a2.2Har 10.14, Amo 5.18-20
b2.4-5Mo 9.7-9
c2.10Mo 8.12
d2.11Mo 6.17
e2.13Har 34.6-7, 2Sml 1.11, Iba 86.5, 86.15, Yna 4.2
f2.25Yol 1.4
g2.27Ais 45.5, Ese 37.26-28, 39.22, 39.28, Yol 3.17
h2.28Seg 12.10, Yo 7.39
i2.28-32Ab 2.17-21
j2.291 Ko 12.13, Ga 3.28, Kl 3.11
k2.30Md 24.29, Mg 13.24, Lg 21.11, 21.25
l2.31Ais 13.9-10, Mal 4.5, Md 24.29, Mg 13.24-25, Lg 21.25, Mo 6.12-13
m2.32Ais 11.11, 11.16, Oba 17, Mai 4.7, Lm 9.27, 10.13, 11.26

Joel 2

Anduane Homagonaga Horo ogobi ibulebira lalu manane pagaya ale ibinigo ogo

Anduane Homogohanda Horo pongo bo winigo abaleore ibiragoni.
Ani bidago tígua Hari Saiono biagoriani puwa mbelo mini biguli pu ladaba.
Ngode Datagaliwabenaga hari loma bia hene ngagoria mbelo bolene nga.
Horo ogoningi Yuda wali agali ti bibahendeore gi howa duru laga bialu holene nga.
Anduane Homogonaga Horo ogoni tagira ibirangiore ko arumahe mbira ngagola dara holene wulebira. a 
Horo ogoningi ginu hagua mindibime bu dambi holebira.
Ani biragola pagaya ale biarunime hari nene ngarunaga abale tidu yalu egerebagi ni tagira ibiralidagua bialu ami agali ibiradagua bialubi tagira ibulebira.
Áyu biragoni ale nabinigo manibi nde nabulebira.

Ani ibuwa dangiha bo daralidagua tomobi datani karubi abaleore nai haragoni.
Ti ge napeni ngaruha Idene mabu ale baya taraore ngagoni.
Ti anda pialu nai hene ngaruha mbirale bibahendenaga yuni damene nai kagola dindi yobi hangu ona taulodaga ho ngagoni.
Pagaya ale urunime mbirale yuni lenego mbira yu wanahe naiore holebira.
Pagaya ale ibiraruni nogo hosi handalehe ibiragoni. b 
Ti wai biaga ami agalinaga hosi ibiradagua ibiragoni.
Ti hari bare ege to̱le̱ ngarunaga poragola wai biagane garo ale nogo hosime gililaga mini karisi pora biagadagua bialu dangi gabuni yobu wahe ngaruha bo daragola tilitola lalu lirilere laralidagua laragoni.
Ti naina tidu yalu ibiraha ami agali wai bule ibiralidagua ibiragoni.
Ani bialu kaware hapara halu ibirago hondowa wali agalime gi taraore halu amburiho howa hiririho wima peda.
Pagaya ale biaruni abale ibalu ami agalime biagadagua tanonaga pabe karunaga iraga iraga bialu ka.
Iralu mendehayagi dalialu puwa ami agalime tidu yalu piagadagua tidu yalu mandagi duguni pialu howa maru putara halu nape mandagi duguniore pialu ka.
Maru ti polene ngagoha pu pugua nabiaga.
Pabe karu gialalu anda poragola mbiralime harigani hapai habe nahe.
Tigua tano ngarunaga gerai anda puwa pabe karu pora bialu anda pialu tano tamuha anda piaga.
Ani anda puwa wali agali andaga karunaga windoha pagealime anda poralidagua bialu tamuha anda pugu bira.

10 Ti pialu kagola dindi harila ema biaga. c 
Ni egela aruma halu yakundibi wá nahaga.
11 Anduane Homogohanda ibunaga ami olaragola tinaga bi hari kulu laradagua laga. d 
Ani laragola ami agali hongohe dewaoreme ibunaga bi larago hale halu ibugua bia laradagua biaga.
Ayaliore-o Anduane Homogonaga Horo ogoningi mo ko holene timbu gibiore tagira ibulebirago mbirali ogoni lola nahe yopialu ai ibu polobadabe.

