a15.2Md 3.10, 15.13
b15.3Yo 13.10, 17.17, Eb 5.26, 1Pi 1.22
c15.4Yo 6.56, Kl 1.23, 1Yo 2.6
d15.5Hos 14.8, Yo 15.16, 2Ko 3.5, Pb 1.11, 4.13
e15.6Md 3.10, 7.19, 13.42
f15.7Md 7.7, Yo 14.13-14, 15.16, 16.23
g15.8Md 5.16, Yo 8.31, Pb 1.11
h15.10Yo 14.15, 14.21-23, 1Yo 2.5
i15.11Yo 16.24, 17.13, 1Yo 1.4
j15.12Yo 13.34, 15.17, 1Te 4.9, 1Pi 4.8, 1Yo 3.11, 3.23, 4.21, 2 Jo 5
k15.13Yo 10.11, Lm 5.7-8, Eb 5.2, 1Yo 3.16
l15.14Md 12.50, Yo 14.15, 14.23
m15.15Yo 17.26, Ab 20.27
n15.16Md 28.19, Mg 16.15, Yo 6.70, 14.13, 1Yo 4.10, 4.19
o15.17Yo 13.34
p15.18Md 10.22, 1Yo 3.1, 3.13
q15.19Yo 17.14, 1Yo 4.5
r15.20Ese 3.7, Md 10.24, Lg 6.40, Yo 13.16
s15.21Md 5.11, 10.22, 24.9, Mg 13.13, Yo 16.3
t15.22Yo 9.41, Lm 1.20, Ya 4.17
u15.23Lg 10.16, 1Yo 2.23
v15.24Yo 3.2, 7.31, 9.32, 9.41, 14.11
w15.25Iba 35.19, 69.4
x15.26Lg 24.49, Yo 14.26, 16.7, 16.13, Ab 2.33, 1Yo 5.6
y15.27Lg 1.2, 24.48, Ab 1.8, 1.21-22, 1Pi 5.1, 2Pi 1.16

John 15

Yasuhanda, Pu mbira lini daga minigerebi irane henene i̱ kogoni, lenego ogo

Yasuhanda, Pu mbira lini daga minigerebi irane henene i̱ kogoni. Mabu anduane i̱ Aba kagoni. I̱ha magane kago aria mbira lini nadaga kago ibugua gandulo wahaga. Magane mende lini daga kagome lini dewa delo mane danda wabia haga. a  I̱na tíhondo bi langirugome tí mo bayale henego kami. b  I̱ha ho gimbu bu halimu. I̱bi tíha ho gimbu bu holebero. Magane mbira iraneha gimbu nabi hayagua magane hangume lini nadabehe hagadagua tíbi i̱ha ho gimbu nabi harimiyagua lini nadabehe holeberami. c 

Pu mbira lini daga mini gerebi irane i̱ kogoni. Magane tí kami. Tí mbirali i̱ha ho gimbu bia i̱ nde ibuha ho gimbu bia bu kabayagua ogoni ibuha lini dewa dolebira. I̱ wahowa tíni hangu howa mbirale mbira bibe nahe kami. d  Magane podo wahagadagua i̱ha mbirali ho gimbu nabi hayagua ogoni podo waharagola gau lolebira. Magane podo winigo mo mogo buwa irani delagadagua delolebira. e  I̱ha tí ho gimbu bia i̱naga bi manabi tíha gimbu bia bilowa i̱hondo mbirale mbira bia lalu langirimiyagua hale halu buleberoore. f  Tíha lini dewa dedamigome i̱ Abanaga mini mo yaraga holebira. Ani buwa tí i̱naga talima piagaore holeberami. g  I̱ Abahanda i̱hondo gubalini ho kadagua i̱nabi tíhondo gubalini ho ko. I̱na gubalini ho kogoha tí halimu. 10 I̱ Abahanda bibe lenedagua i̱na bialu howa ibugua gubalini ho kagoha i̱ kodagua i̱na bilimu larogo bialu harimiyagua i̱na gubalini ho kogoha tí holeberami. h 

