a22.1Har 12.1-27
b22.2Iba 2.2, Lg 20.19, Ab 4.27
c22.3Md 26.14, Mg 14.10, Lg 4.13, Yo 13.2, 13.27
d22.5Seg 11.12
e22.7Har 12.1-27
f22.13Lg 19.32
g22.16Lg 13.29, 14.15, Ab 10.41, Mo 19.9
h22.19Md 26.26, Mg 14.22, Lg 24.30, 1 Ko 11.24
i22.20Yar 31.31-34, 1 Ko 10.16
j22.21Iba 41.9, Md 26.21-23, Mg 14.18, Yo 13.21-22, 13.26
k22.22Md 26.24, Ab 2.23, 4.28
l22.23Md 26.22, Yo 13.22, 13.25
m22.24Md 18.1, Mg 9.34, Lg 9.46
n22.25Mg 10.42-45
o22.25-26Md 20.25-27, Mg 10.42-44
p22.26Md 23.11, Mg 9.35, Lg 9.48, 1 Pi 5.3
q22.27Md 20.28, Lg 12.37, Yo 13.12-15, Pb 2.7
r22.282 Ko 1.7, 2 Ti 2.12, Hi 4.15
s22.29Lg 12.32
t22.30Iba 49.14, Md 19.28, 1 Ko 6.2, Mo 3.21
u22.31Amo 9.9, 2 Ko 2.11, 1 Pi 5.8
v22.32Iba 51.13, Yo 17.9-11, 17.15, 17.20, 21.15-17
w22.33Lg 22.54
x22.34Md 26.34, Mg 14.30, Yo 13.38
y22.35Md 10.9-10, Mg 6.8-9, Lg 9.3, 10.4
z22.36Lg 22.49
aa22.37Ais 53.12, Mg 15.28, Lg 22.52
ab22.39Lg 21.37, Yo 18.1
ac22.40Md 6.13, 26.41, Mg 14.38, Lg 22.46
ad22.42Md 6.10, Yo 5.30, 6.38
ae22.44Yo 12.27, Hi 5.7
af22.47Md 26.47, Mg 14.43, Yo 18.3
ag22.49Lg 22.36
ah22.52Lg 22.37, Yo 7.30, 8.20, Kl 1.13
ai22.53Lg 19.47, 21.37, Yo 12.27
aj22.54Iba 31.11, Lg 22.33
ak22.56Ab 4.13
al22.61Lg 22.34
am22.67Yo 3.12, 8.45, 10.24
an22.69Ab 7.56, Hi 1.3, 8.1
ao22.70Lg 4.3, 4.9

Luke 22

Yasu homelo bole manda manda binigo ogo

(Madiu 26.1-5, Maga 14.1-2, Yone 11.45-53)

Mberedi Yidi Nahe Hirinigo HoronagabiBolangua Halu Penegonaga Horonagabi kaware wini. a  Ogoningiloma binigo mo miaga haguane hearumebiMana lowinigo lawai haga hearumebi wali agali dewa bu heagola gi howa tigua ohowa Yasu bo donge hole henge tai bialu hene. b 

Yudasahanda Yasu ndelole penego ogo

(Madiu 26.14-16, Maga 14.10-11)

Ani biyagola Yasunaga talima piaga hombeanego Yudasa ibu mini mende Isagariodo laga henego ibuha dama Heyolabe anda pene. c  Ani piyagola Yudasahanda loma binigo mo miaga haguane hearubi Anduane Homogonaga anda mamage hagarunaga haru haga hearubi hearia puwa ti baba bi lalu, I̱na Yasu aguaore berogola minalimu, lowa ndelalu hene. Ani layagola agali biarume turu taraore howa tigua, Muni nguluma̱ya, layagome Yudasanaga mini bamini. d  Ani buwa ndelo waho ngelalu puwa Yudasahanda wali agalime nahendedaha tihondo Yasu minu mule lowa henge aguaore ngabe hondole tai bialu hene.

Bolangua Halu Penego Horonaga tomo nole Yasuhanda manda manda binigo ogo

(Madiu 26.17-25, Maga 14.12-21, Yone 13.21-30)

Mberedi Yidi Nahe Hirinigo Horonaga uruni mbirangiBolangua Halu Penegonaga nogo sibi iginiru bolene tu hene. e  Ani hayagola Yasuhanda Pida Yonelahondo lalu, Bolangua Halu Penego Horonaga tomo ina noloma̱ya dawa manda manda bu wule pudaba, lene.

Ani layagola libugua ladai bialu lalu, Agoha dawa wule pudaba laribe, lene.

