a9.7Har 23.32, 34.12,Man 7.2
b9.10Dag 21.21-35
c9.14Dag 27.21, 1Sml 22.10, Ais 30.1-2

Joshua 9

Gibionoali hearume Yosua mo hondo henego ogo

Iba Yodana ni paliragohayagi howa wali agalinaga kini bibahende hearume Isaraelealime wai bialu agali bo bibahara layago hale hai hene. Hari bare barehayagi hearumebi hari biaru tene teneha hearumebi iba solowara Medidereniana bereagohayagi hearumebi uyura Lebanonohayagi howabi hale hai hene. Kini o hale henedaruni Hidialibi Amoroalibi Kenanalibi Peresealibi Hibialibi Yabusualibi ti bibahende hearume hale hai hene. Hale hai howa uruni ti bibahendeme íbu ngoai halu mo mbiraore howa Yosua halu Isaraeleali baba wai bule manda bini.

Ani biyago Hibiali biaru ti hameigini mbira Gibionoali hene. Tigua Yosua halu Isaraele hameigini biarume Yarigo tano timbuni biagobi Ai tanobi bo wahaya layago hale howa Yosua halu Isaraele wali agali biaru mo hondo hole manda bini. Ani manda buwa tigua tomo maru muwa nu ala tawe togobiwaini iba be nogo dongoneme wabinigo budubaga bini wiaru lebudai buwa bibahende nogo dongini mo yini. Tigua aga ala tawe ko lerelabagabi wiaru bialu ge su urubi ko lerelene lebini wiarubi bini. Tigua mberedibi bamba hirini ko hagamahe wiaru mo henene. Uruni mo hanalu tigua Yosua halu Isaraele wali agali Giligala dindini hearia puwa lalu, Iname ibirimadagoni dindi kaundiaoreha howa ibirima. Tígua ina baba habo nalolene bi mbira lo wimi̱ya ibirima, lene.

Ani layagola Isaraele agali biarume lalu, Tí hapara ho paluwa ke̱ haganego iname tí baba habo nalolene bi ogoni lo wulene hame naledama, lene. a 

Ani layagola tigua Yosuahondo lalu, Í̠ hame lareale bibelo ina í̠ andaneha kamagoni, lene.

Ani layagola Yosuahanda tihondo hale halu lalu, Tí ibini aibe. Tí dindi ani howa ibirimibe, lene.

Ani layagola tigua Yosuahondo bi ogobi lamini. Haru haga-o iname Anduane Homogo tínaga Ngode Datagaliwabe mini hale howa dindi kaundia onadege ndooreni howa ibirima. Iyibi dindini howa tínaga Ngode Datagaliwabe kagome biya layago hale harima. 10 Ibugua Amoroali Iba Yodana ni ibiragohayagi Hesebono dindinaga Kini Sihonobi Basana dindinaga Kini Oga ibu Asarodo dindini heagobi o biago labohondo biya layago hale harima. b  11 Inanaga haru hagane hearumebi wali agali bibahende hearumebi lalu, Tomo nolene maru manda manda bialu tí baba habo nalolene bi ogoni lo wule tí karia puwa tínaga hameme bilimulo tínaga andaneha birule lalu lamule pudaba, lalu inahondo laya. 12 Mberedi o henedamaru de handaramine. Pigane ibule ibirimaria pobohe ngabi bayale noabi henenego ibalu hangu hemaria o bidagoni handadaba. Togo bialu hagama hayada. 13 Waini iba be nogo dongoneme wabinigo ogoni gahengeha waini iba odo berelarima. Ai áyu togo bialu lerelabaga biyadagoni handadaba. Inanenaga agabi ge su urubi hariga lu kaundiaoreni howa ibalu hemaria budubaga bidagoni handadaba, lalu lamini.

14 Isaraeleali biaru tigua Gibionoali biarume tomo maru heneneyaru yamuwa nalu howa lalu, Mini mbiraore harama, lene. Tigua Anduane Homogohanda bi agi larabe hondole hale nahe howa ani bini. c  15 Yosuahanda habo nalolene bi lalu nenege hami̱ya lowa ti Gibionoali baba wai nabule tini henedagoria helo lalu lowini. Isaraele wali agali biaru haru haga hearume, Bi lo werama hada nabimi̱ya, lalu lene.

16 Habo nalolene bi biago lalu purogo lowa horo tebiru peagola Isaraeleali biarume mani hale halu hearia agali o ibiyaru ti kaware hapara howa heneyane hale hene. 17 Ani hale howa Isaraeleali biaru tigua talima horo tebiru puwa handalu hearia agali o ibiyaruni dindi timbuni Gibionobi Kebirabi Berodibi Kiriadi Yarimubi dindi urunialiyane hendene. 18 Isaraelealime bo waholene henge nawiyane hendene. Isaraele wali agalinaga haru haga biarume habo nalolene bi Anduane Homogo Isaraelealinaga Ngode Datagaliwabe minini lo winigome pugulene nawi manda buwa Isaraele wali agali bibahende hearume ogoni kagua biyada lalu haru haga biaruhondo bi hongo howa lene. 19 Ani layagola haru haga biaru tigua ladai bialu lalu, Ina habo nalolene bi lo wialu nabule larimago Isaraelealinaga Anduane Homogo Ngode Datagaliwabe minini howa larima. Anigo iname ti babe nahe kama. 20 Bi lo wirimagome ti ba nabi helo wahama. Barimayagua Ngode Datagaliwabehanda ina pani ngulebira. 21 Ti bo wanahe howa tigua inanaga ira ba halu iba uru hambia holene heloleberema, lalu Isaraeleali haru haga biarume ani lene.

22 Yosuahanda Gibionoali biaru olalu ibidaba lowa hale halu lalu, Tígua kaware hapara howa ina kaundia howa ibirima lalu ina mo hondo harimigo tene aginaga birimibe. 23 Tígua ogonibi birimigonaga Ngode Datagaliwabe ibugua tí kagua birimi ledagoni. Ani lowa lalu, Gibiono wali agali tí bibahende garabaya biabe ale bia haho wiaabo holeberemi. Inanaga Ngode Datagaliwabe kagonaga anda biabe bialu ira baha iba hambiaha bulene holeberemi, lalu lamini.

24 Ani layagola Gibionoali biaru tigua ladai bialu lalu, Haru haga-o ina hale halu hemaria Anduane Homogo tínaga Ngode Datagaliwabe ibugua Mosese lamialu lalu, Dindi ogo bibahende i̱na tí nguleberogo meramiangi wali agali ogoriani karu bibahende bo hilubaga bu wahai habe, layayago hale harima. Hale howa inane homolene gi howa o birimadagoni. 25 Áyu ina í̠ andaneha bedamagonigo í̠ hame lededagua berogo tigabida lowa manda bidedagua dege bibe, lene. 26 Ani layagola Yosuahanda Isaraelealihondo, Gibiono agali biaru bo wa nahadababe, lowa ibugua bime mo humbi hene. 27 Ani buwa ibugua Gibiono wali agali biaruni garabaya biabe ale bia helo helene. Gibionoali biaru tinaga biabe bulene ogobi Isaraele wali agalinagabi Anduane Homogo mbirale bo lomabu delaga dabunaga ira bahalu iba hambia halu bulene helene. Ogoniangi howa áyubi ti biabe ogoni Anduane Homogonaga mini mitangi bialu lotu lolenaga anda kagoria ira bo yu pu iba hambu yu pu biaabo haga ka.

Copyright information for `HUI