a12.2Dan 1.8, Esg C18
c12.18Esg 5.4

Jdt 12

Yudidihanda mana bayale binigo ogo

Holoberenesehanda agali biabe biaga hearuhondo lalu, Yudidi anda tamuha tomo nolene beledi silibame wabini ngagoria haru pu berelalimu, lalu lamini. Ani bialu ibugua agali biabe biaga bu hearuhondo lamialu, Tomo bayalebi waini ibabi i̱ni nagane ale maru mo milimu, lalu lamini. Ani layagola Yudidihanda lalu, I̱na tomo uruniale nanolebero. Tomo nolene i̱ni hanalu ibinidaru karulape nolebero. Tígua ngeremigo naruyagua mana ngago puguligonaga nanolebero, lene. a 

Ani layagola Holoberenese ibugua Yudidihondo lamialu lalu, Tomo í̠ni hanaridago nai kegola í̠naga tomo iname agoha ngaria taya buluma̱yadabe. Yuda wali agali mbira ina baba mandagi nahedago agua taya buledabe, lene.

Ani layagola Yudidihanda bi layago ladai bialu lalu, Heneneore i̱na í̠hondo tigatiga langerogo. Anduane Homogohanda i̱ha howa biabe bule ngago bu maro biragola tomo i̱ nolene wiaabo holebira, lene. Ani lalu agali Holoberenese ibunaga biabe biaga hearume Yudidi balai anda mbira heagoha haru piyagola ibu anda ogoniha paleaore mbi hanuni hene. Palialu egabi lolene kaware ngelowa ami agali mamage haga hearu bu heaore heyuwa Yudidihanda Holoberenese hearia bi lama pudaba lowa lalu, I̱ tagira pialu dindi ulini tigabi ngagoha pialu Ngode Datagaliwabehondo bi lole poabe lalu í̠nihondo hale haro laya lalu lamule pudaba, lene. Ani lama piyagola Holoberenese ibugua ami agali hearuhondo lalu, Ibu polebiragoha napobe. Hapai nahe mamage dege baya hangu halimu, lalu lamini. Ai Yudidi ibu horo tebira ami agali balai anda bu heagoha howa mbiraga bibahendengi Bedulia tanonaga dindi ulini wiagoha pialu iba bereagoha wayawaya biaga berene. Wayawaya bai howa ibugua Anduane Homogo Isaraelenaga Ngode Datagaliwabehondo lalu, Isaraele tigua wayali halu waitigi bope helonaga hariga maru mo walia habe, lalu bi lalu berene. Ibu Ngode Datagaliwabenaga deni dodo ko mbira para nahe holenaga biaga mana ngago biaabo halu berene. Ani biai halu ibunaga balai anda kagoha pu biraabo halu alendo tomo nolene tu haragola tagira ibaga berene.
(12.9)Yudidi ibu Ngode Datagaliwabe mitangi nahaga baba hayagome ibu Ngode Datagaliwabenaga deni dodohe berene.


Holoberenesehanda tomo timbuni dawenego ogo

10 Horo maneni hayagola Holoberenesehanda agali ibunaga biabe biagane hearunaga tomo timbuni dawa hene. Anigo agali ami agali haru halu bamba haga maru hearu ti ibalimu nalene. 11 Ani bialu howa Holoberenese ibugua agali mbira ibunaga mbirale wiaru bibahende handaya ho haga mini Bagoasa heagohondo lamialu lalu, Í̠na áyu ogoni puwa Hiburu wali í̠na handaya ho haga biaga tomo ibabi ina haru mandagi nalu i̱naga balai andaha birami̱ya haru halu ibabe. 12 Iname wali ogonibigo ibu heba te lalu mandagi bira nabi howabi ibula mandagi palia nabi howabi bameore biralu pelarimayagua nde ina mege gibiore bialu ina hondo oba holebira, lene.

13 Ani laya handala Bagoasa ibugua Holoberenese berelalu Yudidihondo pene. Ibugua puwa lalu, Wali baya-o í̠naga agali haguane baba bialu tomo nami̱ya ibuleberebe. Ibugua í̠ iba wainiru nalu ina baba turu hagabu birami̱ya hame layago. Ainde í̠na Asiria walirume Kini Nebugadenesa andaga biruwa biagadagua bule íbuore bibe laya, lene.

14 Ani layagola Yudidihanda ladai bialu lalu, I̱ aigo biruwa i̱naga agali haguane kagohondo naibule loabe. I̱na ibalu mbirale bibahende i̱naga agali haguane kago ibugua i̱na buliya hame ledago biai holebero. Ani bialu mbiraga ogoniore embeda nahe manda biaho biraabo howa homalu waholeberoda lo manda bido, lene.

15 Ani laya handala Yudidi ibugua puwa aga bayaleru mo karulalu yári tara tararu bialu bini. Ani bialu heagola wali ibunaga biabe bia haga biagome nogo sibi dongone wiago mo yalu puwa Holoberenese bereago kaware dindiha dunga hene. Nogo sibi dongone ogoni Yudidi ibu tomo nalu biruwa dungaho berelonaga Bagoasahanda minigo ogoni mo yu puwa ogoni ala dungua hene. 16 Ani buwa Yudidi ibu anda ibalu berene. Ani ibiyagola Holoberenese ibunaga bu miniha wali biago dimagoli timbuni halu mandagi paluenaga ladebodebo bialu biraabo hene. Yudidi ibu pigane ibiyangi howa Holoberenesehanda hame lowa mini burugu timbuni lalu mandagi paliba lolenaga hariga taya bialu haabo hene. 17 Ani bialu howa Holoberenese ibugua Yudidihondo lalu, Í̠na waini ibaru abale nalu ina baba turu ho birami̱ya, lene.

18 Ani layagola Yudidi ibugua ladai bialu lalu, Agali haguane-o áyu i̱na iba í̠la mandagi noleberogo irane horo áyu ogoni i̱naga horo timbuniore ngago manda bialu nolebero, lene. c  19 Ani lalu Yudidi ibugua tomobi ibabi wali ibunaga biabe bia haga biagome manda manda biyadaru nalu berene. 20 Ani nalu bereagola Holoberenese ibugua Yudidi de handaya halu hearia dimagoli timbuni tagira ibiyagola ibu waini iba dewaore nagimbu bialu berene. Ibu iba abale nanagadagua dewaore áyu ogoningi nowa mo ko howa lulu yu berene.

Copyright information for `HUI