a19.1Md 20.19, Mg 15.15, Lg 18.33
b19.2Lg 23.11
c19.3Yo 18.22
d19.4Yo 18.38, 19.6
e19.6Yo 18.31, Ab 3.13
f19.7LBM 24.16, Md 26.65, Yo 5.18
g19.9Ais 53.7, Md 26.62-63, 27.12-14, Lg 23.9
h19.11Lg 22.53, Yo 7.30, 10.18, Ab 2.23, Lm 13.1
i19.12Lg 23.2, Ab 17.7
j19.14Md 27.62
k19.16Md 27.26, 27.31, Mg 15.15, Lg 23.24
l19.17Md 27.31-33, Mg 15.21-22, Lg 23.26, 23.33
m19.19Md 27.37, Mg 15.26, Lg 23.38
n19.23Md 27.35, Mg 15.24, Lg 23.34
o19.24Iba 22.18
p19.25Md 27.55-56, Mg 15.40, Lg 23.49, 24.18
q19.26Yo 2.4, 13.23, 21.7, 21.20
r19.28Iba 22.15, 69.21
s19.29Har 12.21-23, Md 27.48
t19.30Yo 17.4
v19.31Man 21.22-23, Mg 15.42, Yo 19.42
w19.341 Yo 5.6-8
x19.35Yo 21.24
y19.36Har 12.46, Dag 9.12, Iba 34.20
z19.37Iba 22.16-17, Seg 12.10, Mo 1.7
aa19.38Md 27.57, Mg 15.42, Lg 23.50, Yo 7.13, 9.22
ab19.39Yo 3.1-2, 7.50
ac19.40Ab 5.6
ad19.42Ais 53.9, Yo 19.31

John 19

Ani layago hale howa Pailate ibugua lalu, Yasu haru puwa pu payini tibume badaba, lene. a  Ani bialu ami agali tigua pu anihe bo buwa handame haga kininaga manda ogoni lowa ibu haguani karula hene. Karula howa labolabo luni tagalitaya ale karula hene. b  Karulo hearia ti ibugu bialu lalu, Yu wali agalinaga Handame Haga Kini haabo habelo, lalu baga bialu hene. c 

Pailate ibu lone tagira puwa Yu wali agalihondo lalu, Agali ogonime ko bini mbira handa walia naheda manda bilimulo tí kamiria haru tagira ebero, lene. d  Ani lowa Yasu pu anihe mandabi labolabo luni tagalitaya ale biagobi karulo heaore haru tagira ibuwa Pailatehanda tihondo lalu, Agali biago ogogo handadaba, lene.

Loma binigo mo miaga haguanerumebi Anduane Homogonaga anda mamage haga agalirumebi de hondowa dalimu lowa lalu, Ira bangani ba para ha. Ira bangani ba para ha, lene. e 

Ani layagola Pailatehanda tihondo lalu, Ibugua ko bini mbira handa walia nahe kogo tíni haru puwa ira bangani ba para halimu, lene.

Ani layago hale howa Yu wali agali tigua ladai bialu lalu, Ibuni i̱ Ngode Datagaliwabe Igini ko layagome inanaga mana lo ngago puguayago ibu homolene ngaore, lene. f 

Bi ogoni layago hale howa Pailate ibu gi timbuniore hene. Gi timbuniore howa gabumane andaga biagoha lone anda puwa Yasuhondo lalu, Í̠ ani howa ibini kebe, lene. g 

Ani layagola Yasuhanda ladai nabi hene.
10 Ladai nabiyagola Pailatehanda ibuhondo lalu, I̱hondo mbira nalole kebe. Í̠ golo peha lolenebi í̠ ira bangani ba para hadaba lolenebi i̱ kogo manda bia, lene.

