Jdt 15

Isaraele ti wayali henego ogo

Ami agali maru hearu ti tinaga balai anda heagoha biraga biraga buwa hale halu hemiria Holoberenese homayada layago hale howa tibi nde mogo timbuni lene. Tigua gi howa duru lagalaga bialu ti hayadagua pugu pugu bialu maru dindi ko hari nene wiaruha pialu maru dindi tigabi wiagoha pugu pugu bialu piai damene hene. Ami agali maru Bedulia tano kaware hari bareha hapare howa balai anda bu hayago tibi nde ibida piai hene. Ani biyagola ai Isaraele ami hearu abale daliape halu ti talima pugu pugu bini.

Ani biyagola Usiahanda Bedomasadaimi dindiha bi lo pelalu Bebai dindihabi Koba dindihabi Kola dindihabi Isaraele dindi bibahendeha layago lalimu lene. Ibugua mbirale o biyarunaga te lo pelalu agali ibida poraruni baba wai bialu bibahende bo wahai halimu, lene. Isaraele tigua bi uruni hale howa tigua waitigi baba bibahendeha wai biai hene. Tigua talima pugu pugu bialu Koba dindiha talima puabo halu bibahende bo wahaiore hene. Ai agali Yarusalemeha howabi agali hari bare bareha paliaga hearubi bibahende waitiginaga balai anda bu heagoha biya layaru hale halu tibi íbu ngoai hene. Ai Isaraele agali Gileada dindiha hearumebi Galiliha hearumebi bibahendeme tinaga waitigi Asiria ami agali pora bialu ibida pole piyaru baya hangu ho hagira buwa bo wahaiore hene. Tigua talima pugu pugu bialu Damasagasa tano wiagoria tagira pialu uyuraore puabo hene.

Wali agali Bedulia tanoha hearume Asiria ami agali balai anda bu hene biagoha puwa ami agali biarume mbirale bayale ngelo wahalu pene wiaru mo yini. Tigua dabudabu dewaore mo yalu tanoha dai bini. Isaraele agali biarume Asiria ami biaru baba wai biai halu dai buwa tibi balai anda bu hene biagoha puwa dabudabu dewaore wiaria mo hilu yini. Dabudabu baya tara tara Asiria ami agali balai anda bu hene biagoha wiagola wali agali hari bare bare paliaga hearubi dindi uliniha paliaga hearubi bibahende ibalu mo hilu ya dege bini.

Isaraele wali agalirume Yudidi ibu wali mini lene lai hene.

(Be 15.8—16.25)

Isaraele wali agali turu henego ogo

Agali loma binigo mo miaga haguane Yoagimi bi Isaraele wali agalinaga agali haguane bu hearubi bibahende Yarusaleme wahalu Ngode Datagaliwabehanda mbirale bayale Isaraele wali agali biamogo bialu biya layaru hondole pene. Ani bialu tigua Yudidi mo turu hole ibalu bini. Ani pialu agali uruni tigua Yudidi ngola howa bibahendeme ibunaga mini yaraga halu lalu, Í̠na Yarusalemenaga mini mo yaraga halu daligaho ngelarida. Í̠ Isaraele wali duniniore mbira mini lene bedegoni. Iname í̠naga mini yaraga harama. 10 Mbirale uruni bibahende í̠ni hangumeore bidegoni. Í̠na dege Isaraele lone mo wayali harida. Ani bialu Ngode Datagaliwabehandabi í̠na biabe ogoni biridago hondowa turu timbuni ka. Ngode Datagaliwabe Bibahendenaga Hongo Haihe kagome í̠ mo turu haabo helo larogo. Heneneore laro.

11 Horo pira tebirani (30) Isaraele wali agalime dabudabu Asiria ami biarume balai anda bu hayagoria yu wahalu piyago mo yu tone bialu hene. Ainde dabudabu Holoberenesenaga damenego bibahende balai andabi ndisi be belediru silibame wabini wiarubi dagia paliaga wiagobi gabo be wiagobi dagia wiagobi biragane dagia wiagobi maruale wiarubi bibahende mo yai hene. Ani bialu Yudidihanda mbirale uruni mo kabu bigi buwa ibunaga nogo dongi erekunini mo paga halu ibugua garo nogo hosime gililagane mo manda manda bu ngelowa mbirale uruni mo paga howa gililo yalu tini dalu hari nene biagoha irigi hene. 12 Isaraele wali bibahendeme Yudidi hondole ibai ho hene. Tigua ibu mini leneore beda lowa ibunaga mini yaraga halu marume ibu mani ibilo ti turu halu mali lima bamba hene. Yudidihanda ira yuni bu yuwa maru ibu heba pirimigo mini. 13 Ibunibi wali maru ibu heba piyarubi tigua ira olibe magane yuni heaore mabu buwa tinaga emboneni tangi mo karulene. Ani bialu tigua iba gana lalu mali lima piyadagoha íbu lu bamba hene. Ani biyagola Isaraele ami agali tigua danda timu yandarebi wai biaga ale yai howa ira yunirume tinaga emboneni yári biai halu turu holenenaga iba ganaru lama walini piyadagua mama pene.

Copyright information for `HUI