a3.1Yo 7.50, 19.39
b3.2Md 22.16, Yo 9.16, 9.33, Ab 2.22, 10.38
c3.3Md 18.3, Ga 6.15, Ta 3.5, Ya 1.18, 1Pi 1.23, 1Yo 3.9
d3.5Ese 36.25-27, Mg 16.16, Ab 2.38, Ta 3.5
e3.6Iba 51.5, Yo 1.13
f3.8Aga 11.5, 1Ko 2.11
g3.11Md 11.27, Yo 3.32, 7.16, 8.26
h3.12Lg 22.67
i3.13Min 30.4, Yo 3.6, 6.33, 6.38, Ab 2.34, Lm 10.6, 1Ko 15.47, Eb 4.9-10
j3.14Dag 21.9, Yo 8.28, 12.32
k3.15Yo 3.36, 6.47, 20.31
l3.16Yo 3.36, 10.28, Lm 5.8, 8.32, 1Yo 4.9-10
m3.17Lg 19.10, Yo 5.22, 5.45, 12.47, Ab 17.31, 1Yo 4.14
n3.18Yo 3.36, 5.24, 6.40, 6.47, 20.31
o3.19Yo 1.4-5, 1.8-12, 8.12
p3.20Yob 24.13-17, Eb 5.11-13
q3.22Yo 4.1-2
r3.24Md 4.12, 14.3, Mg 6.17, Lg 3.19-20
s3.26Yo 1.26-34
t3.27Yo 19.11, 1Ko 4.7, Hi 5.4, Ya 1.17
u3.28Mal 3.1, Md 11.10, Mg 1.2, Lg 1.17, Yo 1.20, 1.23, 1.27
v3.29Md 9.15
w3.31Md 28.18, Yo 8.23, Lm 9.5, 1Ko 15.47, Eb 1.21, Pb 2.9, 1Yo 4.5-6
x3.32Yo 3.11, 8.26, 15.15
y3.33Lm 3.4, 1Yo 5.10
z3.34Ais 42.1, Yo 1.16, 7.16
aa3.35Md 11.27, Lg 10.22, Yo 5.20, 10.17, Hi 2.8
ab3.36Lg 3.7, Yo 1.12, 3.16-18, 6.47, Lm 1.17, 1Yo 5.10-12

John 3

Yasu Nigodimusila te lenego ogo

Perisi aria agali mbira Yu wali agali haru haga henego ibu mini Nigodimusi hene. a  Ibugua mbiraga mbirungi Yasu hearia ibuwa ibuhondo lalu, Í̠ lawai hagaore Ngode Datagaliwabehanda pu lenego íbu ke lo manda bu kama. Mbiralime Ngode Datagaliwabela haru ndo ibuni hangu howa agalime nabiagane aleru í̠na walia haga biriligodagua bibe naheore ka, lene. b 

Ani layagola Yasuhanda ladai bialu lalu, I̱na í̠hondo heneneore laro. Mbirali ibu halu mende nataba hene kayagua ibu Ngode Datagaliwabehanda Handame Ho Kagoria nahondolebiraore, lene. c 

Ani layagola Nigodimusi ibugua Yasuhondo lalu, Agali wahego lone halu mende agua taba hanabehebe. Ibugua ibu ai̱ya tombeha anda puwa halu mende taba hanabehebe, lene.

Ibugua ani layagola Yasuhanda ladai bialu lalu, I̱na í̠hondo heneneore larogo mbirali ibu ibamebi Ngode Datagaliwabe Dininimebi halu mende nataba hene kayagua ogoni ibu Ngode Datagaliwabehanda Handame Ho Kagoria pobe nahe ka. d  Tinginime taba hanagago tingini dege haga. Ngode Datagaliwabe Dinini ibugua taba hanagago dinini haga. e  I̱na í̠ halu mende taba honolene nga larugonaga í̠ mogo nalabe. Puyabu pu larane hale hariligo agoha howa pu lo yalu ibalu agohayagi pu lo yu porabe í̠ manda nabi ke. Ngode Datagaliwabe Dinini ibugua holene gahenge ngulene ogonibi nga, lene. f 

Ani layagola Nigodimusi ibugua ladai bialu lalu, Mana o larigonaga agua bialu bulebirabe, lene.