Anduane Homogohanda wali agalihondo, Mini beregedalimu, lenego ogo

12 Anduane Homogohanda lalu,
Aniore biai holebirago ai tígua heneneore mini beregedalu i̱ni kogoha dai biai hadaba.
Tíguatomo nane wahalu ko birimigonaga dara howa dugu bima i̱ni koria dai bidaba.
13 Ko birimigonaga darahe tingi howa ke̱ halu aga bidamiru bame budulene nakarulape. e 
Ani ndo tínaga bu miniha howa ko birimigonaga dara heneneore halimu, lene.

Anduane Homogo tínaga Ngode Datagaliwabe karia dai bulene nga.
Ibuha dara holene to̱laihe howa tíhondo mana bayale ngadagua dege biaga kagoni.
Ibugua inaore gubalini ho howa bibahendengi inahondo mana tigabi bulene ngaru dege biaabo halu haga kagoni.
Bibahendengi ibugua ina mana lalu pani ngulene hame lowa ha ndo ibugua iname ko birimaru domo waholene hamelo ka.
14 Anigo tígua Anduane Homogo tínaga Ngode Datagaliwabe karia dai birimiyagua nde ibugua halu mende mitangi bialu tíhondo bayale bialu tomo dewa lone mo anda holebira.
Ani biragola nde iname tomoruwaini ibarubi ibuhondo lomabu mulene karulapeore yu holeberama.
15 Hari Saiono neneni howa mbelo biguli pu lolene nga.
Tí bibahende tomo nane tí íbu ngoai holene nga, lalu wali agali lamilimu.
16 Wali agali dewaliore olalu mo ngoai howa Anduane Homogohondo mitangi bialu ibuhondo lotu lolenaga manda manda bilimu, lalu lamilimu.
Wali agali wahebi wandari igiribi waneigini gali wene andu nalu bedarubi bibahendeore íbu ngoai hadaba, lalimu.
Wandari igiri wene dabu bu hene heaguabi uruni bibahende tini andaga yu wahalu ibaiore holene nga, lalimu.
17 Loma binigo mo miaga karu tibi nde Anduane Homogonaga anda tamuha biabe biahagaru tigua anda harabani lomabu delaga dabu ngago hengeneni howa dugu bialu bi ogodagua lolene nga.
Anduane Homogo-o í̠naga wali agali kamaru dara habe.
Wali agali hameigini dindi tara tara howa íbu karu tigua ina erembira ngialu mege bialu lalu, Tínaga Ngode Datagaliwabe agoha kabe, loligo ina biamogo bia lolene nga,
lalu Yoelehanda lene.

Anduane Homogohanda tomo mo anda ho helenego ogo

18 Anduane Homogohanda wali agalime mini beregedayago hondowa ibunaga dindi mitangi halu ibunaga wali agali dara howa biamogo bini.
19 Ibugua tihondo lalu,
Áyu ina tomo dewabi waini iba dewabi olibe lini ibane dewabi tíhondo ngerogola tomo nolene dewaore nalu holeberami.
Ani berogola wali agali hameigini dindi tara taraha bu karume tí erembira nangulebira.
20 Pagaya ale unurayagi howa ibini bedaruni bibahende ti i̱na wara pelalu maru dindi ko dalu naibaga ngagoha wara pelolebero.
Wabuni mbira ala íbu berene bedaru ti iba solowara mini Homene Iba bedagoha warape halu maru mani íbu bedaru ti iba solowara mini Medidereniana bedagoha warape holebero.
Maru biru wahene bedaru homaragola ngu taraore bulebira.
Pagaya ale biarume tíhondo ko biyagonaga i̱na ti pani mulebero.

