a7.51 Mag 12.28-29

Jdt 7

Holoberenese halu ibunaga ami agali biarume Bedulia tano ho hagira binigo ogo

Horo mendengi Holoberenese ibugua ibunaga ami agali hearubi ami agali tara ibu biamogo bialu wai mogo ibini hayarubi bibahendehondo ogodagua bidaba lalu wai hono miai hene. Tihondo lalu, Tígua egerebagi gao laragola abale heyalu puwa Bedulia tano ho hagira bialu hariga uyura hari neneha irigi halu piaga ngago hapai howa tanoha Isaraele wali agali baba wai bilimu, lene. Horo ogoningi dege ami agali uruni ti heyalu abale pene. Ami agali geni piaga bibahende daosini dege handari mbirani pira karia (170,000) bibahende hene. Ami agali nogo hosi erekunini biruwa wai biagaru daosini homberia (12,000) hene. Ani bialu ami agali dewaore nu dabudabu wiaru yilo helene. Uruni bibahende biamaga hayagola daga labe naheore hene. Tigua puwa Bedulia tano wiagonaga dindi ulini iba hambiaga bereagoria balai anda bini. Tigua anda bu henedago timbuniorenaga arane mendehayagi Bedulia tano howa pialu amuraore Siamono wiagoria tagira pene. Mendehayagi nde Dodana tano ngagoria howa bima pialu Balabaimi ngagoria tagira pene. Siamono ogoni Yaserili tanohayagi handa dai biaga wini.

Isaraele tigua ami agali daga labe nahe dewaore íbu heago hondowa ti gi timbuniore ho howa tini dege dege ladene bialu lalu, Ami agali dewaore kagome tomo ngago damene bibahende nai holobada. Hari timbuni wedarubi dindi tigabi ngarubi hari emene wedarubi tinaga genda nayulubada, lene. Ani lalu agali mbira mbira bibahendeme wai bulene ale yagayaga bialu pabe neneni mamage haga anda heagoria ira delowa mamage halu egabi lene. a  Ani bialu egerebagi Holoberenesehanda ami agali nogo hosini biruwa wai biaga hearu bibahende dindi tigabi hamama bayale wiagoria haru tagira ibuwa wai dagia bayago Isaraele wali agali Bedulia tanoha hearume hari bare wiagoria howa handabe halu hendene. Ibugua tanoha hariga irigi halu polene wiago baya hangu handalu iba hambiaga uli wiarubi baya hanguore deme handaiore hene. Iba hambiaga uli wiaru bibahendeore ibu karulai howa ibunaga ami agalirume mamage howa handaya ho helalu ibunaga balai anda hayadagoha dai bini.

Ani biyagola Idomo agali haguane hearubi Moaba agali haguane hearubi wali agali iba solowara bedago ange ange paluyu pedarunaga agali haguane hearubi bibahende Holoberenese hearia ibuwa tigua ibuhondo lamialu lalu, Agali haguane-o í̠na mini iname ngemago taliriyagua nde í̠naga ami agali karuni bai naholebira. 10 Isaraele tinaga hongo holene danda timuha nawi hari bare timbuni ngagoha ngelo ka. Ani laramago irane áyu hari bare ngagoha irigi halu wali agali ti kagoha anda polene nakarulape kemagoni ndobe. 11 Anigo agali haguane-o í̠na wai tiga tiga nabiriyagua í̠naga ami agali maru bo biba holebira. 12 Wahalu í̠naga ami agaliru haru howa tinaga balai anda kagoria hondo holene nga. Anigo agali í̠naga biabe biaga karume iba hambiaga uli hari teneha ngaru dege baya hangu mamage howa handaya ho holene nga. 13 Ani laramago irane wali agali Bedulia tanoha karu ti iba ogoniha dege hambu ibagaya. Tigua iba noahalu homabehe ngagola tinaga tano ngago inanaga giha ya holebira. Inanaga agali karu heba iname hari nene ngago irigi howa balai anda kaware biapara howa wali agali maru ibida tagira poligonaga mamage hole poloma̱ya. 14 Wali agalibi waneiginibi bibahende hina garime homai holebira. Iname bo polene henge nawi. Tini minana homalu tinaga tingini hariga tene ngaruha homo wima polebira. 15 Tigua í̠naga bi mo wahalu tini í̠naga giha ya nahayagonaga pani ogoni, lene.

16 Ani layagola Holoberenese halu ibunaga ami agali haru haga bu hearu tigua hariga ogoni bayaleoreda lowa tini lo mbira halu tigua, Agali maru mamage hole pudaba, lene. 17 Ani laya handala Moaba ami agali hearu heba Asiria ami daosini duria heba (5,000) ti haru mandagi hole pene. Tigua puwa balai anda hari tene wiagoria bialu Isaraele wali agali iba hambu piaga hariga wiagoria hapai hene. 18 Ani helalu Idomo amibi Amono amibi tigua hari bare wiagoria Dodana tano handabe howa balai anda bu hene. Ani bialu maru dindi abene unurahayagi pelalu maru amu ni tagira ibiragohayagi iba Mogomu poragoha dindi mini Kusi dindi kawareni Agaraba tano ngagoha hole pelene. Asiria tini dindi tigabi bayale wiagoria balai anda bu hene. Ti dindi ogoniha wiago bibahendeni haiore hene. Tinaga balai anda heagobi tinaga dabu dabu wialubi bibahende daga labe nahe dewaore wini.

