a10.1Ese 1.26, Mo 4.2
b10.2Mo 8.5
c10.9-13Ese 1.15-21
d10.12Mo 4.8
e10.14Ese 1.10, Mo 4.7

Ezekiel 10

Anduane Homogonaga wá holene hongohe biagome ibunaga anda wahalu piyago ogo

I̱na mbirale ndisibe ale timbuni agali handalehe maria biagoria daliga mo pagaho wiago handa amu haru. Handa amu halu hewaria mbirale ndisibe ale timbuni biagoria daligaha kininaga biragane dagia handalehe mbira ege to̱le̱ mindibi muni timbunioreme miaga ale mbirame wabini wiaria handaru. a  Ani handalu hewaria Ngode Datagaliwabehanda agali aga bayale karule biagohondo lalu, Agali handalehe mariali biaru andanehayagi garo ge ale maria ngago dombeneha pialu í̠naga gi kirabalime ira hedo yule pobe. Hedo yuwa tano ngagoha ira dene ba a̱i̱na̱i̱ bima pobe, lalu lamiya. b 

Ani lamiyagola agali aga bayale karule biagome ani bule piyago handaru.
Agali o biago anda pu hearia agali handalehe maria biaru ti Anduane Homogonaga anda heagonaga abene unurayagi hearia de handaru. Ani heagola ginu hagua timbuni mbirame Anduane Homogonaga anda pabe bu yaanda hene wiago bibahende dambi hai haya. Ani biyagola agali handalehe mariali biaruha howa wá taraore holene hongo tagira pialu Anduane Homogonaga anda haneni wá hadali hayagola ginu haguame anda biagoha to̱latagi hai haya. Ani biyagola wá timbuni holene biagome anda pabe bu yaanda hene wiagohayagibi wá timbuni hongoheore haame ho heago handaru. Ani heagola agali handalehe mariali biarunaga babaganeme pilipala layuago wali agali tanoha hearume hale hai habehe dege layua. Agali handalehe biarume pilipala layadagoni Anduane Homogo Hongo Haiheore kagonaga bi ale o layadagoniya.

Anduane Homogohanda agali aga bayale karule biagohondo ira hedo yule pu layagola agali ogoni ibu puwa garo ge ale biarunaga mbirago heagoria pu haya. Ani pu hearia agali handalehe biaru aria mbirago ibugua ira tini heago dombeneha deago ibunaga gime ira hedo yalu agali biagonaga gi kirabaliha hedo ya haya. Ani biya handala agali biago ibu ira hedo yalu piya.

Ani piyagola handalu hewaria agali handalehe maria biarunaga babagane hearu andaneha agalinaga gi mbira mbira pani hearia handaru. Ai mbirale garo ge ale biaru ti bibahende ogonibi dege dege howa garo ge ale uruni hoaile de daibi ege to̱le̱ ambuabi yolo dewaoreme miaga ngaligobi wiaria handaru. c  10 Garo ge ale maria uruni wiago andaneha garo ge ale maria mende wiago uruni polenedagua handa amu nana bu wia. 11 Ani howa mbirale uruni ti mbira poa biragohayagi pole howa beregeda nabi kagoria howa pupe hagaya. Ani bialu agali handalehe maria uruni mbirahayagi pole howabi ti wanakui ho beregeda nabi kagoria howa pupe hagaya. 12 Ani bialu agali handalehe uruni tinaga tingini bibahende erembirahabi gihabi babaganehabi tinaga garo ge ale mbira mbira biarunaga bibahendeni de hondolene dewa hai hearia handaru. d  13 Ani hondo hewagola bi mbirame, Garo ge ale uruni ibaga bialu howa mabu mabu bialu haga, layuane hale haru.

14 Agali handalehe maria uruni ti hangu hangunaga dengui maria howa tara tara dege hea. Dengui mbirago nogo bulumaga handalehe howa mendego agali handalehe tebonego budi gabua timbuni laiono handalehe manego ega bodo hariawe handalehe dege dege hearia handaru. e  15 Mbirale maria uruni de gandeba hondowa handarudagoni ala Iba Keba peago angeni howa hendenego dege lone handaru. Tigua heyalu harini dai dolope halu pialu howa 16 garo ge ale biarubi nde ti haru mandagi piagaya. Tigua babaganeme yagalalu poragola garo ge ale biarubi ti haru yagalalu mandagi dege piagaya. 17 Agali handalehe maria uruni ti ema nabi hondo heagola garo ge ale tibi ema nabi wiagaya. Ani biagadagoni irane agali handalehe maria biaru tigua garo ge ale urunime bulenego mo bia howa haru haga kagome ani biagaya.

18 Uruni de hondo hewagola Anduane Homogonaga wá holene hongohe ibuninaga anda haneni hadali hayago dai bialu agali handalehe maria biaruni heagoria daligani pu haya. 19 Ani biyago handayaho hewagola agali handalehe biarume tinaga babagane yanga lowa yagalalu hariha iraga halu pialu hearia garo ge ale maria biaru tibi nde o piyagoha mandagi pumaga halu piya. Puwa Anduane Homogonaga andaha pabe bu yaanda hene pabe mende heagonaga panga haraba amu ni tagira ibiragohayagi wiagoria kaware pu haya. Ani pu heagola Anduane Homogonaga wá holene hongohe taraore ti heagoria daligaha hearia handaru. 20 Ani handalu hewaria agali handalehe maria uruni i̱na ala Iba Keba angeni Isaraele wali agalinaga Ngode Datagaliwabe kago andaneha hearia handarugo degeyane mandabu dege haru.

21 Agali handalehe maria biaru mbira mbirago ibunaga dengui maria dege degehe halu tinaga babagane maria dege degehe hearia handaru. Ani bialu tinaga babagane maria hayadaru andaneha agalinaga gi handalehe maria dege dege haihe hea. 22 Abale i̱na Iba Keba peagoha hewaria mbirale maria handarudaruni tinaga dengui o uruni dege lone íbu hearia handaru. Mbirale uruni ti mbira poa biragoha pole howa tinaga tingini ho beregeda nabi kagoria howa tigatiga pupe halu piagaya, lalu Esegielehanda lene.

Copyright information for `HUI