a3.1Md 23.8, 23.14, Lg 6.37, 12.47, 1 Pi 5.3
b3.21 Kin 8.46, Min 20.9, Md 12.37, 1 Yo 1.8
c3.5Iba 12.3, 73.8-9, Min 12.18, 15.2
d3.6Min 16.27, Md 12.36-37, 15.11, 15.18-19, Mg 7.15, 7.20, 7.23
e3.8Iba 140.3, Lm 3.13
f3.9Pig 1.26, 5.1, 9.6, 1 Ko 11.7
g3.13Ga 6.4, Ya 1.21, 2.18
h3.14Lm 2.17, 2.23, 13.13
i3.15Pb 3.19, Ya 1.5, 1.17
j3.161 Ko 3.3, Ga 5.20
k3.17Lm 12.9, 1 Ko 2.6-7, 1 Pi 1.22, 1 Yo 3.18
l3.18Min 11.18, Ais 32.17, Md 5.9, Pb 1.11, Hi 12.11

James 3

Iname hége haru holenego ogo

I̱ hamene mbaliniru-o tí lawai hagane hole garere nabilimu. Daba ki birangi Keriso hameigini bibahende dabolebira. Dabalu howa lawai hagane kamaru inahondo hongo howaore dabolebira. a  Ina bibahendeme kagua dewa beramali. Mbiralime bi ko nalaga kayagua ibu baya burugule howa ibunaga mini tinginibi haru hai haga ka. b  Agalime nogo hosi gabua mo dambola howa nogo hosi ne hanganeha ege pu magui howa pume pongo buwa biabe hame ledamadagua bilo iname hosi haru haramali. Iba sibi piagane mana manda bimi̱ya. Puyabu hongo howa pu laragola iba sibi timbuni ngago yagane agalime ibuni poa biragoha pole ira mbalape emeneme mo tiga biaga. Hége emene koore howa bi biabe dege timbuniore biaga ka.

Ira dene emeneme irabu timbuni ngago bo dai haga. c 
Hége ira dene ale ka. Ko bulene dewa ngaru hége ibuha howa tagira ibaga. Hégeme tingini bibahende tomia biai haga ka. Hégenaga hungu biagane tene heli dindiha nga. d  Nogo ega tara tarabi dindini tombene piagane tara tarabi wena tara tarabi bibahendeore wali agalime mo dambola hagago hége mo dambola habe nahe ka. Hége koorene ko ka. Hégeme bibahende tomia biai haga. e  Inanaga hégeme Anduane Homogo ina Abahondo ka̱i̱ laramali. Ani buwa hége ogoni degeme agali Ngode Datagaliwabehanda ibuni ale helo wabini karubi ha haramali. f  10 Ne hariga mbiraoreha howa ka̱i̱ lolenebi ha holenebi tagira ibaga. I̱ hamene mbaliniru-o mana ogonibi karulape ndo. 11 Iba gendo mbiraoreha howa iba kaubi dendebila ibagabe. 12 I̱ hamene mbaliniru-o pogeme hai dagabe. Pu mbira lini daga minigerebi iraneme pogoli dagabe. Ogonidagua dege ibi iba kaubi bedagoha iba dendebi hambibehebe.

Mini gigabi wulene dahuliya andaga tawe ngago ogo

13 Tí kamigoha mini gigabiwi manda timbunibi mbira ai kabe. Mini gigabiwi mbira kayagua mine nahe ibuni mo dindiha halu mana bayale biragome walia holebira. g  14 Anigo tínaga bu miniha henge lolenebi bi ko lolenebi habua bulenebi wu kamiyagua, Mini gigabiwi kogo, laramigome henene lolene ngago mo ko haramigo nalalimu. h  15 Mini ogonibi wulene dahuliya andaga tawe ndo dindi tawe damanaga mini koha howa íbu nga. i  16 Henge lolenebi habua bulenebi ngagoria mini mo mbiraore naholenebi ko bibahende bulenebi wulebira. j  17 Anigo mini gigabiwi holene dahuliya andaga howa íbu ngagome mini wálewi holenebi mo palia holenebi hogorale bu holenebi nenege hinulenebi dara halu biamogo bulenebi mana bayale biatagi holenebi nga. Mini gigabiwi holene ogoni wali agali hoba migimigi nabiagabi tombene hondo kihe nahagabi nga. k  18 Ani buwa mo palia haga kagome mo palia holene egene hongolebira. Anda haragola ibuhabi wali agali maruhabi mini tigabi holenenaga lini dolebira. l 

Copyright information for `HUI