10 Ibugua lalu, Yarusalemeha anda pialu kabiria agali mbira iba be payani yalu pialu karia lola holeberabigo agali ogoni ibu anda poradagua anda pilibu. 11 Anda pu howa anda ogoni anduanehondo agua lalibu, Lawai haga kagome í̠hondo lalu, I̱naga talima piaga karubi i̱bi iname Bolangua Halu Penego Horonaga tomo noloma̱ya anda hobane mbira agoha ngabe, laya lalibu. 12 Ani larabigola ibugua anda hobane mbira daligaha ngago dagia manda bu winigo walia holebirago ogoriani tomo dawa manda manda bu wilibu, lene.

13 Ani laya handala libu pialu hebiria mbirale bibahendeore Yasuhanda agua bulebira layadaguaore bu wiai hearia hondowa libugua Bolangua Halu Penegonaga tomo nole dawa manda manda bu wini. f 

Anduane Homogonaga tomo nenego ogo

(Madiu 26.26-30, Maga 14.22-26, 1 Korindi 11.23-25)

14 Tomo nolene tu hayagola Yasu ibu biragane dagiani ibunagaabosolo agali biaru heba tomo nole berene. 15 Ani biruwa Yasuhanda tihondo lalu, I̱ tandaga nane howa tí hebaBolangua Halu Penego Horonaga tomo ogo ala nole hame timbuni lalu haru. 16 Ogoninaga tí langerogo i̱na áyu narogonidagua lone nane Ngode Datagaliwabehanda Handame Ho Kagoriani howa ogoninaga galone lola harangi nolebero, lene. g 

17 Ani lowa Yasuhanda iba be yamuwa Ngode Datagaliwabehondo turu halu ka̱i̱ lowa lalu, Ogo yamuwa tínime no gombedaga bidaba. 18 I̱na tí langerogowaini iba áyu o narongi howa nane kone Ngode Datagaliwabehanda Handame Ho Kagola howa nolebero, lene.

19 Ani lowa ibugua mberedi mbira yamuwa Ngode Datagaliwabehondo turu halu ka̱i̱ lowa gaibu baga buwa tihondo mialu howa lalu, I̱naga tingini ogonigo tí pele ngialu ngerogo. Ogoni nalu howa i̱ mitangi bialu nalimu. h  20 Mberedi ogoni nai howa ogonidagua dege ibugua iba be yamialu howa lalu, Be ogoniha bedago Ngode Datagaliwabehanda habo nalolene bi gahenge lowinigo tene i̱naga daramaha nga. I̱naga darama ogoni tínaga pela harogoni. i 

21 Anigo mbirali i̱ minilo ndelalu walia holebirago i̱ bedogoria tomo nalu bedagonigo de handadaba. j  22 Ngode Datagaliwabehanda manda bu winidagua Agali Hole Ibiyago homolebira. Ibu minilo ndelalu walia haragome ibunaga mo ko holene timbu gibiore wulebirago dara holene nga, lene. k 

23 Ani layagola tini dege dege la a̱i̱ na̱i̱ bialu lalu, O bulebira layagoni a bedagome bulebira layabe, lalu berene. l 

Yasunaga talima piaga biarume, Bolangua ho kago aibe, lowa lai lenego ogo

24 Talima piaga biarume lai lalu howa, Ina bolangua hole haruago aibe, lalu hene. m  25 Ani lalu heagola Yasuhanda tihondo lalu, Wali agali tara taranaga kini karume hongo yu howa handame haga ka. Ani buwa wali agali haru haga karu ti mini Wali Agalinaga Biamogo Biagaru laga ka. n, o  26 Anigo tígua ogonidagua holene nawiore. Tí kamigoni mbiralime bolangua ho kagome mo heyogone ale ho holene nga. Ani buwa haru haga kagome biabe bia hagane ale ho dai bulene nga. p  27 Timbuni kago aibe. Mbirali birape howa tomo nalu bedagodabe be ibu tomo nelo mo yu tono bialu kagodabe. Mbirali birape howa tomo nalu bedago ibuore timbuni kagoda. Anigo i̱ tí baba mandagi howa biabe bia hagame kagodagua kogoni. q 

28 I̱ tandaga nalu harungi tí i̱ heba haabo harimigoni. r  29 I̱ Abahanda handame ho holenenaga hongo i̱hondo ngiyagobi i̱na nde tíhondo ogonidagua dege ngulebero. s  30 Ani buwa i̱na Handame Ho Holene ngagoria howa i̱naga dagiani tígua tomo ibabi nalu biruleberami. Ani buwa tígua haru hagane biraganeni biruwa Isaraele hameigini homberiaru (12) haru holeberami, lene. t 

Yasuhanda Pidahondo, Í̠na i̱ manda nabido lolebere, lenego ogo

(Madiu 26.31-35, Maga 14.27-31, Yone 13.36-38)