11 Tíhondo bi langialu harugo i̱naga turu holene tíha wilobi wiragola tínaga turu holene tíniha to̱lelobi langiru. i  12 I̱na bilimu lalu kogo ogo i̱na tí gubalini ho kodagua tíni gubalini hagahaga bu halimu. j  13 Agali mbirame ibu nenegealiru mitangi howa ibuninaga holene pela hayagua agali ogoni ibuha gubalini holene timbuniore nga. k  14 Anigo i̱na bilimu lalu kodagua bialu harimiyagua i̱naga nenegeali tí holeberami. l  15 I̱na tí i̱naga biabe bia hagane kami lalu ndo ko. Biabe bia haganeme ti haru haga kago agi birabe manda nabi hagane. I̱ Abahanda bule kago bibahende tíhondo langiai harugo manda buwa tí i̱naga nenegeali kami lalu ko. m  16 Tígua i̱ dabarimi ndo i̱na tí dabaru. Tíha lini dewa dalu halimulo dabo helaru. Tínaga lini darago daabo helo helaru. Ani bu howa tígua i̱naga minini howa i̱ Abahondo mbirale mbira bia larimiyagua ibugua biai holebira. n  17 Ogonigo tígua bilimu lalu kogo ogo tíni gubalini ho hagahaga bialu halimu, lene. o 

Dindi mana hangu biaga karume tí handabe manga holebira, lenego ogo

18 Yasuhanda lalu, Dindi mana hangu biaga karume tí handabe manga hayagua pigane i̱ handabe manga hayadagua ina handabe manga haragonida manda bilimu. p  19 Tíbi dindi mana hangu biaga kamile dindi mana hangu biagarume ina aria ka lowa tíhondo gubalini ho kale. I̱na tí dindiali hemiria dabarugo tí dindi mana nabiaga kamigoni. Ani kamigo dindi mana hangu biagarume tí hondowa handabe manga halu ka. q  20 Tíhondo i̱na bi mbira langirugo mitangi bilimu. I̱na au larugo, Garabaya biabe ale bia haga kago ibu ibunaga anduane kagobi ndo ibu nira haga. Tigua i̱ mo tandaga hayadagua tíbi mo tandaga holebira. Tigua i̱na mana lawai harugo hale halu biyagua tígua mana lawai haramigobi hale halu bulebira. r  21 Urunime tí mo tandaga holebira larugo i̱ Aba i̱ pu layago manda nabi karume tí i̱naga kamigo hondowa mo tandaga holebira laru. s  22 I̱na tihondo bi mana lamule naibidole tigua ko bialu kama manda nabi howa bialu kale. I̱na lamirugo hale howa ko bialu kagonaga tigua ina manda nabi howa bialu harimada labe nahe holebira. t  23 I̱ handabe manga haga karume i̱ Ababi handabe manga halu ka. u  24 I̱na agalime nabiagane aleru bialu harugo urunime de hendelo nabidole tigua ko bialu kama manda nabi howa bialu kale. Ogonidagua birugo ti de hondowa tigua i̱bi i̱ Ababi handabe manga halu ka. v  25 TinagaMana lowinigo ogo, Tigua handabe manga holene irane mbira nawini bameore i̱ handabe manga haya, lalu gilibu ngadaguaore lola haragoni. w 

26 Biamogo Biagane ibu ibulebira. Ogoni ibugua Ngode Datagaliwabe ogobi ka lalu heneneore lagane Dinini i̱ Aba kagoria howa ibulebira. I̱na ibu tí kamigoria pu loleberogo ibuwa ibugua i̱ ogobi ka lalu langulebira. x  27 Piganeore howa tí i̱ heba haabo harimago tíguabi i̱ ogobiore ka lalu lamuleberami, lene. y 

Copyright information for `HUI