11 Ani layagola Yasuhanda ladai bialu lalu, Ngode Datagaliwabehanda í̠na i̱hondo bulene hongo ngidago nangidale mbira nabibehe kele. Í̠na i̱hondo ko emene ale bere. I̱ minilo nde layago ibugua ko timbuniore biya, lene. h 

12 Ani layago hale howa Pailate ibugua Yasu golope hole henge hai bini. Henge hai bialu hearia Yu wali agali tigua dalimu olalu, Agali ogoni golope hariyagua í̠ Lomonaga handame haga Kininaga damene ndo ke. Agali mbira handame haga kini hole ibuni mo yaraga hayagua ibu Lomonaga handame haga Kinila waitigi ho ka, lene. i 

13 Tigua ani layago hale howa Pailate ibugua Yasu haru tagira ibuwa hama mini Ege To̱le̱ Mbalape dewa para ho winigoria godi lalu daba ki haganaga biraganeni berene. Hama ogoni Hiburu bi lalu, Gabada, laga hene. 14 Bolangua Halu Penegonaga Horo yawi holebira lowa horo hanuni kaware hayagola Pailatehanda Yu wali agalihondo lalu, Tínaga handame haga kini o kagoni, lene. j 

15 Ani layagola tigua dalimu olalu, Homelo ba. Homelo ba. Ira bangani ba para ha, lene.

Ani layagola Pailatehanda tihondo lalu, Tínaga handame haga kini i̱na ira bangani ba para holiya hamelo kamibe, lene.

Ani layagola loma binigo mo miaga haguane biarume ladai bialu lalu, Inanaga handame haga kini mende nahe Lomonaga handame haga Kini ibuni hangu ka, lene.

16 Ani layagola Pailatehanda lalu, Tínime ira bangani ba para hole haru pudaba, lene. k 

Yasu ira bangani ba para henego ogo

(Madiu 27.32-44, Maga 15.21-32, Lugu 23.26-43)

Ani layagola tigua Yasu haru pene.
17 Yasu ibuni ira banga yalu haru pialu dindi mini Haguane Kuni laga winigoria haru pene. Dindi ogoni Hiburu bi lalu, Gologoda, laga hene. l  18 Ogoriani tigua ibu ira bangani ba para hene. Yasu dombeni ba para howa agali kira lene labolabo ba para hene. 19 Pailatehanda ira mbalapeni bi ogo, Nasareteali Yasu Yu wali agalinaga Handame Haga Kini Ogoni, lalu gili buwa Yasunaga ira bangani ba para hene. m  20 Bi ogoni Hiburu bi lalubi Ladini bi lalubi Girigi bi lalubi gilibu wiai hene. Anigo Yasu ira bangani ba para hayagoria Yarusaleme kaware winigo Yu wali agali dewalime bi gilibu wiago hondowa daga lene. 21 Ani gilibu wiago hondowa loma binigo mo miaga haguane biarume Pailatehondo lalu, Yu wali agalinaga Handame Haga Kini Ogoni lalu nagilibu wibe. Ibuni degeme lalu, Yu wali agalinaga Handame Haga Kini i̱ kogoni, laya lalu gilibu wia, lene.

22 Ani layagola Pailatehanda ladai bialu, I̱na o gili bidogoni gilibu wiaabo helo, lene.

23 Ami agali tigua Yasu ira bangani ba para howa ibunaga labolabo ti marialime ta hene. Ta howa ibuninaga aga lu bia gimbu biago tigua muwa podolene henge nawi mbiraore ogonibiore wabini biniyagola n  24 ami agali biarume lalu, Gime lere nalami̱ya. Mbirali ai ibu mirabe handami̱ya tadu bima, lene. Anduane Homogonagambugani lo ngago ogo. o 

I̱naga labolabo maru tini tale bu ta howa
i̱naga aga lu biagonaga tadu bini,
lalu gilibu nga. Ani binigome bi ogoni lola hene.

25 Yasu ba para heago ira banga kaware helowa ibu ai̱yabi ibu ai̱ya hagibuni Kolobasa one Meribi Magadala wali Meribi ti hene. p  26 Yasuhanda ibu ai̱yabi ibunaga talima piaga mbirali gubalini ho haga henegobi kaware heago de hondowa ibu ai̱yahondo lalu, Ai̱ya-o í̠ igini o kagoni, lene. q 

27 Ani lowa ibugua ibunaga talima piaga biagohondo lalu, Í̠ ai̱ya o kagoni, lene. Ani layago hale howa ibunaga talima piaga biagome wali biago ibu andaga haru pu hene.