10 Ani layagola Yasuhanda ladai bialu, Isaraele wali agali lawai haga gibi í̠ kego howa mana ogoni manda nabi kebe. 11 I̱na í̠hondo heneneore laro. Iname mbirale manda biai howabi handai howabi nde maru lameramaligo áyu iname tíhondo bi mana ogoninaga langeramagola tígua yu tiga nabi haabo kami. g  12 I̱na dindi tawe manda bidamigo langirugola yu tiga nabi kamigoria dahuliya andaga tawe langerogola agua yu tiga buleberamibe. h  13 Mbirali dindini howa dahuliya andaga iraga halu pu nabigo Agali Hole Ibiyago ibu dege dahuliya andagaha howa daliya, lene. i 

14 Mosesehanda dindi ko wali agali nahaga wiagoriani howa puya ege to̱le̱ ale mini boronosime wabinigo irani ba para howa yaraga hayadagua Agali Hole Ibiyago ani yaraga holene wulebira. j  15 Ibuhondo mini mbiraore wiragome haabobo holene yilo ani bulebira. k  16 Ngode Datagaliwabehanda wali agali bibahende gubalini timbuniore howa ibu Igini mbira hangu henego ngini. Ibuhondo mini mbiraorewi karu ti dinini koha nape haabobo holene yu holebira. l  17 Ngode Datagaliwabehanda ibu Igini wali agali dindi bibahendeni karu tinaga daba ki biaga helo ndo ibilene. Ibu wali agali bibahende pele miaga helo ibilene. m 

18 Ngode Datagaliwabehanda ibu Iginihondo mini mbiraorewi karu daba ki nabulebira. Mini mbiraore nawi karume biyagonaga daba ki bini kago irane tigua Ngode Datagaliwabe Igini mbira hangu kagonaga mini yu tiga nabiyagome ani bini. n  19 Daba ki bulene ngago irane ogo. Wá holene ibu wali agali dindini hearia ibiyagola mana ko biaga hearume arumaha hole hame lowa wá holene hame nale hene. o  20 Mana ko biaga karume wá holenehondo handabe manga howa wá holeneme tinaga ko biyago walia holilono wá holene kagoria naibaga. p  21 Mana henene biaga karu tigua biagago Ngode Datagaliwabenaga hongome biaga lalu wá holeneme walia helo lowa ti wá holenehayagi íbu haga, Yasuhanda lene.

Yonehanda Yasu ibu daliga holene nga lenego ogo

22 Ani lalu bialu Yasubi ibunaga talima piaga biarubi Yudia pu howa dindi ogoriani wali agali maru baboraya bini. q  23 Yonehanda Salimi dindi kaware ngelowa Aenononi iba dewa bereagoria baboraya bialu hene. Wali agalime ibu hearia ibugu biyagola ibugua baboraya bigi bini. 24 Yone ibu garabaya nape heangi ani bialu hene. r 

25 Mbirungi Yonenaga talima piaga biarume Yu agali mbira heago heba wayawaya biagane mananaga te lowa lai lene. 26 Lai lalu bialu Yone hearia ibuwa ibuhondo lalu, Lawai haga-o agali mbira í̠ heba iba Yodana ange ederayagi hebigola iname agali eberegoni aibe larimagola í̠na ibu ogo ka lalu langirigo agali o biagonime áyu wali agali baboraya bialu ka. Ani biragola wali agali bibahendeme ibu karia hangu pialu ka, lene. s 

27 Ani layagola Yonehanda ladai bialu lalu, Ngode Datagaliwabehanda mbiralihondo mbirale mbira namiyagua nde mbirali ogoni ibu mbirale nayi holebira. t  28 I̱na bi ala larugo tí hale harimi.Mbirali Dabo Helenego ibulebira lowinigo i̱ ndo ko. Ngode Datagaliwabehanda i̱ ala bamba halu pu lenego íbu ko larugoni. u  29 Agali mbirame wali mbira dabu biragola nde wali ogoni ibu one biraga. Agali wali dabu biagagome bi larago hale howa ibunaga nenege igiri yango mende kagome kaware ibu heba howa turu timbuni haga. Ani biagadagua i̱naga turu holene to̱lai harago i̱ turu timbuni ho ko. v  30 Ibu daligaore holene ngago ani hela. I̱ dindihaore nira holebero, lene.

Daliga howa ibiyago ibu daligaore ka, lenego ogo

31 Mbirali daliga howa ibiyago ibu maru ale ndo ibu timbuniore ka. Dindini hene kago ibu dindiali ka. Ibugua bi larago lalu dindi tawe hangu laga ka. Mbirali dahuliya andaga howa ibiyago ibu daliga gibiore ka. w  32 Ibugua handayagobi hale hayagobi wali agalihondo lamialu kagola tigua yu tiga nabi ka. x  33 Yu tiga bidagome Ngode Datagaliwabe henene ka lalu walia ka. y  34 Ngode Datagaliwabehanda mbirali ibilayagohondo ibu Dinini to̱lai helo miagago o biago ibugua Ngode Datagaliwabenaga biore laga ka. z  35 Abahanda ibu Igini gubalini timbuniore howa mbirale bibahende ibuhondo miai hene. aa  36 Igini ogonihondo mini mbiraore wu kagome haabobo holene yu ka. Igini ogonime bi larago hale nahe donge ho kagome haabobo holene nayulebiraore. Ngode Datagaliwabenaga lembo holene ibuha wiaabo holebira, lene. ab 

Copyright information for `HUI