a25.1Dag 23.19, Iba 98.1, 118.28
b25.2Ais 21.9, 23.13, Yar 51.37
c25.81 Ko 15.54, Mo 7.17, 21.4
d25.9Pig 49.18, Iba 20.5, Ta 2.13
e25.10-12Ais 15.1—16.14, Yar 48.1-47, Ese 25.8-11, Amo 2.1-3, Seb 2.8-11

Isaiah 25

Anduane Homogonaga mini yaraga halu iba gana lenego ogo

Anduane Homogo-o í̠ i̱naga Ngode Datagaliwabeore ke. a 
Í̠ mini yaraga holene hamelo kogoni.
Í̠na biamogo bulenaga biabe nahendene ale birigoni.
Í̠na mbirale buleore lalu bamba lo wiriruni biaiore harigoni.
Í̠na tano timbuni wiaru bo gialapaya biri. b 
Tano maru wai pabe hongohe bu mabubi hearu bo gialo wahai hari.
Waitiginaga tano timbuni hongohe wiaru bo haealabaga biai harigo
tigua tano uruni lone biadai nabulebira.
Wali agali tano hongohe timbuni ngaruha haga karume í̠naga mini yaraga holebira.
Dindi marunaga tano mo ko haga bu ngaruha wali agali bu karume í̠hondo giho holebira.
Wali agali yagibano mbirale nawi karubi genda yu howa mini dege dindi ho karubi
tinaga ha do holene í̠ hegola ti embeda howa bayale haga hene.
Iba dalu puyaburu ibirangi ti bayale helonaga bira do holene anda í̠ni hariligoni.
Ti ni poboyogo nahelonaga í̠ni ho ge haga kegoni.
Agali ko biaga karunaga miniha tandaga holene timbuni hongoheore ngagome
puyabu hongoheme wai pabe podope nahagagobi halu
dindi ko gaea hangu biaho wiaga ngagoha ni hongohe dedaligobi dalu bida.
Anduane Homogo í̠na agali waitigi bu karunaga ne hariga hangai harigoni.
Tigua ga̱ lalu bi ko lalu kago wahalu bi nale haga.
Ni hongohe dedago beralibame ge haragola gumba hagagobi í̠ kegoni.

Anduane Homogohanda Hari Saiononi tomo manda manda bulebirago ogo

Anduane Homogo Hongo Haiheore kagome Hari Saiono ogoriani tomo timbuniore dawa wulebira. Ibugua nogo sibi bulumaga egarubi bayaleore tara tara dawa wialuwaini iba bayaleru hambu wulebira. Ani bidagola wali agali dewaore dindi tara tara ngaruha howa tomo uruni nole íbu ngoai holebira. Ogoriani wali agali dewaore dindi tara tarani ti ala bu miniha genda timbuniore yu hagahaga bu henedaru tinaga genda uruni bibahende ogoningi Anduane Homogohanda ti dara howa mo ereba hai helolebira. Anduane Homogo Bibahende Haru Haame Ho Haga kago ibugua homolenebi mo ereba hai haragola lone homolene nawulebira. Ibugua wali agali bibahendenaga dugu bulene ngago mo ereba hai halu tinaga de iba domo wahai holebira. Ani bialu ibunaga wali agali dindi bibahendeni bu karu tinaga taga holenebi tandaga nolenebi ngaru mo wahai holebira. Anduane Homogo ibunioreme ani bulebero laya. c 

Mbirale uruni tagira ibirangi wali agali bibahende karu tigua ogodagua lolebira, Anduane Homogo ibu inanaga Ngode Datagaliwabeore kagoni. Iname ibuhondo mini mbiraore wuwa ibuha hana ho hemagola ibunime ina mo wialu haru dai bini. Ibuni hangu Anduane Homogoore kagoni. Ai iname ibuhondo mini mbiraore wirimagola ibugua ina pele ngialu haru dai biyagonaga turu timbuniore ho kamagoni, lalu holebira, lene. d 

Anduane Homogohanda Moaba dindi mo ko holebira lenego ogo

10 Anduane Homogohanda Hari Saiono de hondo mamage halu ai Moaba wali agaliru tinaga waitigime belo ibu handaya ho holebira. Nogo bulumagame tininaga ti to wini ngagoha datani hengedape hagadagua Moaba wali agali tinaga waitigirume ibalu bo hengedope hai holebira. e  11 Ani biragola Moaba wali agaliru ti iba hanuni yu wahenego angeha do̱lo dai bule hongo howa do̱larilidagua bialu holebira. Ani bialu karia Anduane Homogohanda ti ala mine hayagonaga pani mialu ti mo taga halu dindiha ibira holebira. 12 Ibugua tinaga ege pabe daligaore hongohe bu heledaru bo gialo wahai halu podo bagabu ibira hai helolebira, lene.

Copyright information for `HUI