a2.5Lg 1.27
b2.7Md 1.25
c2.10Pig 12.3, Md 28.19, Mg 1.15, Lg 24.47, Kl 1.23
d2.11Ais 9.6, Md 1.16, 1.21, Ab 2.36, Pb 2.11
e2.13Iba 103.20, Dan 7.10, Hi 1.14, Mo 5.11
f2.14Ais 57.19, Lg 19.38, Lm 5.1, Eb 2.17, Kl 1.20
g2.16Lg 2.10-12
h2.19Lg 1.66, 2.51
i2.21LBM 12.3, Md 1.21, 1.25, Lg 1.31, 1.59
j2.22-24LBM 12.1-8
k2.23Har 13.2, 13.12-15, Dag 3.13, 8.17
l2.25Ais 40.1, 49.13, Mg 15.43, Lg 2.38
m2.26Iba 89.48, Hi 11.5
n2.29Pig 46.30, Pb 1.23
o2.30Ais 52.10, Lg 3.6, Ta 2.11
p2.32Ais 9.2, 42.6, 49.6, 52.10, 60.1-3, Md 4.16, Ab 13.47, 28.28
q2.34Ais 8.14, Hos 14.9, Md 21.42, Ab 28.22, Lm 9.32-33, 1 Ko 1.23, 1 Pi 2.7-8
r2.35Iba 42.10, Yo 19.25
s2.37Ab 26.7, 1 Ti 5.5
t2.38Ais 52.9, Mg 15.43, Lg 2.25, 24.21
u2.39Md 2.23
v2.40Lg 1.80, 2.52
w2.41Har 12.1-27, 23.14-17, 34.23, Man 16.1-8
x2.49Yo 2.16
y2.50Lg 9.45, 18.34
z2.51Lg 2.19
aa2.521 Sml 2.26, Min 3.4, Lg 1.80

Luke 2

Merihanda Yasu taba henenego ogo

(Madiu 1.18-25)

Horo uruningi Lomo agali mini Ogasadasa ibu Kini howa ibugua wali agali handame ho hearu bibahendenaga mini gili biai holene nga lowini. Gabumane agali mini Kuiriniasa ibugua wali agali Siria dindini hearu haru hearia mini gilibu wulene pigane ogoningi wini. Ogonidagua howa wali agali bibahende tinaga dindi tene pugu pugu bialu bebani mini gilibu wule pene.

Ani bialu Yosebe ibu Galilihayagi Nasarete tano howa Yudiahayagi Bedeleheme tano ogoniha pene. Bedeleheme ogoriani bambaore handame haga Kini Debidi ibu hene. Yosebe ogoniha penedagoni ibu Debidinaga aguanene howa pene. Yosebe ibu one Meri ayuore degedabu bule lo berelenego libu haru mini wule pene. Meri ibu tombeha gali bere berenego a  libu Bedelehemeni hearia Meri ibu gali taba honolene tu hene. Ani hayagola Meri ibu igiri mbira pigane taba honowa labolabome huba buwa nogo bulumaga tomo naga mbogoyi wiagoha pale lene. Mbogoyi ogoniha pale lenedagoni irane wali agali palu ngoai hagane anda heago to̱la tagi hai howa henge nawiyagola bini. b 

Dahuliyalime nogo sibi haru hagaruhondo bi lenego ogo

Dindi ogoninaga mbirahayagi nogo sibi haru haga maru hearume ti mbiragani tinaga nogo sibi tagirahayagi haru hene. Ani haru hearia Anduane Homogonaga dahuliyali mbira ha pani hayagola Anduane Homogonaga wá taraore holene ti heagoria hadali hene. 10 Ani biyagola nogo sibi haru haga biaru ti gi howa mogo timbuniore lo hene. Ani gi ho heago hondowa dahuliyali biagome lalu, Gi nahadababe. I̱na wali agali bibahende bu karu turu hai holenenaga bi bayale langule íbu kogo. c  11 Áyu mbiraga ogoni Debidinaga tano ngagoriani tínaga Pele Ngiaga íbu kago ibu Anduane Homogo Keriso ka. d  12 Ogoni heneneoreda manda bilimulonaga igiri gali ogoni ibu nogo bulumaga tomo naga mbogoyi ngagoha labolabome huba buwa pale ledaria handa walia holeberami, lene.

13 Dahuliyali biagome bi ogonidagua lamiyagola abaleore dahuliyali dewaore dahuliyali mbira abale íbu hayago heba mandagi ha pani hene. Ha pani ho howa Ngode Datagaliwabenaga mini yaraga halu iba gana lalu, e 

14 Ngode Datagaliwabe dahuliya andaga daligaore kagonaga mini yaraga holene nga. f 
Wali agali dindi bibahendeni Ngode Datagaliwabehanda turu ho karu
tinaga gubaliniha Ngode Datagaliwabehanda mo palia ho ka,
lene.

