a3.4-5Md 12.41, Lg 11.32
b3.10Har 32.14, 1Kin 21.27-29, Yar 18.8, Amo 7.3, 7.6

Jonah 3

Yonahanda Anduane Homogohanda bi layago hale halu binigo ogo

Anduane Homogohanda Yonahondo bi ala layadagua dege lone lamini. Ibugua lalu, Áyu Niniba dindi timbuni nai ngagoria puwa í̠na bi abale lo yalu pobelo langirugoni áyu wali agali ogoriani karuhondo lamule pu, lene. Ani laya handala Yona ibu Anduane Homogohanda bi layago hale halu Niniba dindi pene. Dindi ogoni timbuni gibiore ogoriani pu banga bialu pialu heane horo tebiru pene. Yona ibu dindi timbuni ogoriani pu banga bialu pialu heane horo mbira piai haga bini. Pialu howa ibugua, Niniba dindi horo pira maria (40) piai haragola bo heda hai holebira laya, lalu lamini. a 

Ani lamiyagola Niniba wali agali hearume Ngode Datagaliwabenaga bimana lamiyago henene layadalo manda bini. Ani manda buwa tigua tini hangu hangu hinatomo nane wali agali emenebi timbunibi ta nabi bibahendeore tigua ko ngubi ogobi bialu harima lalu walia hole danga dugu hiruwa birama polene nga, lo manda bini.

Niniba wali agali kini heago ibu hale halu hearia Niniba wali agali bibahende emenebi timbunibi hearu danga dugu hiralu tomo nane birai ka layago hale howa ibubi ibunaga haru hagane dagia ngelalu ibunaga aga biaganebi golo wahowa danga dugu hiralu beha berene. Ani bialu ibugua Niniba wali agali bibahendehondo lo yogo lene. Bi ogo kinibi ibunaga biabe biaga karubi tigua lo wia harago, Mbiralime mbirale mbira nanoleore bira, lalu, wali agali bibahendemebi nogo bulumagamebi nogo sibimebi mbiraligome mbira hina ibabi nanoleore bira, lene. Wali agali bibahendebi nogo damene bibahendebi danga dugu hirai holene nga, lalu lamini. Bibahendeoreme tini hangu hangume mana ko bu walia halu hayarubi bi ko ngubi ogobiore kama lalu bu walia haga hayarubi uruni wahai harama lalu Ngode Datagaliwabehondo bi laho wulene nga, lene. Aguani beramigola Ngode Datagaliwabehanda mini wiadai bialu tihondo kebaho wiyago hadadai bialu ti nahome helolebira badago, lalu lamini.

10 Ngode Datagaliwabehanda handalu hearia wali agali tigua tininaga mana ko ngubi bu walia haga biaruni yu wahai halu mini beregedai hayago hondowa ibugua ti bo heda hai holebero lalu lo wiyagoni mini wiadai bialu wahene. b 

Copyright information for `HUI