a12.1Lm 7.21, 12.12, 1 Ko 9.24-25, Pb 3.13-14, Hi 10.36, 1 Pi 2.1
b12.2Pb 2.8, Hi 1.3, 1.13, 1 Pi 1.11, 3.22
c12.3Yo 15.20, Ga 6.9
d12.41 Ko 10.13, Hi 10.32-34
e12.5-6Yob 5.17, Min 3.11-12
f12.6Iba 94.12, Ya 1.12, Mo 3.19
g12.7Man 8.5, 2 Sml 7.14, Min 13.24, 23.13
h12.8Iba 73.15, 1 Pi 5.9
i12.9Aga 12.7, Ais 42.5
j12.10LBM 11.44, 1 Pi 1.15-16
k12.11Ya 3.17-18
l12.12Ais 35.2
m12.13Min 4.26, Ga 6.1
n12.14Iba 34.14, Lm 12.18, 2 Ko 7.1, Eb 5.5, 2 Ti 2.22
o12.15Man 29.18, Ab 8.23, 2 Ko 6.1, Ga 5.4, Hi 3.12
p12.16Pig 25.29-34
q12.17Pig 27.30-40
r12.18Lm 6.14, 2 Ti 1.7
s12.18-19Har 19.16-22, 20.18-21, Man 4.11-12, 5.22-27
t12.20Har 19.12-13
u12.21Har 19.16, Man 9.19
v12.22Iba 68.17, Ga 4.26, Pb 3.20, Mo 5.11, 21.2, 21.10
w12.23Lg 10.20, Pb 4.3, Hi 11.40, Mo 13.8, 14.4
x12.24Pig 4.10, Hi 8.6, 10.22, 11.4, 1 Pi 1.2
y12.25Har 20.22, Hi 2.1-3, 3.17, 10.26-29
z12.26Har 19.18, Iba 68.8, Hag 2.6
aa12.27Iba 102.26, Md 24.35, 2 Pi 3.10, Mo 21.1
ab12.29Man 4.24, 9.3, Iba 50.3, Ais 33.14, 2 Te 1.8, Hi 10.27

Hebrews 12

Ina Aba Ngode Datagaliwabe ibugua ina handaya ho kago ogo

Anigo wali agali bibahende mini mbiraore wu henedarunime biyadagua iname nde buluma̱ya manane walia ho nga. Irane ogoninaga mbirale bibahende inani ngarubi ko inani para ho ngarubi wahai halu iname gerai lolene ngagoria wiape kagola hibu lalu mali̱ya. a  Ani pialu howa iname mini mbiraore wulene tenialubi wu maro bialubi Yasuha mini hana ho kamago ibuni handaya ho yalu puabo hami̱ya. Ibugua ira bangani homolene manga halu wa nahe pene. Irane ogoni maha turu holene yu holebiragonaga ibugua taga nahe ira bangani homayagome áyu Ngode Datagaliwabenaga haru howa biraganeni gi tigahayagi pu beda. b 

Anigo ibu tandaga nama piyagobi ko biaga hearume ibu handabe manga hayagobi mitangi bilimu. Yasu ibugua ani biyago mitangi buwa tí tínime mo genda halu wahalu pu nabilimu. Tígua ko ngaru baba wai hongo howa bialu kamigo tí mbiraligo bo home nale kami. c, d  Ngode Datagaliwabehanda tí ibunaga waneigini howa elahe halimulo bi mo hongo holene tíhondo larago embeda ho kamibe. Bi larago ogo, e 

I̱ igini-o Anduane Homogohanda í̠ mo tiga biragola bayuwa hale ho habe.
Ani bialu ibugua í̠ taliragola miniha genda nahabe.
Irane Anduane Homogo ibugua gubalini hararu bibahendehondo mo tiga biaga ka. f 
Ibugua bibahende ibu waneigini kagola mana laga,
lalu gilibu nga.

Áyu tandaga nalu kamigo abame baragola tandaga nagadagua nalu kami. Tígua tandaga nalu kamigoni Ngode Datagaliwabehanda tí ibunaga waneigini kami lalu walia haga. Igini ibu abahanda mana nalaga mbira kabe. g  Ngode Datagaliwabe ibugua ibu waneigini bibahende mana lalu bagadagua tí maru nabe kayagua tí ibu waneigini heneneore ndo aba nahe hono wahene ale kami. h  Ai ina aba dindini hene karu tigua ina mana laragola iname ti mitangi bu haramali. Ani mitangi harimadagua ina dinininaga Aba daliga kagohondo mitangi timbuniore bialu ibunaga andaneha holene nga ndobe. i  10 Ina aba dindini hene karu tigua ina mo tiga bulene manda biyadagua tigi mbira dege baga biaga. Ani binigo Ngode Datagaliwabe ibugua inanenaga koyane ibuni baya burugule kagoha mandagi ha tago ho holoma̱yanaga mo tiga biaga ka. j  11 Ibugua ina mana lalu barangi ina turu nahe keba dege dindi ho harima. Ani birimago maha mana lalu ogonidagua mo mini wia hene karu tigua mana tigabi biaganaga mo palia holene yu haga ka. k 