Nogo sibi haru haga agali ti Yasu hondo penego ogo

15 Ogonidagua lalu dahuliyali biaru ti dahuliya andaga dai bini. Dai biyagola nogo sibi haru haga biarume tini lo mitangi bialu lalu, Áyu ogoni Anduane Homogohanda galone mbira inahondo walia hayagoni handami̱ya Bedeleheme ma nalare, lene.

16 Ani lalu ti abaleore Bedeleheme pialu Meri Yosebela berearia handa walia howa Yasubi mbogoyi nogo bulumaga tomo naga wiagoha paleria hendene. g  17 Tigua igiri gali biago handalu howa bi bibahende dahuliyali biagome ogoni agua bulebira layagola hale ho yayago Meri Yosebela lamiai hene. 18 Ogonidagua lamiai hayagola wali agali bibahende bu hearume nogo sibi haru haga biarume layago hale hai hene. Hale howa ti mini burugu lowa mogo lai ho hene. 19 Meri ibugua nde bi bibahende layane hale halu ibunaga miniha mo pe hai howa mitangitangi bialu berene. h  20 Ani bialu nogo sibi haru haga biaru dahuliyali biagome aguaore bulebira lalu lamiyadaguaore biai hayagola hale hayagonagabi deme handayagonagabi ti dai bialu howa Ngode Datagaliwabenaga mini yaraga hama pene.

Yasu mini winigo ogo

21 Ogonidagua buwa horo halini bolangua hayagola igiri gali biagonagadongone podo mabu bia halu howa ibunaga mini Yasu wini. Yasu mini ogoni ibu ai̱ya Meri tombeha gali nabere howa dahuliyalime ala, Yasu wibe, lalu lamiyadagua wini. i 

Ana Simionola libu Anduane Homogonaga andaha hearia Yasu yalu ibinigo ogo

22 Mosese heneyangi waneigini ai̱ya abalame bulene winigoMana lowinigodagua bulene tu hayagola Yosebe Merila libugua igiri biago Anduane Homogohondo lomabu mule Yarusaleme yalu pene. j  23 Ogoni tene agi Anduane Homogo ibunaga mana lowini ngago ogo, Igiri pigane wahene walime taba hanaragola howa igiri ogoni Anduane Homogohondo loma bia holene nga, lalu gilibu nga. k  24 Mana mendebi lowinidagua Yosebe Merila libugua bule pene. Mana mende lowini ngago ogo, Ega malibu ale kirayaguabi ega malibu ale dege emene tara igini kirayaguabi Anduane Homogohondo bo mulene nga lowinidagua bo mule pene.

25 Ogoningi agali mbira mini Simiono ibu Yarusalemeni hene. Agali ogoni ibu Ngode Datagaliwabe mitangi bialu bayale biagabi Ngode Datagaliwabehanda Isaraele wali agali pele milo manda bu hagabi hene. Simiono ibu Ngode Datagaliwabe Dininihe hene. l  26 Ngode Datagaliwabe Dinini ibugua Simionohondo ala lowa lalu, Í̠ nahome keore Anduane HomogohandaMbirali Dabo Helenego ibulebira lowinigo íbu kagola hondolebere, lalu lamini. m  27 Ani lamuwa Ngode Datagaliwabe Dinini ibugua Simiono Anduane Homogonaga anda heago tamuha haru anda pene. Haru anda piyagola Yasunaga aba ai̱yalameMana lowinidagua libunaga igini Ngode Datagaliwabehondo lomabu mule taba yalu ibini. 28 Ani taba yalu ibiyagola Simiono ibugua Yasu gime taba yuwa Ngode Datagaliwabenaga mini yaraga halu ka̱i̱ lalu ogodagua lene.

29 Anduane Homogo í̠na bi bamba langirigo lola harago n 
í̠naga biabe bia hagane o kogo i̱naga gubalini mo palia howa i̱ homolene karulape kogoni.
30 I̱ninaga deoreme í̠na pele mulene ngulebero larigoni hendedo. o 
31 Í̠na ogoni mo manda manda bu wirigo wali agali bibahendeme de hendelo birigoni.
32 Ibu wá holene howa Yu wali agali ndo tara tara karume í̠naga mana manda bilo mo walia holebi p 
í̠naga Isaraele wali agali kamarunaga mini mo yaraga holebi kagoni,
lalu Simionohanda lai hene.