Yasu homenego ogo

(Madiu 27.45-56, Maga 15.33-41, Lugu 23.44-49)

28 Yasuhanda ai bumaro bialu biai harugoni manda buwa, I̱ iba noaba, lene. Anduane Homogonagambugani ani lolebira lalu gilibu winigo lola halu lene. r 

29 Ani layagolawaini iba kaubi ndisi mbiraha to̱lo winigo tigua dahundu ale ira mbira minihisobo magane mbira waini iba kaubi biagoha ibira howa Yasu nelo ibunaga ne hambuni mo paga hene. s  30 Ani biyagola Yasu ibugua iba biago nai howa lalu, Ai bumaro bialu biai harugoni, lene. Ani lowa ibunaga ma podope halu tongolo mini. t 

Yasunaga habianeni nogoba henego ogo

31 Yu wali agali haru haga tiguaSabada horo timbuni taraore helo loma bini yawi holebira lowa ti tomo mo manda manda biagane horo ogoningi Pailatehondo bi lamule pene. Tigua Sabada horo ogoningi tingini ira bangani wiaabo nahelo hame lowa Pailatehondo lalu, Ti abale homelo tinaga ge kuni podowa homaragola tinaga tingini mo yalu poloma̱ya ani bidaba labelo manda bu kama, lene.
(19.31)Sabada horo timbuni taraore gilibu ngago ogoni Bolangua Halu Penegonaga Horo manda bibehe kama. Horo ogoni ta nabi wiaga henego Yasu homayangi horo o biago timbuni taraore holene tu hene. Anigo ogoningi ina ko birimagonaga nogo sibi igini Yasu manda bialu ibugua ibunaga darama pelowa inanaga homo aribia hene.
,
v 
32 Ani layagola ami agali biarume agali pigane ba para hayagonaga ge kunibi mende maha Yasu gi lehayagi ba para hayagonaga ge kunibi podene. 33 Ani buwa ti Yasu wiaria ibalu hearia ibu abale homayiyago hondowa ibunaga ge kuni napode wahene. 34 Ami agali mbirame yandareme Yasunaga habianeni nogoba hene. Nogoba hayagola daramabi ibabi tagira ibini. w  35 Tíguabi heneneore leada manda buwa mini mbiraore wilimulonaga ani biyago de hendene mbiralime ani biya lalu heneneore laro manda buwa lene. x  36 Ogonidagua biyagola Anduane Homogonagambugani bi lo ngago ogo, Ibunaga kuni mbira napodolebiraore, lalu gilibu winigo ogoni lola hene. y  37 Anduane Homogonaga mbugani bi mende lo ngago ogo, Tigua agali mbira nogoba hayago wali agalime handaya ho holebira, lalu gilibu winigobi lola halu bini. z 

Yasu tingini hora henego ogo

(Madiu 27.57-61, Maga 15.42-47, Lugu 23.50-56)

38 Arimadiali Yosebe ibugua Yasu tongo layago hondowa Pailatehondo lalu, Yasunaga tingini i̱na mo yalu poabe, lene. Yosebe ogoni ibu Yasunaga talima piaga henego Yu wali agali haru haga hearu hondowa gi howa oho hene.

Yosebehanda bi ani layagola Pailatehanda lalu, E̱ yalu pobe, lene. Ani layagola Yosebe ibugua Yasunaga tingini mo yalu pene. aa 
39 Nigodimusi Yasu hearia bamba mbiraga ibinigo ibubi Yosebe heba pialu ira mbiranaga ibane minimuwebi ira mende minialo ogoninaga ibanebi bimaga henego Yasu tinginini ha̱i̱ hole mo yalu pene. Ira ibane ogoninaga genda magi timbuniore wini. ab  40 Libugua Yasunaga tingini muwa Yu agalime hora hole biaganedagua ira ibane biago ha̱i̱ howa labolabo pele bayaleore mbirame huba bini. ac  41 Yasu ira bangani ba para hayago dindi ogoriani mabu winigo mabu ogoriani egeandaha hora holene uli ayure dege tombo goabu ede howa mbirali hora nahe gahenge wini. 42 Sabada horo yawi holebira manda buwa hora holene uli ogoni kaware wiago hondowa libugua Yasunaga tingini ogoniha abale hora hene. ad 

Copyright information for `HUI