a32.12 Kin 25.1-7
c32.17Pig 18.14, 2 Kin 19.15, Lg 1.37
d32.19Yob 34.21, Iba 33.13, Ais 28.29
e32.27Dag 16.22, Yar 32.17
f32.282 Kin 25.1-11, 2 Bit 36.17-21
g32.33Yar 2.27, 7.13, 7.24
h32.342 Kin 23.10, Yar 7.30-31, 19.1-6
i32.35LBM 18.21, 2 Kin 23.10, Yar 7.31
j32.37Man 30.3, Yar 23.6, Ese 37.21
k32.38Yar 30.22, 31.33
l32.40Ais 55.13, Yar 31.31-33

Jeremiah 32

Yaremaiahanda dindi mbira wiago ibu yolo binigo ogo

Sedegaia ibu Yuda dindiha kini heane mali pini hayagola Anduane Homogohanda Yaremaiahondo bi ogo lamini. Babilononaga Kini Nebugadenesa ibubi nde kini heane dege mali pira mbirani halini hayagola (18) Anduane Homogohanda bi ogo Yaremaia lamini. a  Ogoningi Babilono ami agali hearume Yarusaleme tano ho hagirabu heagola bi mana latagi haga agali Yaremaia ibu kininaga anda tagirahayagi Yarusaleme ami agaliru ti haga wiagoria ibu garabaya hene. Yaremaiahanda mbiwia halu Anduane Homogonaga bi mana latagi halu lalu, Anduane Homogohanda agua laya. Heneneore larogo i̱na Babilono kini kagome tano ogo karulelo yupe holebero. Ani berogola Babilono ami ibiragola Sedegaia ibu yo pialu napolebira. Anduane Homogo i̱na Kini Sedegaiaore Babilono kini kagome minilo yupe harogola Sedegaia ibugua Kini Nebugadenesa wanakuihayagi heyu howa ibuhondo bi hale haga birago ladai bialu holebira. Ani bialu Nebugadenesahanda Sedegaia Babilono dindiha garabayabu yalu polebira. Ani pu kane dege i̱na ti lone mitangi bulene horo manda bu harudago tagira ibilo holebero. Ani berogola tigua Babilono baba wai biyagua ti wayali naholebira. I̱ Anduane Homogo i̱na bi o ledogoniore, laya, lene. Sedegaia ibu bi ogoni hale howa ibugua Yaremaiahondo keba halu lalu, Í̠na bi ogoni aiwa langiyagola mbiwia howa latagi halu kebe, lowa Kini Sedegaiahanda Yaremaia garabayabu haabo helene.