31 Saimono-o Saimono-o í̠na hale habe. Tomo hangaga agalime ladi ale mini widi bogabidagola lini aeanela mo talebu ki biagadagua dama Heyolabeme tí bibahende ko bayalela talebu ki helo Ngode Datagaliwabehanda ibuhondo henge mini. u  32 Ani biragola í̠na mini mbiraore wu kego hado wa nahabelonaga i̱na Ngode Datagaliwabehondo í̠naga bi la halu ko. Ani buwa i̱ kogoria daibu howa í̠na talima piaga maru karu mo hongoore habe, lene. v 

33 Ani layagola Pidahanda ladai bialu lalu, Anduane Homogo-o í̠ garabaya andaha poredagua pialu homaredaguabi mandagi homabiyaore manda bu kogoni, lene. w 

34 Ani layagola Yasuhanda lalu, Pida-o í̠hondo langerogo áyu mbiraga ega gogologome bi naledaha halu teboore í̠na i̱ manda nabido lolebere, lene. x 

Muni pauyibi nubi wai bulene ayu tibubi yu holenenaga ogo

35 Ani lowa Yasuhanda ibunaga talima piaga biaruhondo lalu, I̱na tí bi mana lawai hama pilimulo tígua muni pauyibi nubi ge subi nayi pilimu larungi mbirale mbira buru palu harimibe, lene. y 

Tigua ladai bialu, Naburu paleore harima, lene.

36 Yasuhanda lalu, Anidago áyu ogoni mbiralime muni pauyibi nubi yidago yalu polene nga. Ani buwa mbiralime wai bulene ayu tibu nayi kayagua ibuninaga dagare tingiliya bidagome yolo muwa mbira yolo bulene nga. z  37 Ogoninaga i̱na tíhondo langerogo Anduane Homogonagambugani lo ngago ogo, Ko biagame pani nalu homagadagua ibuguabi homolebira, lalu gilibu ngadagua i̱ mitangi bialu lola holeneore nga. Irane i̱ mitangi bialu bi gilibu ngadagua áyu lola haragoni, lene. aa 

38 Ani layagola ibunaga talima piaga biarume lalu, Anduane Homogo-o iname wai bulene ayu tibu kira yidamago handarene, lene.

Ibugua lalu, Ogoni karulape, lene.

Yasu Hari Olibe weagoria Ngode Datagaliwabela bi lalu henego ogo

(Madiu 26.36-46, Maga 14.32-42)

39 Yasu ibu Yarusalemeni howa abale piagadagua pialu Hari Olibe weagoha pialu howa ibunaga talima piaga biaru ibu heba pene. ab  40 Ti hari weagoria anda pu howa Yasuhanda ibunaga talima piaga biaruhondo lalu, Ko ngagome tí ko mo bia holigo Ngode Datagaliwabehondo bi lalu halimu, lene. ac 

41 Ani lalu Yasu ibu ti helalu ibuni hangu amura mbiraha ege to̱le̱ agima ba amu haralidagua puwa ge duli hanga ho biruwa ibugua Ngode Datagaliwabela bi lalu, 42 Aba-o tandaga nolene beha ngago nanoliya mo yalu polene ngayagua mo yalu pobe. I̱ hame ledodagua ndo í̠ hame lededagua hangu bibe, lene. ad  43 Ani lalu berearia dahuliya andaga howa dahuliyali mbirame ha pani howa ibu mo hongo hene. 44 Ibu mini burugu lowa tibalua howa bede labeheore howa donge halu hongo howa Ngode Datagaliwabela bi layagola tingini poboyogo bialu pingitigi darama ale dindini bondolope hene. ae 

45 Ibu Ngode Datagaliwabela bi lai halu talima piaga biaru birayagoria dai bialu hearia tini dara timbuniore hayagome palia hondo hearia hendene. 46 Hondowa ibugua tihondo lalu, Agi bialu padamibe. Ko ngagome tí ko mo bia holigo heyuwa Ngode Datagaliwabehondo bi lalu hadaba, lene.

Yasu mininigo ogo

(Madiu 26.47-56, Maga 14.43-50, Yone 18.3-11)

47 Yasuhanda ibunaga talima piaga biaru heba bi lalu hearia ibunaga talima piaga hombeane Yudasa henegome agali dewa haru halu ibini. Yudasa ibu abale ibuwa Yasunaga peni nu̱nu̱ lole ibini. af  48 Ani ibiyagola Yasuhanda Yudasahondo lalu, Agali Hole Ibiyago minule beramidago ani nu̱nu̱ lowa minule beramibe, lene.

