a12.1Yo 11.1, 11.43
b12.2Lg 10.40
c12.3Lg 7.37-38, 10.38-39, Yo 11.2
d12.4Yo 18.3
e12.5Md 19.21
f12.6Yo 13.29
g12.7Yo 19.40
h12.8Man 15.11, Md 26.11, Mg 14.7
i12.9Yo 11.43-44
j12.11Yo 11.45, 12.18
k12.13Iba 118.25-26, Md 27.42, Yo 1.49
l12.15Seg 9.9
m12.16Lg 18.34, Yo 2.22, 7.39, 14.26
n12.17Yo 11.43-44
o12.19Yo 11.48
p12.21Lg 19.3, 23.8, Yo 1.44
q12.23Yo 13.31-32, 17.1
r12.241 Ko 15.36
s12.25Md 10.39, 16.25, Mg 8.35, Lg 9.24, 17.33
t12.26Yo 14.3, 17.24, 1Te 4.17
u12.27Iba 6.3, 42.5, Md 26.38, Lg 12.50, 22.53, Yo 18.37
v12.28Md 3.17
w12.29Ab 23.9
x12.30Yo 11.42
y12.31Md 12.29, Lg 10.18, Yo 9.39, 14.30, 16.11, Ab 26.18, Eb 2.2
z12.32Yo 3.14, 8.28, Lm 5.18, Hi 2.9
aa12.33Yo 18.32
ab12.34Iba 89.4, 89.36, 110.4, Ais 9.7, 53.8, Ese 37.25, Dan 2.44, 7.14, Mai 4.7
ac12.35Yar 13.16, Yo 1.9, 7.33, 8.12, 11.10, Eb 5.8, 1Yo 2.10-11
ad12.36Eb 5.8
ae12.37Yo 2.11
af12.38Ais 53.1, Lm 10.16
ag12.40Ais 6.9-10, Md 13.15
ah12.41Ais 6.1
ai12.42Yo 7.48, 9.22
aj12.43Yo 5.44
ak12.44Md 10.40, Mg 9.37, 1Pi 1.21
al12.45Yo 14.9
am12.46Yo 3.19, 8.12, 9.5, 9.39, 12.35
an12.47Yo 3.17, 5.45, 8.15, 8.26
ao12.48Man 18.19, Mg 16.16, Lg 10.16, Hi 4.12
ap12.49Man 18.18, Yo 8.38, 14.10
aq12.50Yo 8.26-28

John 12

Wali mbirame Yasu haguaneni weli ngabi odo winigo ogo

(Madiu 26.6-13, Maga 14.3-9)

Horo waragaria howaBolangua Halu Penegonaga Horongi tomo nolene ngelowa áyudagua Yasu ibu Bedani pene. Lasarasi homene Yasuhanda mo heya hayago ogoni ibunaga andaga pene. a  Yasu ibiyagola tigua ibu tomo nelo dawa mini. Madahanda tomo tale bialu heagola Lasarasi Yasula maru heba tomo nalu berene. b  Ani berearia Meri ibu weli tara baya ngabi muni dewame yolo binigo ogoni muwa Yasunaga geni odo ha̱i̱ howa ibunaga mandarime domalu berene. Weli tara ogoni gabo be kira ale to̱labehe wini. Ani biyagola nga baya biyagome anda biagoha to̱lai hene. c  Yasunaga talima piaga agali Yudasa maha Yasu ndelole henego ibugua lalu, d  Weli baya ngabi ogonime yolo kina handari tebira (300) muwa wali agali yagibano karu mibehego odo waharago agibe, lene. e  Ibugua wali agali yagibano karu mitangi bialu ndo lene. Muni nu ibugua hono haga howa pagebibime maru mo haga henego ibu mo hole manda buwa lene. f 

Ani layago Yasu hale howa ibugua lalu, Ibugua birago bilo waha. I̱ hora holene tu holebiranginaga birago. g  Horo bibahendengi wali agali yagibanoru tí heba haabo holeberami. I̱ tí heba haabo naholeberama, lene. h 

Lasarasi homelo bami̱ya lenego ogo

Yasu Bedani pu ka layago Yu wali agali dewame hale howa ibu hearia pene. Lasarasi homenego Yasuhanda mo heya haya layago hale howa ogonibi heba de hondole pene. i  10 Yu wali agali dewalime Lasarasi mo heya hayago hondowaloma binigo mo miaga haguane aria tinaga haru haga homogo henego wahalu Yasuhondo mini mbiraore wialu hene. Ani wialu henego hondowa loma binigo mo miaga haguane biarume Lasarasibi heba bo wahole lo manda manda bialu hene. j 