Yaremaia ibugua lalu, I̱ garabaya andaha hewangi Anduane Homogohanda i̱hondo bi ogodagua laya. Hale kebe. Í̠ aba hamene heyogone Salumu igini Hanamele ibu í̠ keria ibulebira. Ani ibuwa ibugua í̠hondo dindi mbira Anadodo tano ngagoria ibunaga ngago ogoni í̠na yolo bia lolebira. Í̠ ibu aba hamene howa dindi ogoni í̠na yolo bulene karulape kego manda bialu ani lolebira.
(32.7)Loma Binigo mbuga lowinigo ngago ogoha Be 25.25 gilibu ngago handabe.
Ani lole ibulebira lalu Anduane Homogohanda langiyadagua Hanamele ibu ami agali ti hagahayagi i̱ garabaya hewaria hondo ibalu Hanamele ibugua i̱hondo lalu, Í̠ i̱ hameneore howa í̠naore bibehe kego manda bialu i̱naga dindi mbira Beniyamini hameigini daluha Anadodo tano kawareni wiwago yolo bibelo hameledo. Dindi ogoni í̠ninagaore ngelo yolo bia, lene. Hanamele ibugua bi o layadagoni hale howa Anduane Homogohanda i̱na ani buliya hamelayada lo manda biru. Ani manda buwa agali maru bu hearu hendeaore i̱na dindi ogoni henene yolo bule lalu habo nalolene bi gilibu wialu i̱ninaga gi magi wiru. Ani buwa i̱na muni siliba genda magi handari kira (200) handalu dindi ogoninaga yolo Hanamele miru. 11 I̱na beba kirani dindi ogoninaga habo nalolene bi gili binigo bi uruni mbira mo habo nalole lalu lo mbira haribadago gilibu wiru. Beba ogoni paulo ndibu lalu mendego bame ngelaru. 12 Ani bialu beba kira ogoni i̱na agali mbira Mahasea aguane Neria igini Baruguhondo miru. I̱na dindi ogoni yolo bule bialu hewago agali maru bu hearume de handaya. I̱ hamene Hanamelebi agali maru beba tinaga mini gilibu wiyarubi Yudali dindi ogoniha hearubi ti bibahendeme dindi ogoni yolo bule bialu hewago de handai haya. 13 Agali uruni tigua handayaho heaore dege i̱na Baruguhondo lamialu lalu, 14 Anduane Homogo Hongo Haiheore Isaraele wali agalinaga Ngode Datagaliwabe kago ibugua ogodagua lalu, Barugu í̠na beba kira dindi yolo bini lalu bi lo winidagoni mende ndibuleda mende ndibu naleda ogonilabo í̠na yamialu be dindime wabini ngagoha ko nahe bayale lu wiaabo helonaga mo do habe. 15 Ani larogo irane Anduane Homogo Hongo Haiheore Isaraele wali agalinaga Ngode Datagaliwabe kago ibugua lalu, Mani howa dindi andabigerebi maburubi bibahende dindi ogoriani ngago lone yolo bulene wulebira, layagonaga i̱na ani gilibu wiru.

Yaremaiahanda Anduane Homogohondo bi lenego ogo

16 I̱ Yaremaia i̱na Neria igini Baruguhondo beba habo nalolene bi gilibu wini biago mo muwa i̱na Anduane Homogohondo bi ogodagua laru, 17 Anduane Homogo Bibahende Haru Haame Ho Haga-o í̠ninaga hongo timbuniore ho kegome dindi harila wabiniyago í̠na bibe nahe mbira nawiore. c  18 Wali agali bibahende dara hai haga howa í̠na mbiralime ko biragonaga dege tinibi tinaga waneigini aguane karubi bibahende pani nelo miaga kegoni. Ngode Datagaliwabe í̠ hangu dunini bolanguahebi hongoheorebi í̠naga mini Anduane Homogo Hongo Haiheore kegoni. 19 Í̠na bayale bulenego dege manda bialu haga ke. Í̠ hongo gibihe howa mbirale timbuni gibiore ngaru í̠na biai haga ke. Wali agali bibahendeme bialu karuni handai ho haga kegoni. Í̠na mana tinime bialu karu hondowa tini biyadagua pani karulape nelo talebu ta haga ke. d  20 Bamba í̠na Iyibi dindini nahendene ale dewa birigoni. Áyubi nde í̠na Isaraele wali agali bu kamagohabi wali agali dindi tara tarani bu karuhabi nahendene ale bialu haabo haga kegoni. Ani bialu kegonaga wali agali bu karu bibahendeme í̠ mini leneore kegoni lai haga ka. 21 Í̠ninaga hongo timbuniore hegome í̠na agalime nabiagane ale hongohe tara tara mogole hiriribi wiaru bialu Iyibi wali agaliru mo gi bia hari. Anidagua birigome í̠na Isaraele hameigini í̠naga wali agali haru tagira pialu ogoria holomaya haru ibiri. 22 Ani haru ibuwa í̠nime bamba inanaga mamaliruhondo dindi ogo inahondo ngulebero lalu bi lo wiridagua ina mo ngiri. Dindi ogo bene bere mbirale bayale anda hai holene wiago ina ngiri. 23 Ina dindi ogoriani karulole íbu howa iname í̠naga bi larigo hale nahe howa mana inahondo langirigobi nabi mo wahalu pugualu harimagoni. Iname anidagua birimagola í̠na inaha mo ko holene uruni ibilaga biriyagoni.