49 Ibunaga talima piaga ibu heba hayarume ogo aleore bulubada manda buwa Yasuhondo lalu, Anduane Homogo-o ina wai bulene ayu tibu yidamagome agi bulumabe, lene. ag  50 Ani lowa ti mbiragomeloma binigo mo miaga haguane timbuni heagonaga garabaya biabe ale bia haga heagonaga hale tigago bagadape hene.

51 Ani biyagola Yasuhanda lalu, Ogonidagua nabulene, lowa ibugua agali biagonaga hale biago ela howa lone mo heladai bini.

52 Ani buwa Yasuhanda loma binigo mo miaga haguanerubi Anduane Homogonaga anda mamage hagarunaga haru hagarubiagali ala hene miniwirubi ibu minule íbu hearuhondo lalu, Tígua wai bulene ayu tibu kangoru yalu ibirimidago pageali minaramilidagua minule ibirimibe. ah  53 I̱ horo bibahende tí heba Anduane Homogonaga andaha haabo harungi mina nabirimi. Anigo áyu ogoni aruma holenenaga hongome bolangua ho kagoni howa bialu harimida, lene. ai 

Pidahanda, Yasu manda nabido, lenego ogo

(Madiu 26.57-58, 69-75, Maga 14.53-54, 66-72, Yone 18.12-18, 25-27)

54 Tigua Yasuloma binigo mo miaga haguane timbuninaga andaha minu yalu piyagola Pida ibu amuraore howa mayu̱lo handaga bima pene. aj  55 Ani buwa pabe payanda heago tamuha anda puwa Pida ibu ira deagoria maru bira mabu bu bereagoria mandagi berene. 56 Ani bereago hondowa biabe bia haga wandari mbirame Pida handa kia biaabo howa lalu, Agali o bedagobi Yasula mandagi haga, lene. ak 

57 Ani layagola Pidahanda lalu, Wali i̱ ndo. I̱ mandabi heba nabido hendeni, lene.

58 Ani layagola emeneore howa agali mbira heagome Pida manda buwa lalu, Í̠bi ibu heba hariligoni ndobe, lene.

Ani layagola Pidahanda lalu, Agali i̱ ndoya hendeni, lene.

59 Ani layagola emene howa agali mbira heagome hongo howa lalu, Agali ogoni Galilialioredago Yasulaore haga, lene.

60 Ani layagola Pidahanda lalu, Agali o laregoni agi larebe i̱ tobaho ko hendeni, lene.

Ogonidagua lalu heaore ega gogologome bi lene.
61 Bi layagola Anduane Homogohanda Pida handa kia biyagola Pida ibugua Anduane Homogohanda, Áyu mbiraga ega gogologome bi naledaha halu teboore í̠na i̱ manda nabido lolebere, ala layago mitangi bu dai bini. al  62 Ani mitangi buwa Pida ibu tagira pialu dugu emene ndoore yi lalu dugu bialu hene.

Tigua Yasu mege bialu benego ogo

(Madiu 26.67-68, Maga 14.65)

63 Agali maru Yasu mamage ho hayarume mege taraore bialu hale to̱a̱ baga bini. 64 Ani buwa ibunaga de agame yi howa ibuhondo lalu, Í̠na manda biade halu í̠ bayagoni ogome la, lene. 65 Ani lowa tigua ibuhondo bi ko dewa laga bini.

Ganisolo agalirume godi lelo Yasu haru penego ogo

(Madiu 26.59-66, Maga 14.55-64, Yone 18.19-24)

66 Egerebagi ni tagira ibiyagolaagali ala hene miniwi hearubiloma binigo mo miaga haguane hearubiMana lowinigo lawai haga hearubi mandagi mo mogo buwa tiGanisolo agali heagoria godi lelo Yasu haru ibini. 67 Haru ibuwa tigua Yasuhondo lalu,Mbirali Dabo Helenego ibulebira lowinigo í̠ ibu keyagua í̠na langi, lene. am 

Ibugua ladai bialu lalu, I̱na tí langiruyagua tígua i̱hondo mini mbiraore nawuleberami.
68 Ani lalu i̱na tíhondo bi maru hale haruyaguabi ladai nabuleberami. 69 Tu áyu ogoni howa be lirayagi Agali Hole Ibiyago ibu Ngode Datagaliwabe Hongo Haiheore Kagonaga gi tigahayagi birulebira, lene. an 

70 Ani layagola ti bibahendeme ibuhondo lalu, Ngode Datagaliwabe Iginiore í̠ kegonibe, lene. ao 

Yasuhanda ladai bialu tihondo lalu, Tígua ani larimigoni, lene.

71 Ani layagola tigua lalu, Lamogo bia holene mbira hame naleore kamagoni. Inaneme ibuni layagoni hale hai ho kama, lene.

Copyright information for `HUI