Yasu ibu Handame Haga Kini ale howa Yarusaleme anda penego ogo

(Madiu 21.1-11, Maga 11.1-11, Lugu 19.28-40)

12 Egerebalene wali agali dewaliBolangua Halu Penegonaga Horongi ngoai hayarume Yasu Yarusaleme ibira layago hale hene. 13 Hale howa ti ayage yuni dibu yalu hariga obeneni lola hole pene. Lola howa tigua bi dalimu lalu, Ngode Datagaliwabe mini yaraga hama. Mbirali Anduane Homogonaga minini howa ibirago Ngode Datagaliwabehanda ibu mo turu helo larama. Ngode Datagaliwabehanda Isaraele wali agalinaga Kini mo turu helo larama, lalu hene. k 

14 Yasuhanda nogo dongi mbira handa walia howa ogoni erembirani biralu ibini. Anduane Homogonagambugani lo ngadagua binigo ogo,

15 Saiono tano kamiru tí gi nahalimu. l 
Tínaga kini ibu dongi iginini biralu tíni kamiria ibiragoni,
lalu gilibu nga.

16 Ani biyagola ibunaga talima piaga biaru ti irane manda nabi henego maha ibu mo yaraga halu wá taraore holeneha pu hayagola howa ani bulebira lalu Anduane Homogonaga mbugani gilibu wini ngadaguaore wali agalime ibuhondo ani biyadago ti lo manda bini. m 

17 Ala Yasuhanda Lasarasi homenego, Homali egeanda howa tagira íbu, layagola heyalu ibiyago wali agali de hendenerume lalu, Ibugua agua biya, lalu wali agali hearu lamini. n  18 Anigo ibugua agalime nabiagane ale biya layago hale howa wali agali dewa de hondole ngoai hene. 19 Ani biyago de hondowaPerisi agalirume tini degedege lagalaga bialu lalu, De handadaba. Dindi bibahendeha karume ibu talima piai harago iname mbirale mbira nabibehe kamagoni, lene. o 

Girigi agali marume Yasu de hondole ibinigo ogo

20 Girigi agali maru hearume tomo biago nalu Ngode Datagaliwabe mini yaraga halu lotu lole Yarusaleme ibini. 21 Tigua Pilibi hearia puwa lalu, Hambi-o ina Yasu de hondoa birago walia ha, lene. Pilibi ibu Galili dindi mbira mini Bedesaidali hene. p 

22 Ani layago hale howa Pilibi ibugua Anduru lamule pene. Lamialu libu haru Yasu lamule pene. 23 Lamiyagola Yasuhanda libuhondo ladai bialu lalu, Agali Hole Ibiyagonaga mini mo yaragaore holene tu íbu nga. q  24 Tíhondo heneneore laro. Widi lini hondene mbira dindini ibira howa homa nabiyagua lini mbiraore hangu ngagobi wiaabo holebira. Dindini ibira howa homayagua anda howa lini dewa dolebira. r  25 Mbiralime dindini howa ibuni holene hangu hame lalu hayagua holene ogoni yu waholebira. Mbiralime dindini howa ibuni holene hame nale hayagua ibu holene ogoni yu haabo howa haabobo holenebi yu holebira. s  26 Mbiralime i̱naga biabe bia hoa ho kayagua i̱ kogoria ibubi hole i̱ porodagua talima ibulene nga. I̱naga biabe bia hagane karu i̱ Abahanda tinaga mini mo yaraga holebira, lene. t 

Yasu ibu homolenenaga bi laminigo ogo

27 Yasuhanda lalu, Áyu i̱naga miniha genda bialu burugu laruago i̱na agi loabe. Aba-o i̱hondo bulene ngago nabi wahelo mo wahabe loabe. Ndo i̱ tandaga ogoni nole dindi ogoria dalirugoni. u  28 Aba-o í̠naga mini mo yaraga helo bibe, lene. v 

Ani layagola dahuliya andaga howa bi ladali halu lalu, I̱na mo yaraga harugo lonebi mo yaraga holebero, lene.

