a6.1Min 23.22, Kl 3.20
b6.2Md 15.4
c6.2-3Har 20.12, Man 5.16
d6.4Man 4.9, 6.7, 6.20-25, Iba 78.4, Min 19.18, 22.6, Kl 3.21
e6.52 Ko 7.15, Pb 2.12, Ta 2.9-10, 1 Pi 2.18
f6.82 Ko 5.10, Ga 3.28, Kl 3.11
g6.9Man 10.17, Lm 2.11, Kl 3.25, 4.1
h6.101 Ko 16.13, Eb 1.19, 3.16, Kl 1.11
i6.11Lm 13.12, 2 Ko 6.7, 10.4, Eb 4.14, 1 Te 5.8
j6.12Yo 12.31, 14.30, Lm 8.38, 1 Ko 15.50, Kl 2.15, 1 Pi 5.8-9
k6.132 Ko 10.4, Eb 5.16
l6.14Ais 11.5, 59.17, 2 Ko 6.7, 1 Te 5.8
m6.15Ais 40.9, 52.7, Nah 1.15, Lm 10.15
n6.161 Yo 5.4
o6.17Ais 49.2, 59.17, 1 Te 5.8, Hi 4.12, Mo 19.15
p6.18Md 26.41, Lg 18.1, Lm 12.12, Kl 4.2, 1 Te 5.17, 1 Ti 2.1
q6.19Ab 4.29, 2 Ko 3.12, Kl 4.3-4, 2 Te 3.1
r6.202 Ko 5.20, Pb 1.20, Pm 9-10
s6.21Ab 20.4, Kl 4.7-8, 2 Ti 4.12, Ta 3.12
t6.241 Pi 1.8

Ephesians 6

Waneiginirubi aba ai̱yarubi tigua bulene ngago ogo

Waneiginiru-o tí Anduane Homogonaga kamigo tí aba aíyalame bi laradagua hale halu bulene ogoni tigabigo ani bialu halimu. a  Bulene nabulenebimana lowini ngarunaga Ngode Datagaliwabehanda la tago halu, Bulebero, lalu lowinigo pigane ogo. Tí aba ai̱yala mo yo handa nabi laradagua hale halu bilimu. Ani bialu harimiyagua tí bayale halu dindi ogoriani lu holeberami, lalu gilibu nga. b, c 

Waneigini aba ai̱yaru-o tígua tínaga waneiginiru haru howa lawanana bialu mo keba nahalimu. Ani nabi howa Anduane Homogonaga mana lawai halubi mini wilo mana lolene ngadagua lalubi halimu. d 

Garabaya biabe ale bia hagamebi tinaga haru hagamebi bulene ngago ogo

Garabaya biabe ale bia hagaru-o tígua tínaga haru haga dindini karu mitangi bialu tigua bia laradagua mogo lowa baya hangu bilimu. Bialu howa Kerisonaga biabe bia harolo mitangi bialu henene minime bilimu. e  Tínaga haru hagame tí de hendedaore bayale berami lelonaga hangu ndo tí de nahendedahabi bayale bialu halimu. Tí Kerisonaga garabaya biabe ale bia haga howa Ngode Datagaliwabehanda hame ledago tígua gubalini howa biai halimu. Garabaya biabe ale bia haga howa biabe beramigo bame agalinaga bia harolo mitangi bialu ndo Anduane Homogonaga berolo mitangi bialu turu halu bilimu. Garabaya biabe ale bia haga kamirubi nabini kamirubi ta nabi tígua biabe bayale beramigonaga yolo Anduane Homogo ibugua tí ngulebirago mitangi bialu halimu. f 

Garabaya biabe ale bia hagarunaga haru hagaru-o tígua tínaga garabaya biabe ale bia hagaruhondo ogonidagua dege bialu halimu. Ani bialu howa tihondo, Nabirimiyagua bolebero larogoni, bi ogonibi nalalimu. Tinagabi garabaya biabe ale bia haganagabi tí bibahendenaga Haru Haga mbiraore dahuliya andaga kago manda bilimu. Ibugua tí birimigonaga dabalu howa ta nabi mbiraore kami mitangi bialu dabaga ka. g 