24 Áyu nde Babilono amime Yarusaleme ho hagira bu yaanda howa ina baba wai bialu kagoni. Tigua tano karulolenaga tini heyu howa wai bule lowa tanonaga pabe tagirahayagi dindi dugu hono wima irigi halu kagoni. Waitigi urunime ina ho hagira bu yaanda howa ina baba wai bialu kagola ina hina gari timbuni bialu warago ko timbuni balu haabo kama. Anidagua bidagome Babilonoali tigua Yarusaleme karularagoni. Mbirale tagira ibulebira lalu bi lo wirigoni áyu tagira ibirago í̠ de hendedegoni ndobe. 25 Heneneore Babilonome tano ogo karularagoni. Anigo Anduane Homogo Bibahende Haru Haame Ho Haga-o í̠nime i̱hondo langialu i̱na dindi ogo yolo bialu agalime habo nalolene bi lo wirugoria gi magi wia larigo ndobe, lalu Yaremaiahanda Anduane Homogohondo bi ogoni lene.

26 Ani layagola Anduane Homogohanda Yaremaia lamialu lalu, 27 I̱ni Anduane Homogo wali agali bibahendenaga Ngode Datagaliwabeore kogoni. Mbirale mbira i̱na nabibehego nawiore. e  28 Anigo Anduane Homogo i̱na dindi ogo Kini Nebugadenesabi Babilononaga ami agali Kaladia hameigini urunibi ti mo merogoni ndobe. Tigua tano ogoni karulalu f  29 irame bo heda holebira. Yuda wali agali tigua anda daliga danginihayagi iraga howa dama mitangi bialu mbirale gime wabini mini Bala wiagonaga mini yaraga halu ibuhondo ira hagua ngabi miniinisenesiru lomabu delaluwaini ibabi odo loma birimigobi bo heda hai holebira. Tigua urunibi bialu hayagome i̱ mo keba timbuni hayagoni. 30 Yuda wali agalibi Isaraele wali agalibi ti piganeore hemingi howa tigua mana ko dege bima ibalu haabo henego kagoni ndobe. I̱ Anduane Homogo kogome i̱na tigatigaore larogo horo bibahendengi tinaga mana ko ogonime i̱ mo keba halu haabo ka. 31 Yarusaleme tano ogoni pigane biyangi howa Yarusaleme wali agalime i̱ mo keba hama ibalu haabo henego ka. Ani biyagonaga tano ogoni i̱ lone de nahondoleorego i̱na bo gialabaga biai holebero. 32 Yuda wali agalibi Isaraele wali agalibi tigua i̱ mo keba holenaga mana ko tara tara wiaru bialu haabo harimi. Wali agali bu hearubi kini bu hearubi agali haguane bu hearubiloma binigo mo miaga hearubi mbiwia halu bi manalatagi haga hearubi ti bibahendeoreme mana ko dege bialu haya. 33 Tigua i̱hondo erembira ngialu i̱ koriabi naibagaore hene. I̱na tihondo lawai haabo harugola tigua i̱naga bi hale habe manga howa i̱na ti mo tiga buliya naibagaore. g  34 Ani howa Isaraele wali agali tigua i̱ mitangi bialu lotu lalu helonaga anda helarugoha tigua dama mitangi bialu mbirale gime wabini ko ngubiore wiaru mo wu haya. Tigua ogonidagua biyagome i̱naga anda ogoni mebia haya. h  35 Ani bialu dindi ulini Hinomo wiagoha dama mitangi bialu bi pupu wiaga mini Balanaga dindi mo ngelaya. Ani mo ngelowa dama mini Molegehondo tini waneigini bo lomabu migi bialu haya. Anigo i̱na tihondo ogoniale bilimu lalu mbira nale haru. Tigua mana ko ngubi uruniale bialu Yuda wali agalimebi ko bilo mo bia holobada lo manda nabiore henego ko, laya lene. i 