29 Ani layuago hale ho hayarume lalu, Hari kulu lagadagua larua, lene. Marume lalu, Dahuliyali mbirame ibuhondo bi lamiarua, lene. w 

30 Yasuhanda tihondo lalu, Bi o layuagoni i̱ mitangi bialunaga ndo tí mitangi bialunaga layua. x  31 Áyu ogoni wali agali dindi bibahendeni karu daba ki bulene nga. Áyu ogoni wali agali dindi bibahendeni karunaga haguane kago bo talia tagi kaware nga. y  32 I̱ dindini howa mo yaraga haragola wali agali bibahende i̱ni kogoria yamiai holebero, lene. z  33 Ani layago ibu aguani homolebero lalu lene. aa 

34 Wali agali biarume ibuhondo ladai bialu lalu, InanagaMana lowini ngagomeMbirali Dabo Helenego ibu haabo hagane lalu gilibu ngago manda bidama. Anigo í̠na lalu, Agali Hole Ibiyago mo yaraga holebira, larigo Agali Hole Ibiyago ibu aibe, lene. ab 

35 Ani layagola Yasuhanda tihondo lalu, Wá holene ibu tí heba emene tigi mbira hangu holebira. Wá holene tí heba kaore ibu heba ibagabu halimu. Tí arumaha naholenaga ani halimu. Arumaha ibagabu hagarume agoha porobe manda nabi howa pupe hagane. ac  36 Tí wá holenenaga waneigini halimulo wá holene tí heba kaore wá holene ogonihondo mini mbiraore wialu halimu, lene. ad 

Yu wali agalime mini kira wu henego ogo

Yasuhanda ani lowa tigua ibu hondolilono ohowa ha do hole pene.
37 Tigua deme hendelo Yasuhanda agalime nabiagane ale dewa biyagola ti hondowa ibuhondo mini mbiraore nawi dege haabo hene. ae  38 Ngode Datagaliwabe manalatagi haga Aisaiahanda ani bulebira lalu mbiwia henego lola hene. Ibugua lalu, af 

Anduane Homogo-o iname bi mana lamirimago hale howa aiwa yu tiga biyabe.
Anduane Homogohanda ibunaga hongo aihondo walia hayabe,
lalu gilibu nga.

39 Tigua Yasuhondo mini mbiraore nawi henego irane Aisaiahanda bi mende lo ngago ogo,

40 Tigua deme hondolilonobi minime galone manda bulilonobi ag 
i̱na ti mo dabi holiya i̱hondo mini beregedolilonobi
Ngode Datagaliwabehanda tinaga de mo ko halu tinaga minibi mo ndibu leda, Ngode Datagaliwabehanda lene,
lalu gilibu nga.

41 Aisaiahanda ani layago irane ibu Yasunaga wá holene ala de hondowa Yasunaga te lalu bi ogoni lene. ah 

42 Yu agali marume mini mbiraore nawi helowa Yu wali agali haru haga dewame Yasuhondo mini mbiraore wu hene. Tingoai hagane andaha nahe tagira puabo halimu lo wuligoPerisi agali hondowa ti gi howa latagi nahe ohowa lalu hene. ai  43 Ani binigo irane tigua wali agalime tinaga mini mo yaraga helo hame timbuni lowa Ngode Datagaliwabehanda tinaga mini mo yaraga helo hame emene lo hene. aj 

Yasuhanda bi layagome wali agali daba ki holebirago ogo

44 Yasuhanda bi dalimu lowa lalu, I̱hondo mini mbiraore wu kagome i̱ hanguhondo ndo i̱ pu layagohondobi mini mbiraore wu ka. ak  45 I̱ de hendedagome i̱ pu layagobi de hendeda. al  46 I̱hondo mini mbiraore wu karume arumaheha haabo nahelo i̱ wá holene howa dindini daliru. am  47 Bi i̱na langialu kogo hale halu nabiaga kago ibuni biyagonaga daba ki nabulebero. Wali agali dindi bibahendeni karu daba ki hole ndo ibiru. Ti pele ngule ibirugoni. an  48 Mbirali i̱la habiya nale pelo wahaga kagobi i̱na bi langialu kogo yu tiga nabi kagobi ibuni biragonaga dabaga mbirali ka. Ha maro bulene horo harangi bi i̱na langirugome o biyagonaga daba ki holebira. ao  49 Ogoni heneneore laro. I̱ni hangu manda bialu ndo laruli. I̱ Aba i̱ pu layagome labe lenego hangu laruli. ap  50 Ibugua bibe lenego hale halu biagago haabobo holene yulebira manda bu ko. I̱ ani manda buwa i̱ Abahanda labe lenedagua hangu laruli, lene. aq 

Copyright information for `HUI