Mana bulene nabulenebi ngago ogo

12 Irane ogoninaga tígua gi hi ho kamiru yaraga ho halu ge duli diri durulo kamiru mo hongo halu hadaba. l  13 Ani bialu ge kohe kamiru ko ha timbu nahe dabi helo tígua hariga tigabini pialu haabo halimu. m 

14 Tigua mo palia holene yu howa wali agali karu baba ta nabi mandagi halimu. Holene baya burugule mbiralime nayi howa Anduane Homogo nahondolebirago tígua holene ogoni yu howa bialu hole lowa halimu. n  15 Ani howa Ngode Datagaliwabehanda biamogo bulene nawi howa biamogo bia harago yu wahalu dai buligo mamage ho halimu. Datani ko kaubi mbira anda ho kaligo ogoninaga kaume mo kau bia hagadagua tí kamiru aria mbirali ogonibi holigo de hondo halimu. o  16 Ani bialu tí mbiraligo wali kayu yagabi Ngode Datagaliwabenaga ngaru yo handagabi holigo de hondo halimu. Isohanda ogonidagua buwa tomo halu mbira hangu nole lowa ibu igini wahene howa aba pani ha aribia holene wiagome yolo bini. p  17 Iso ibu maha ibu abanaga mo turu holene mo yua hayago tígua manda bidamigoni. Ani binidagoni irane ibugua biyago mbira balalu dai bule dugu bialu tai bia biyagolabi Ngode Datagaliwabehanda ibu yu wahenegome henge handa walia nahe hene. q 

18 Isaraele wali agali Hari Sainai weagoha íbu heagola Ngode Datagaliwabehanda biyagodagua tíhondobi nde bilo naibirimi. Isaraele wali agalime Hari Sainaini íbu howa ira hungu biyagobi aruma hayagobi hari biagoria mindi timbuni biyagobi puyabu hongohe u e layagobi r, s  19 mbelo biguli be̱be̱ layuagobi mbiralime bi layuagobi uruni bibahende ti manda biai hene. Mbiralime bi o layuago tigua hale halu lalu, Bi mende inahondo nale waha, lene. 20 Ani lenego irane bime bilimu layuago ogo, Wali agalimebi nogo biangomebi mbiragome hari ogo ela hayagua homelo ege to̱le̱me balimu, layagola hale halu tigua gi howa, Bi nale waha, lene. t  21 O handayago handalu mogoleoreyagola Mosesehanda lalu, I̱ diri durulalu gi taraore ho ko, lene. u 

22 Tígua ibirimigo uruni hondole ibirimi ndo. Tí Hari Saiono Ngode Datagaliwabe holenehe kagonaga tano dahuliyanaga Yarusaleme dahuliyali daosini au lolebe tobahe kagoriabi ibirimi. v  23 Ngode Datagaliwabe waneigini wahene mini dahuliya andagani gilibuwi karu turu halu mo mogo bu kagoriabi tíbi ibu waneigini wahene dege howa íbu kami. Ani bialu tí wali agali bibahende daba ki holene Ngode Datagaliwabe kagoriabi wali agali ala bayale halu homayarunaga dinini mo baya burugule heleneru kagoriabi ibirimi. w  24 Tígua habo nalolene bi gahengenaga dombegua Yasu kagoriabi ibunaga darama tindi tandalo ba hene ngagoriabi ibirimi. Darama ogoni Abelenaga darama ale ndo Yasunaga darama hongohe taraore ko domo wahai haga nga. x 

25 Ani bidago ibugua bi lararu tígua hale habe manga nahe bayuwa hale halimu. Mbirali dindini howa bi mana lamiyago hale habe manga hayaru ti yo pialu napene. Ani binigo Ngode Datagaliwabehanda dahuliya andagaha howa bi langirago hale howa iname mo waharimayagua yo pialu polene henge nawialu nawuleore bira. y  26 Ala Ngode Datagaliwabenaga bi layangi layadagonime dindi bibahende mo imi ema biai hene. Ai áyubi ibugua lowialu lalu, I̱na halu mende mo imi ema bialu dindi hangu ndo hari daligahabi heba mo imi ema biaore holebero, lene. z  27 Ibugua, Halu mende, lenego bibahende wabini ngaru imi ema bilalu mo waholebiragonaga tigatiga walia ho nga. Ani bulebirago irane mbirale bibahende mo imi ema bibe nahe ngaru wiaabo helonaga ani lene. aa 

28 Anigo Ngode Datagaliwabe ibugua Handame Ho Kago mo imi ema nabibehe ngago yama pialu haramagonaga iname ibuhondo ka̱i̱ lalu hami̱ya. Ani buleberamago irane inanaga Ngode Datagaliwabe ibu ira dalu do au lagane kago mitangi bialu ibu turu helo iname ibu mo dunini helalu gi holenemebi mogo lolenemebi ibunaga mini yaraga halu lotu lalu hami̱ya. ab 

Copyright information for `HUI