a4.6Pig 19.24
b4.10Man 28.57, Ese 5.10

Lamentations 4

Waitigirume Yarusaleme bo gialabaga biyagola ogobi wini

Ngolo bayale ngiringarale ala winigo áyu wá ereba halu mo ko hayada.
Ogonidagua Saiononaga wali agali ti to̱le̱ tara tara Anduane Homogonaga anda bulenaga loma bia heneru bayale wiaganegobi henego
ai ti tanonaga harigani to̱le̱ gialobagabu ngadagua ti bo haealobagabu wahayadago daraba.

Ala Saiono wandari igiri daliaheru ngolo bayaleore muni timbunime yolo miaganegobi henego
ai uruni ti áyu mini lene ndo howa agalime todobene be koru dindime wabu bila haganegobi kagoni.

Biango dudu angibuni karume tinaga igini wiaru mitangi buwa andu miaga ka.
Anigoyu i̱naga wali agali karume mana bayale biango dudu biarume biagadagua nabiaga.
Tigua tinaga waneiginiru dara nahe ega yarime ti iginiru wahalu piagadagua piaga ka.

Saiononaga wali agalime tinaga waneigini emene uruni andu noa halu kembobe lebole howa tomo noa halu homelo wahaga.
Waneigini urunime wali agali hearuha tomo ngidaba lalu hale hama ibaga biragolabi ti tomo mulene mbira nahaga.

Ala ti tomo nolene bayaleru bu payabu wiagago ai áyu homogo hearubi tomo nolene nawi burupaleore ka.
Ti tomo garibilo howa tanonaga hariga bu wiarunaga homo paya paya bigi bida.
Ala ti mbirale dewa buwi howa yári bayaleru bu henego ai ti yagibano howa mburuma uli wiaruha tomo budini ibira kabe hondole taya bialu haga.

Sodomo wali agalime ko biyagonaga pani mialu Ngode Datagaliwabehanda tinaga tano bayale winigo abaleore bo heda hene.
Tinaga pani ogoni bagi hene lowa i̱naga wali agalime ko biyagonaga pani timbuni taraore nalu hea. a 

Yarusalemeni agali haguane maru ala heneru tinaga tinginini ko mbira para nahe bayaleore hene.
Ti agali hongohe do mbarale halu to̱le̱ bayale mbira ngarale muni timbunime miaganegobi bu hene.

Ti harigani homo payabu wima peagola tinaga dengui mindi to̱ai leagola mbiralime abogoda lowa handabe nahe wini.
Tinaga tingini obialu kuni hangu wini.

Agali maru waime bayagola homayaru ti yo piyagonigo karulapeda.
Wali agali marume ti tomo nolene nawidagola garibi lalu lu howa homarago nakarulape.
Wali agali uruni ti tomo garibi lowa luore haabo halu tingini kunila para halu homai haga biaga.

10 Walirume tinaga waneigini daraore henegoyu homayagola tinaga tingini mo yalu puwa tini dawa nene. b 
Ogoni binidagoni waitigi hearume i̱naga wali agali baba wai bule ibiyangi ani bini.

11 Anduane Homogo ibugua Saionohondo keba taraore howa bo gialobagabu wahaya.
Ibugua Saiononi ira timbuni hedo dela haradagua buwa tano bibahende dai helaya.

12 Kini hearumebi wali agali tara tara dindi bibahendeha bu hearumebi
waitigirume Yarusaleme pabe panga harabani anda puwa bope halu tano karulolobadalo manda nabi haya.

13 Tigua ani nabibehe manda bu henego ogodagua biniya.
Yarusalemeniloma binigo mo miaga hearumebi bi manalatagi haga hearumebi mana ko bialu
tigua Yarusalemeni wali agali mini tigabi hearu bo wahai haya.
Ani biyagola Anduane Homogo ibugua waitigi hearume Yarusaleme bo gialobaga bu wahelo ibilene.

14 Loma binigo mo miaga biarubi bi mana latagi haga biarubi tinaga agani wali agali homelo bo wahayarunaga darama para hayagome ti Anduane Homogo deni dodohe howa nakarulape hene.
Haru haga urunime ti harigani pialu de kohe hagadagua luluyu ibagabu heagola wali agalime ti heagoria kaware hapara habe nahe haga biniya.

15 Wali agalime tihondo bi dalimu lalu, Tí dodohedago ina kamagoria kaware naibi habagi hadaba, lalu hayiya.
Haru haga biarume ti dindi tara taraha pugu pugu biya.
Dindi uruniha piyagola wali agali hearume ti íbu helo hame nalaya.

16 Anduane Homogo ibunime ti bo purogo lelalu ti mitangi nabi wahene.
Loma binigo mo miaga hearubi agali ala hene miniwi hearubi ti wali agali bu hearu deni mini lene ndo hene.

17 Ina agali hameigini mbirame ibalu pele ngialu haru dai bilo lowa
hariga wiaruha de handalu bu wimaria inanaga de tandaga biya.
Mbiralime ina biamogo bule naibiyagola ina bame harima.

18 Waitigirume ina bo wahole lowa harigani yu biraabo hayagola
ina hariga ibaga nabibehe harimagoni.
Inanaga hamaro bulene horo kaware hayada manda bialu ina bo waholene winiya.

19 Ina ibida pirimagola waitigime ina talima íbuore biyagoni.
Tigua geraiore lalu ega bodo hariaweme ega minule lowa ge dogolape ho yalu ibagadagua daiore ibiyagoni.
Tigua ina hari wiaruha talima dalialu
dindi ko dalu naibaga wiagoha pu hemariabi ina tagira ibilo lowa ti bira do howa minu yani hayagoni.

20 Tigua inanaga kini Anduane Homogohanda ina de hondo helo dabo helene biago minalu biya.
Iname mitangi bialu hemaria ina kini ogoni andaneha dindi maru ti bayale headagua dege holeberemada lo manda bu hemaore tigua ibu minaya.

21 Idomoaliru-o tí Usu dindini kamigoni howa Saiono bo gialobaga biyagonaga turu howa oba halu a̱e̱a̱ ka̱e̱a̱ bialu hadaba.
Anduane Homogohanda ibunaga keba holenewaini iba ale gabo beha hambu wiradagua binigo Saiono nelo mo na haya.
Ani biyadagua ibugua tíbi nalimulo ngiragola no luluyuore howa
tínaga tinginini aga bidemiru golo wahalu ti babe howa taga taraore ho holeberemi.

22 Saiono-o í̠na ko birigonaga Anduane Homogohanda í̠hondo pani ngiadai biyaruni ngia maro bialu
ibugua í̠naga wali agali garabayabu wiyaru golope helolebira.
Idomo-o Anduane Homogohanda ani bulebiragoyu ibugua í̠na ko birigo mo pani halu í̠hondobi ibunaga hongo holene walia holebira.
Copyright information for `HUI