a1.1Yar 25.11, 29.10
b1.2Ais 44.28

Ezra 1

Kini Sairusihanda, Yuda wali agali tí Isaraele dindi dai bidaba, lenego ogo

Pesianaga handame haga Kini Sairusi ibu hearia mali mbira peagola Anduane Homogo ibugua bulebero lalu Ngode Datagaliwabe manalatagi haga Yaremaiaha howa lo winiyadagua lola hene. Anduane Homogo ibugua Kini Sairusinaga miniha howa bi ogobi gili bibe lalu mo walia hayago wali agali dindi bibahende kini ibugua hondo heagoria hongo howa lo pela layadagua lo pelene. Ani layagola ibugua bi lo pelene uru. a 

Pesianaga handame haga Kini Sairusihanda wali agali tígua bilimulo bi mbira laro. Anduane Homogo dahuliya andaganaga Ngode Datagaliwabe ibugua i̱na dindi bibahende handa gimbu buliya i̱hondo hongo ngiya. Ani bialu ibugua i̱hondo anda mbira Yuda dindiha Yarusalemeni bibe laya. b  Ngode Datagaliwabe ibuninaga wali agali tí heba mandagi helo hame ledo. Tígua Yarusaleme dindini dai buwa Anduane Homogo Isaraelenaga Ngode Datagaliwabe kagonaga anda biadai bule poleberemi. Ngode Datagaliwabe ogoni ibunaga mini Yarusalemeni yaraga halu lotu lolene nga. Ibunaga wali agali maru dai bilo mbirale tumagi kayagua tinaga nenegeme silibabi ngolobi maru nayi aleru milimu. Mbirale yalu pelo nogo hosibi dongibi milimu. Ani buwa Anduane Homogonaga andaha Ngode Datagaliwabehondo mbiraleru loma bia howa Yarusalemeni wilobi milimu, lalu bi lo pelene.
Ani layagola agali haguane maru Yuda hameigini howabi maru Beniyamini hameigini howabiloma binigo mo miaga hearubiLibaiali hearubi wali agali maru Ngode Datagaliwabe ibunime tini gubaliniha hangu hangu elahaga bigi biyarubi tigua Anduane Homogonaga anda biago biadai bule pole manda manda bini. Tinaga nenege hearume dabudabu dewa mialu biamogo bini. Ndisi silibame wabinirubi ngolobi tomo nolenebi dawalenebi dabudabu yalu pelo hosi dongibi maru maru dewa mini. Anduane Homogonaga andaha mbirale tara tara Ngode Datagaliwabenaga loma biaho wilobi mia dege bini.

Kini Sairusi ibugua ndisi bebi gabo bebi Kini Nebugadenesahanda Yarusalemeni Anduane Homogonaga andaha wiaria ibunaga dama andaha wule mo yalu piyaru yadai bini. Ibugua uruni muwa kininaga muni handaya ho haganaga haguane Mideredahondo mini. Ibugua ilumogo bialu bebani mo tiga bu howa Yuda gabumane haru haga heago Sesebasahondo mini. Ogodagua mini.

Ndisi be ngolome wabiniru daga pira tebira (30).

Ndisi be silibame wabiniru daga daosini mbira (1,000).

Ndisi be tara ale maru winiru daga pira kirani dira (29).

Ndisi be ngolome wabini emene dameneru daga pira tebira (30).

Ndisi be silibame wabini emene dameneru daga handari mariani pira mbira (410).

Tomo naganebi dawaganebi daga daosini mbira (1,000).

11 Ngolome wabiniru silibame wabiniru maru tara tara wiaru heba bibahende daga lamaga howa daosini duriani handari maria (5,400) mini. Urunidagua ilumogo buwa miya handala Sesebasabi Babilono howa garabaya henerubi ti mandagi uruni mo yalu Yasusaleme dai bini.

Copyright information for `HUI