliya andagaha ibunaga gi tigahayagi berelenego hongo ogoni dege inaha ka. q, r  21 Keriso ibu dahuliya andaga kagoria howa hari daligaha haru haga karubi hondo haga karubi hongo holene yu karubi homogo karubi ti bibahende bolangua hai halu Keriso ibu daligaore howa ibugua ti haru ka. Hongo tara taranaga mini dindini áyu ngarubi awe wulebirarubi bibahende bolangua hai halu ibu mini daligaore ka. s  22 Ngode Datagaliwabehanda bibahende karubi ngarubi Kerisonaga geha mo wuwa Keriso hameigini karunaga Haguaneore daliga helo Keriso helene. t, u  23 Keriso hameigini karu ti Kerisonaga tingini howa ibu heba homane mbiraore helo helaga ka. Homane mbiraore howa tinaga tene Keriso ibu howa mbirale bibahende ibuha hangu maro bida. v 

Copyright information for `HUI