21 Dindi-o í̠ gi nahabe.
Áyu í̠ miniha hadape howa turu howa dungulo holene nga. Irane Anduane Homogo i̱ni kogome biamogo birudagonaga ani bulene nga.
22 Ema bialu piaga biru kamiru-o
Datani dewaore lone anda haragoni ti gi nahalimu.
Ira lini daga karume lini dewa dalu pogerubi pu mbira minigerebirubi lini dewaore deda.

23 Wali agali Saiononi kamiru-o
Anduane Homogo tínaga Ngode Datagaliwabe i̱na tí biamogo timbuniore bialu harugonaga turu halu dungulo hadaba.
Tígua tomo hongolene tu hayangibi ege pigane hayangibi tomo anda helonaga iba dalu karulapeore ibilarugoni.
24 Widi gandulo yu mogo buwa iraneru yuniru bu wahaga ngagoria widi lini dewa ibira heneru bu paya paya bu wulebira.
Ani bialu gerebi lini pingidagane uli wene ngaruha hengedalu pingidaragola ibane dewaore biru to̱lowa pugula tagi tagi bialu holebira. Oilbe linibi dambiragola ibane dewaore biru to̱lowa pugula tagi tagi bialu holebira.
25 I̱nime pagaya ale uruni ti ami agali ibiradagua ibilarurume tínaga tomo hengemiruni bibahende nai helarugo ai mali dewa niruniha howa nalu hayarunaga áyu ngia dai biai holebero. f 
26 Tomo nolene dewaore wu kamigola to̱latagiore holebira.
Ani howa tíhondo bayale bialu harugonaga i̱hondo turu halu Anduane Homogo tínaga Ngode Datagaliwabe i̱ kogo i̱naga mini yaraga halu holeberami.
Ani bialu kamigola wali agali dindi tara taraha haga karume Yuda tí handape naholebira.
Ani biragola i̱naga wali agali kamiruni tí lone taga naholeberami.
27 Ani biragola Isaraele wali agaliru-o tígua i̱ni tí kamigoha mandagi ho kogoni manda bialu i̱ Anduane Homogo tínaga Ngode Datagaliwabeore kogo i̱ ale mendeali nahedane manda biai holeberami. g 
Ani bialu kamigola wali agali dindi tara taraha haga karume tí handape nahe i̱naga wali agali kamiruni tí lone taga naholeberami,
lalu Anduane Homogohanda lene.

Anduane Homogohanda lalu, I̱naga Dinini wali agali bibahendehondo mulebero, lenego ogo

28 Anduane Homogohanda laabo halu lalu, h, i 
Mani i̱ninaga Dinini wali agali bibahendeha odope hai holebero.
Ani berogola tínaga waneigini karume i̱naga bi manalatagi halu holebira.
Tínaga agali wahe karume emaga handalubi tínaga igiri daliahe karume de gandeba handalubi holebira.
29 Horo uruningi i̱naga biabe biahaga wali bedaruhabi agali bu karuhabi ti bibahendeha i̱ninaga Dinini odope hai holebero. j 

30 Anduane Homogo ibugua laabo halu lalu, k 
Dindinibi hari daliganibi Horo ogoni ibulebiragonaga manane tara tara i̱na mo walia holebero.
Bo wahenerunaga darama timbuni dindini bu payabu wialu ira hungu haguala emene ndo bulebira.
31 Anduane Homogonaga Horo mani ibule ngelowa ni ala hundu ereba halu ege daramabi darama ale dolebira. l 
Uruni biai kagola nde Anduane Homogonaga Horo tagira ibulebira.
Horo ogoningi wali agali dindini karume gi taraore halu holebira.
32 Anigo maru karume Anduane Homogo i̱ mini lalu i̱hondo, m 
Ina biamogo bialu gi mia, lalu olalu karu i̱na ti biamogo bulebero.
Anduane Homogo i̱nime larudagua wali agali Yarusalemeni karu aria mbirago yu wa naholebero.
Wali agali i̱nime dabo heleneru ti bayaleore holebira,
lalu Anduane Homogohanda lene.

Copyright information for `HUI