Ngode Datagaliwabenaga wai biagane aleru karulolene ogo

10 Bi lamaro bialu larogo ogo. Anduane Homogoha ho gimbu bu howa ibunaga hongo holene timbuni ngagome tí mo hongo helowa halimu. h  11 Dama Heyolabenaga ohowa mo hondo hagane mana ngagoria pi nale hongo howa bolangua hole tígua Ngode Datagaliwabenaga wai biagane ale ngiraru karulai halimu. i  12 Iname wali agali baba wai berama ndogo dama tara tara hari daligaha karu baba wai bialu kama. Haru hagarubi hondo hagarubi hongo tara tara arumaheha karubi ti baba iname wai bialu kama. 13 Anigo Ngode Datagaliwabenaga wai biagane aleru áyu ogoni karulalimu. Ko holene ngangi tígua waitigi baba hongo howa wai bu maro bialu hongohe dege haabo holeberami. j, k 

14 Ani manda buwa wai bule nendebu halimu. Henene lolene tínaga mandibu ale ndibulo wuwa mini tigabigaluhombeneni karulowa l  15 mo palia holenenaga Bi Mana Debene lamima polene ge su ale karulo halimu. m  16 Ngode Datagaliwabehondo mini mbiraore wulene humbi ale yu haabo halimu. Ogonime dama Heyolabeme hungu biaga timume tí bole biragola mo hundia habehe holeberami. n  17 Pele mulene yu kamigo manda ale karulowa Ngode Datagaliwabe bi mana gilibu ngago ibunaga Dinini ibugua tíhondo ngiyago wai bulene ayu tibu ale mo yu halimu. o  18 Ani bialu howa tígua Ngode Datagaliwabehondo, Biamogo bia, lalu laabo halimu. Ngode Datagaliwabe Dinini ibugua la lalu langiradagua bibahendenaga Ngode Datagaliwabehondo bi la haabo halimu. Ani bulenaga mamage halu wahalu nape hibu lalu halimu. Ngode Datagaliwabenaga wali agali bibahende karunaga tígua ibuhondo bi la haabo halimu. p  19 Ngode Datagaliwabehanda i̱na bi lolenego langilo i̱nagabi nde bi la halu halimu. Ani langiragola i̱na gi nahe elahe howa bi mana debenenaga galone ala pani nahe ngelenego bayuwa lawai holiyanagabi bi la halimu. 20 Áyu nde i̱ dariba kagola kogoni howa bi mana debene ogoni lamima piaga i̱ kogoni. Anigo i̱na bi mana debene ogoni lamulene ngadagua gi nahe elahe howa lamuliyanagabi tígua Ngode Datagaliwabehondo bi la halimu. q, r 

Lamaro bialu lenego ogo

21 Inanaga hameiginiore Tiyagasa ibu mini bilinahe howa Anduane Homogonaga biabe bia haga kago ibugua i̱ bayale kogobi i̱na bialu kogobi tí hale halimulo te ogoni tí langulebira. s  22 Ibugua ani langilo i̱na tí kamiria ibu pu laro. Ibugua ina kamarume bialu kamagonaga te tí langiragola tínaga mini mo hongo holebira.

23 Aba Ngode Datagaliwabebi Anduane Homogo Yasu Kerisobi libugua Keriso hameigini bibahende tíhondo mo palia holenebi gubalini holenebi mini mbiraore wulene heba ngilo hamelo ko. 24 Inanaga Anduane Homogo Yasu Kerisohondo gubalini holene wa nahe yu haabo karu tí heba Ngode Datagaliwabenaga biamogo bia holene wiaabo helo hamelo ko. t 

Copyright information for `HUI