33 Simionohanda bi ogoni Yasu mitangi bialu layagola hale howa Yasunaga aba ai̱yala libunaga minime mogo timbuni lene. 34 Ani biyagola Simionohanda ti mo turu halu igiri ai̱ya Merihondo bi ogodagua lamini. Ibugua lalu, Hale ha. Igiri ogoni ibugua Isaraele wali agali dewa maru mo pila helo maru mo heya helobi Ngode Datagaliwabehanda ibu dabo helene. Ibu Ngode Datagaliwabenaga manane kago hondowa wali agali dewame ibuhondo bi ko lalu handabe manga howa q  35 tinaga miniha manda bu kagobi la pani holebira. Ani biragola dara bulene ogoni wai bulene ayu tibu nehe aleme í̠naga gubaliniha anda poragola tandaga biraligobi bulebira, lalu Merihondo lamini. r 

36 Ogoningi wali dalo mbira waheore mini Ana ibu Ngode Datagaliwabe bi manalatagi haga berene. Ibu Asa hameigini mbira mini Penuelenaga wane berene. Ala ibu agali puwa ibu agalinila bereane mali karia pene. Ani pu berearia ibu agalini homene. Ibu mali pira halirani maria (84) biraabo howa waheore berene. Ani biruwa ibu Anduane Homogonaga andaha horo mbira yu wa nahe biraabo haga berene. Ibugua Ngode Datagaliwabe mitangi bialutomo nane howa ibuhondo bi laabo halu horombe mbiragabi ani biraga berene. s  38 Ogonidagua biaga berenego Yosebe Merilame Anduane Homogonaga andaha Yasu taba yu hearia hondowa Ana ibu kaware ibalu ibugua Ngode Datagaliwabehondo ka̱i̱ lene. Ani lowa ibugua wali agali Ngode Datagaliwabehanda pele ngilo Yarusalemeni hondo hearu tihondo igiri ogoninaga te lamiai hene. t 

Ti Nasarete dai binigo ogo

39 Yosebe Merila libugua Anduane Homogohanda bi mana lowinidagua biai halu Yasu taba yalu ti tini andaga Galiliha tano mbira winigo mini Nasarete dai bini. u  40 Dai bu heagola Yasu ibu anda halu hongo hayagola mini boga bialu mini gigabiwi holene ibuha to̱ laihe hene. Ani bu hayagola Ngode Datagaliwabenaga turu howa biamogo bia holeneru ibuha wini. v 

Yasu igiri emene howa Anduane Homogonaga andaha pu henego ogo

41 Mali bibahendengiBolangua Halu Penegonaga Horo haragola Yasu ai̱ya abala libu Yarusaleme piaga hene. w  42 Yasu ibunaga mali pira mbirani kira (12) hayagola ibu ti heba pene. 43 Tomo nolene horo uruni piai hayagola libu andaga dai bialu hene. Yasu ibu Yarusalemeni helo wahalu manda nabi howa libu hangu dai bialu hene. 44 Ibu wali agali maru ibiradagua ibirabe toba howa libu horo mbiru puabo hene. Ani buwa libugua Yasu tai bialu libunaga damenerubi wali agali marubi tihondo, Yasu de handarimibe, lalu tai bialu hene. 45 Tai biaabo halu libugua Yasu handa walia nahe howa Yaruselemeni ibu tai bima dai bini. 46 Horo kiru howa tebonengi Anduane Homogonaga andaha puwa libugua Yasu Yu agali lawai hagaru heba biralu tigua bi layago hale halu biruwa bi ladai bialu berearia handa walia hene. 47 Yasuhanda bi layago hale ho hayarume ibu mini timbuniwi howa ladai biyago hale howa ti minime mogo lo hene. 48 Ibu ai̱ya abalame Yasu de hondowa miniha mogo lowa ibu ai̱yahanda ibuhondo lalu, Igini-o iyahondo ogoni birigo aginagabe. Í̠ aba iyame mini burugu lowa í̠ tai biaabo halu hariba, lene.

49 Ani layagola ibugua ladai bialu lalu, Libugua i̱ tai biribidago agibe. I̱ Abanaga andaha i̱ holene ngago manda nabi haribibe, lene. x  50 Bi ani layago hale howa libu manda nabi irane aginaga larabe toba ho hene. y 

51 Ani biyagola howa Yasu ibu ai̱ya abala heba Nasarete dai buwa libugua bia layadagua ibugua biai halu hene. Urunidagua bigi biyagola ibu ai̱yahanda ibunaga miniha mitangitangi bialu biraabo hene. z  52 Yasu ibu tingini minibi boga bialu ibu mini gigabi wialu anda hayago hondowa Ngode Datagaliwabehandabi wali agali hearumebi ibuhondo turu hai ho hene. aa 

Copyright information for `HUI