a5.1Min 11.28, Lg 6.24, 1 Ti 6.9
b5.2Yob 13.28, Ya 2.2
c5.2-3Md 6.19
d5.4Man 24.14-15, Yar 22.13, Mal 3.5
e5.5Yar 12.3, 25.34, Amo 6.1, 6.4, Lg 16.19, 16.25, 1 Ti 5.6
f5.7Man 11.14, Yar 5.24, Hos 6.3, Yol 2.23, Seg 10.1, Lg 21.19
g5.8Lm 13.11-12, Pb 4.5, Hi 10.25, 10.37, 1 Pi 4.7
h5.9Md 24.33, 1 Ko 4.5, Ya 4.11
i5.10Md 5.12, Hi 11.35
j5.11Har 34.6, Yob 1.21-22, 2.10, 42.10, Iba 94.12, 103.8, 111.4, Md 5.10-11
k5.12Md 5.34-37
l5.13Eb 5.19, Kl 3.16
m5.14Mg 6.13, 16.18
n5.15Ais 33.24, Md 9.2, Mg 16.18
o5.16Man 9.18-20, 1 Sml 12.18, 1 Kin 13.6, Iba 34.15, Yo 9.31
p5.171 Kin 17.1, 18.1, Lg 4.25, Ab 14.15
q5.181 Kin 18.42-45
r5.19Md 18.15, Ga 6.1
s5.20Iba 51.13, Min 10.12, Lm 11.14, 1 Ko 9.22, 1 Ti 4.16, 1 Pi 4.8

James 5

Homogo karunaga bi lo ngago ogo

Homogo kamiru tí hale hadaba. Mo ko holene dewa tínaga wulebirago mitangi bialu yi lalu dugu bilimu. a  Dabudabu do harimigo goba haya. Aga tara tara wirimigo bombome naya. b, c  Muni kuni ngolo silibabi wirimigo hagua biai haya. Hagua bidago hondowa tí ko birimigo lalu walia holebira. Irame dagadagua muni hagua bidagome tínaga tingini dolebira. Hamaro bulene horo kaware ngago ngelowa mbirale tara tara do harimi. Mabu biabe bia hayaru mo hondo howa tinaga yolo nami ngamigome ko birimigo walia hara. Biabe bia hayaru maru mo hondo harimigonaga tigua bi larago Anduane Homogo Hongo Haiheore kagome hale halu ka. d  Dindi ogoria howa tíni hangu mitangi bialu nogo habahe kagola bo nolene tu haralidagua tí homolene kaware nga manda nabi howa bibahende ta nabi hame ledamidagua biai halu kami. e  Ko nabi hayaru, Ko biya, lowa tigua nde ladai bulene henge nawi heagola homelo bo waharimi.

Ema nabi howa hibu lalu Ngode Datagaliwabehondo bi lolenego ogo

I̱ hamene mbaliniru-o Anduane Homogo dai bilo tagi ema nabi howa hibu lalu halimu. Agalime tomo hongowa anda helonaga dalu ibilo ema nabi malia ho hagago mitangi bilimu. f  Anduane Homogo dai bulene horo kaware ngago tí turu halu mini dunubia ho howa ema nabi halimu. g 

I̱ hamene mbaliniru-o Ngode Datagaliwabehanda daba ki bialu howa, Tígua kagua birimi, loligo tíni guraga guraga nabilimu. Daba Ki Biaga henemane ibu panga tagirahayagi howa tamuha ibule kago handalimu. h  10 Ngode Datagaliwabe manalatagi haga agali bamba henerume Anduane Homogo mini lowa ti tandaga halu ema nabi howa hibu lalu henego manda bimi̱ya. i  11 Tandaga timbuni halu ti hongo haabo howa turu holene handa walia hene laramali. Yobo te hale harimigoni. Ibugua Ngode Datagaliwabe mitangi bialu ema nabi howa hibu lalu haabo hayagola Anduane Homogohanda ibuhondo biyago manda bidami. Anduane Homogo kagome wali agali de hondowa dara timbuni halu biamogo biaga ka. j 

12 I̱ hamene mbaliniru-o ai galone timbuniore laro. Dahuliya andaga mini lalubi dindi mini lalubi mbirale tara ngago mini lalubi wanakui minalu bi nalalimu. Ngode Datagaliwabehanda, Í̠ kagua lari, loligo e̱bi ndobi ogoni dege lalimu. k 

13 Tí kamigo mbirali genda yu kayagua Ngode Datagaliwabehondo bi lolene nga. Ani buwa mbirali ibu turu hayagua Ngode Datagaliwabe mini yaraga halu iba gana lolene nga. l  14 Mbirali kamigo warago bayagua ibugua Keriso hameiginiagali ala hene miniwi karu ololene nga. Tigua o biago mini lalu Ngode Datagaliwabehondo bi lalu Anduane Homogo minini howa ibunaga tinginini olibe lininaga weli odo wulene nga. m  15 Tígua Ngode Datagaliwabehondo mini mbiraore wuwa bi larimigome mbirali warago bo wiyago Anduane Homogohanda mo dabi holebira. Ani biragola ibugua ko biyago Ngode Datagaliwabehanda domo wahai holebira. n  16 Wali agali maru kamigo dabi helo ko birimigo hangu hangu lapani hagahaga bialu ti mini lalu Ngode Datagaliwabehondo bi la haga bialu halimu. Mbirali mini tigabiwi kagome Ngode Datagaliwabehondo bi layagua Ngode Datagaliwabehanda hongo tara walia holebira. o  17 Elaya ibu ina kamagobi dege howa ibugua dalu naibilo lalu Ngode Datagaliwabehondo mini dunubia ho howa bi layagola mali tebirani manegonaga ege waragaria dalu naibi gaea biaabo ho wini. p  18 Ani biyagola howa ibugua Ngode Datagaliwabehondo bi lone lalu, Dalu ibila, layagola dalu ibalu dindi bayale halu tomo anda haga bini. q 

19 I̱ hamene mbaliniru-o galone ogo ala manda bilimu. Tí kamigo mbiralime mana henene ngago wahalu poragola mendealime hariga tigabini haru dai biyagua homolene ngagoria pu karia haru dai bulebira. Mana ko biaga karume ko dewa biyago Ngode Datagaliwabehanda domo wahai helo haru dai biyagome ibu biamogo bini. r, s 

Copyright information for `HUI