a6.8Ais 6.13, Yar 30.11, 44.14, 44.28,Ese 7.16
b6.10Yar 5.12-14, Ese 6.7

Ezekiel 6

Mbirale gime wabini wiaruhondo bi pupu wiaga hearu baba keba henego ogo

Anduane Homogohanda i̱hondo lalu, Dindiali-o í̠na Isaraele dindinaga hari wedaruha handa amu nana bialu i̱naga bi ogo tihondo lamibe. Hari wedarubi dindi ulini panda panda ngarubi tihondo lamialu lalu, Anduane Homogo Bibahende Haru Haame Ho Haga kogo i̱na waitigi ibilarogola tigua dama mitangi bialu mbirale gime wabini bu ngaruhondo wali agalime bi pupu wule piaga ngaru bo gialabaga bilolebero. Waitigi urunime ibalu nogo tara tara bo lomabu delaga dabu bu heledaru bo gialo wahai halu ira hagua ngabiloinisenesi lomabu delaga dabu bu heledarubi bo gialo wahai holebira. Ani bialu tigua Isaraele wali agali bu karu tinaga mbirale dama mitangi bialu gime wabu ngaruhondo bi pupu wialu karia ti bo waholebira. Ani bo wahowa tinaga tingini mbirale gime wabu ngagoria ngelowa Isaraele wali agali uruninaga kunibi tinaga lomabu delaga dabu kagoha wuyu mabu bu wima polebira. Waitigime ibalu Isaraele dindinaga tanoru bo haealabaga biai halu wali agalime bi pupu wiaga anda bu heledarubi mo ko halu bo gialo wahai holebira. Tigua lomabu delaga dabu bu heledarubi mbirale dama mitangi bialu gime wabu ngarubi bo gingirulo wahai halu ira hagua ngabiaga inisenesi lomabu delaga dabu heledarubi bo gialo wahaiore holebira. Anidagua bilarogola Isaraele wali agali tigua mana ko bialu gime wabigi biyaru bibahende ereba hai holebira. Waitigime Isaraele dindi bibahendeha piai halu Isaraele wali agali bu karu dewaore homelo bo wahaga bulebira. Anidagua biragola Isaraele wali agali maru homa nabi yu wahene bu karu tigua i̱ni Anduane Homogoore henedane manda bulebira.

Ani bialu waitigime wali agali maru ba nabi helene karu i̱na ti hameigini tara tara dindi ngaruha purogo lelolebero. a  Ani purogo lelarogola ti dindi kaundia uruniha garabaya pu howa tigua i̱ mitangi bu dai bialu tinime kagua bialu harimagome i̱ mo genda harimada lo manda bulebira. Tigua i̱ erembira ngialu mbirale gime wabini wiaru hamelo aribia howa o biaruhondo bi pupu wialu harimagobi iname mana ko ngubiore bialu harimadalo manda bialu taga timbuniore holebira. 10 Ani taga howa i̱ Anduane Homogo i̱na bi hongohe áyu larogoni bame ti mo gi halu ndo lenedane hondolebira, lalu Anduane Homogohanda lene. b 

11 Anduane Homogo Bibahende Haru Haame Ho Haga kagome i̱hondo laabo halu lalu, Bu miniha genda halu geme dindi hongo howa hengedabe. Isaraele wali agalime mana ko ngubi dewaore biyarunaga dara howa dugu bibe. Heneneore tigua mana urunidagua bialu hayarume maru waitigime bo wahai halu maru hina garime homalu ti marubi warago tara baragome homai holebira. 12 Bibahendeore homai holene wulebira. Anigo maru dindi kaundiaha karu ti nde warago balu home lelolebero. Kawareni karu waitigi ibiragome bo wahalu yu wahene maru karu ti hina garime home lelolebero. I̱na urunidagua bialu i̱naga keba ho kogo tiha biba helolebero. 13 Waitigi tigua Isaraele wali agali homararunaga tingini maru mbirale gime wabu ngaruha waho ngelalu maru lomabu delaga dabu bu heledagoria wu mabu bu wialu maru hari nene ti bi pupu wiaga ngaruhabi dindi bare barenibi ira timbuni bu karu tenehabi ira maru yuni dewahe kagohabi tinaga tingini wahaga bulebira. Isaraele wali agalime gime wabini ngaruhondo bi pupu wialu mbirale bo lomabu delaga kago bibahendeha tinaga tingini uruni kaware wigi bulebira. Horo ogoningi Isaraele wali agali bibahende karume i̱ni Anduane Homogo henedalo manda biai holebira. 14 Aniore bulebira. I̱na tinaga dindi mo ko halu labu hai helolebero. Tinaga dindi lenego bibahendeore unurahayagi dindi ko wali agali nahaga ngagoria howa ibalu uyurahayagi Libila tano ngagoria mo ko hairi helalu labu hai helolebero. Dindi Isaraele wali agali haganego gibunihabi mbira yu wa nahelolebero. Anidagua berogola wali agali karu bibahendeme i̱ni Anduane Homogo heneneore henedalo manda biai holebira, lalu Anduane Homogohanda i̱hondo laya, lene.

Copyright information for `HUI