Isaraele tigua tinaga agali haguane hearuhondo keba halu lai lenego ogo

19 Isaraele wali agali ti waitigime ho hagira biyagola tigua ibida pora bialu polene hariga nawiore howa mogo timbuni lalu gi howa tigua Ngode Datagaliwabe tinaga Anduane Homogo olalu ti biamogo bia lowa bi lalu hene. 20 Asiria ami agali hearume ami agali damene hearubi ami agali nogo hosini biruwa wai biaga hearubi garo nogo hosime gililagani heyu howa wai biaga hearubi bibahendeme Isaraele wali agali ho hagira bu heane dege horo pira tebirani maria (34) hene. Ani heagola Bedulia tano wali agalinaga iba be todobene wiaruha iba nabere bameore wiai hene. 21 Ani bialu tanoha iba hambiaga uli wiarubi iba nabere iba biba hai habeheore wini. Ani biyagola tigua horo mbira mbiranaga iba emene ogoni tale bigi bialu wali agali bibahende nai helo manda bialu tale bigi bialu hene. 22 Ainde waneigini galiru mo ko halu homabehe wiai hene. Ani bialu wali berearubi igiri daliahe hearubi bibahende de mborere bialu hariga timbuni pearuhabi tanonaga wai pabe heagonaga pabe panga heago kawarenibi odopeho wima pene. Ani bialu ti hongo naheore wini.

23 Anidagua biyagola wali agali bibahende bu hearubi waneigini bu hearubi bibahende ibalu Usia halu agali haguane biaru bereagoria ho mabu bu howa bi hongo howa ladagadaga bialu lai lalu hene. Tigua lalu, 24 Ngode Datagaliwabe ibunime tinaga miniha ngemigobi inanaga miniha ngemagobi mo tale bulebira. Ai tígua Asiria ami bialu baba bi lalu mo palia holene wiago waharimigome ko timbuniore inahondo birimi. 25 Áyuore ina pele ngulene mbira naheore. Ngode Datagaliwabehanda ina waitiginaga giha minu ya hayagoni ndobe. Ami agalirume tanoha anda ibuwa handalu karia ina bibahende iba noa howa homai halu tingini dindini wima pedaria hondolobada. 26 Ainde wahalu Holoberenesenaga ami agali biaru heba ami agali marubi tanoha ibidaba lowa tano bibahende ti mialu mbirale tanoha ngarubi mo ko halu mo page yai hole ibidaba lalu oladaba. 27 Ina garabaya hangu biragola garabaya biabe ale bia haga howa biabe bialu holene karulape wialu ina abale homolenego nakarulapeda. Iname ogonidagua birimayagua nde ina homa nabi holeberema. Ina waneigini gali bu karu homaragola inane de hondolene nakarulapebi ani bialu walibi waneiginibi mo ko heneore bedago hondolene nakarulapeore holobada. 28 Iname heneneore laramago ai Ngode Datagaliwabe ibunime ti maname mo daba ki bulene karulape. Ibuni Ngode Datagaliwabe ina mamalirunaga Anduane Homogo kago ibugua mana ko iname bialu kemagonaga pani ngialu inanaga mamalirume ko biyagonaga pani ngia dege biaga kago ainde mbirale ko uruni inaha anda naibilo ibunihondo bi lama, lene.

29 Ani lowa wali agali bu hearu bibahendeme dugu bialu bi hongo howa ladaga halu Ngode Datagaliwabe tinaga Anduane Homogo kagohondo bi lalu hene. 30 Ani lalu heagola Usia ibugua tihondo lamialu lalu, Hameneru-o áyu tígua hongo ho ala holene karulape nga. Abale gede holene nawigo harugo lowa horo duriane agima hondo hami̱ya. Horo ogoningi Ngode Datagaliwabe inanaga Anduane Homogo kagome ina wahalu napolebirago harugo lowa malia howa holene nga. 31 Ai horo dauru ogoni piai haragola ina mo wialu biamogo bulene mbira nawiyagua nde tígua laramigonidagua bimi̱ya, lene. Ani lalu Usiahanda wali agali uruni tini biabe bialu hagadaruha hole pudaba lene. Agali ti wai pabe neneni mamage agalirunaga anda mamage helo biama irigi hene hearuha hole pudaba lalu, Wali waneiginiru tí nde tíni andaga dai bidaba, lene. Anigo tano ogoniha wali agali bu hearunaga bu miniha genda timbuni ngelo hene.

32 

Yudidihanda waitigi giha howa ibunaga wali agali mo wialu haru dai bini

(Be 8.1—15.7)

Copyright information for `HUI