Anduane Homogohanda ibunaga wali agalihondo bayale bulebero lenego ogo

36 Anduane Homogo Isaraele wali agalinaga Ngode Datagaliwabe kagome i̱hondo au laya. Yaremaia-o wali agalime ogodagua lalu ka. Waitigime ina baba wai bule ibirago ai hina gari timbunibi tagira ibalu warago ko tara ngagomebi ina minaragoni. Anidagua bialu helowa Anduane Homogohanda tano ogoni Babilono kini kagome ibalu karulelo waholebira, lalu kagoni. Anigo i̱na tano ogoni mitangi halu bi mende larogo hale habe. 37 I̱na heneneore buleberogo ogo. I̱naga bu miniha keba ho hewangi i̱na wali agali bibahende bo talia togo larugola ti dindi tara tara wiaruha pugu pugu binigo ai lone haru dai biai holebero. Ani haru dai bialu ti bayaleore helo dindi ogoria helolebero. j  38 Ani daibu helowa i̱ tinaga Ngode Datagaliwabe kogola ti nde i̱naga wali agaliore holebira. k  39 Tigua mini dewa nawilo i̱na tinaga mini mo mbiraore harogola ti hariga mbiraore degeni pialu holebira. Tigua i̱ni andaneha haabo haragola i̱na tibi tinaga waneigini aguanene mani holebirarubi uruni bibahende mo bayale hai ho helolebero. 40 Ani bialu i̱na ti baba habo nalolene bi gahenge lo wulebero. Ani berogola habo nalolene bi gahenge ogoni ereba nahe wiaabo holebira. Tihondo mana bayale bialu i̱na ti mo bayale ho helaga mana wirugoni wa nahole lalu habo nalolene bi ogoni lo wulebero. Tigua i̱ helo wahalu lone napelobi i̱ni andaneha haabo helobi i̱na mini bayale tihondo talebu mulebero. l  41 Ani bialu i̱na tihondo bayale dege biaabo holebero. I̱naga minimebi gubalinimebi tihondo turu timbuni halu ti dindi ogoriani bayale haabo helo mo bayale ho helolebero.

42 Anduane Homogo i̱na bi laabo halu ogodagua laro. Pigane i̱na tiha genda tandaga tara tara wiaru ibilarugoni. Anigo áyu i̱na tihondo bulebero lalu lo wirudagua ti bayale helo mbirale bayale holene hangu mo wia holebero. 43 Wali agali karu tigua bi ogodagua larago, Anduane Homogo ibugua dindi ogo Babilono mo miyagome dindi bibahendeore mo ko hai halu wali agalibi nogo biangobi mbira muninibu naheore ngagoni ndobe, laga ka. Anigo Anduane Homogo i̱na ogodagua laro. Mani Yuda wali agali ti tini dalu ogoniha lone daibu howa tinaga dindi ngaru maru muni mia marume munime dindi yolo bia bialu holebira. 44 Dindi ogoni heneneore yolo bini lalu habo nalolene bi lo wiragoria gi magihe wulebira. Ani bialu wali agali dewalinaga deni howa muni aba dindi abalame henene dobo berabagoni lalu bi gilibu wulebira. Tigua Beniyamini hameigini dindi ngagoria dindi yolo bialu Yarusaleme kawareni anda emene emene bu karuhabi yolo bialu Yuda dindiha tano maru ngaruhabi dindi hari bare bare wuyu pedaruhabi Yuda dindinaga abene unurayagibi ni paliragohayagi dindi hombene baragahe wima pedaruhabi dindi uruni bibahendeha muni mia munime dindi yolo bia bulebira. I̱na ti dindi ogoriani haru dai buwa mo bayale harogome ti turu halu ani bulebira. I̱ Anduane Homogo i̱na bi o ledogoniore, laya lalu Yaremaiahanda lene.

Copyright information for `HUI