a24.4Ab 1.10
b24.5Lg 2.9
c24.6-7Md 16.21, 17.22-23, 20.18-19, Mg 8.31, 9.31, 9.31, 10.33-34, Lg 9.22, 18.31-33
d24.9Mg 16.10
e24.10Lg 8.3
f24.11Mg 16.11, Lg 24.25
g24.15Md 18.20, Lg 24.36
h24.16Yo 20.14, 21.4
i24.18Yo 19.25
j24.19Md 21.11, Yo 6.14, Ab 2.22
k24.20Lg 23.1, Ab 13.27-28
l24.21Lg 1.68, 2.38, 19.11, Ab 1.6
m24.22Md 28.8, Mg 16.10, Lg 24.1-11, Yo 20.18
n24.24Yo 20.3-10
o24.26Lg 9.22, 24.44, Ab 17.3, 1 Pi 1.11
p24.27Pig 3.15, Dag 21.9, Man 18.15, Iba 22.1-21, Ais 7.14, 7.53, Dan 9.24, Mal 3.1, Yo 13.31, Ab 3.13
q24.30Md 14.19, Lg 22.19
r24.341 Ko 15.4-5
s24.361 Ko 15.5
t24.37Md 14.26
u24.41Yo 21.5
v24.44Md 16.21, 20.18, Mg 8.31, Lg 9.22
w24.45Lg 24.27, Ab 16.14
x24.46Iba 22, Ais 50.6, 52.14—53.12, Hos 6.2, Lg 24.26, Ab 17.3
y24.47Ais 49.6, 49.22, Yar 31.34, Mai 4.2, Mal 1.11, Md 28.19, 1 Ti 3.16
z24.48Yo 15.27, Ab 1.8, 1.22, 2.32
aa24.49Ais 44.3, Yol 2.28, Yo 14.16, 14.26, 15.26, 16.7, Ab 1.4
ab24.51Yo 20.17, Eb 4.8
ac24.52Yo 14.28, 16.22
ad24.53Ab 2.46, 5.42

Luke 24

Yasu ibuni mo heya henego ogo

(Madiu 28.1-10, Maga 16.1-8, Yone 20.1-10)

Horo Sandengi egerebagiore wali biarume mbirale ngabiru mo manda manda bu wiyago mo yalu Yasu hora hayagoha pene. Homali egeanda wiagoria puwa handalu hearia panga biago dugua ho wiaria hendene. Hondowa Anduane Homogo Yasu tingini ngabe hondole anda pialu hearia nawiyane hendene. Ani biyiyagola wali biarume mini dege dindi howa o biagoria hearia agali kira aga pele de mborerebi ogobi labo labo ti heagoria abaleore ha pani hene. a  Ani biyagola wali biarume gi howa dindini bulu palene. Bulu paliyagola agali biago labome wali biaruhondo lalu, Agali heyu kago tí homene wiagaha tai beramigo agibe. b  Ibu ogoha nawi ibuni mo heya halu piya. Ibugua Galilini howa langiyago mitangi bu dai bilimu. c  Agali Hole Ibiyago ko biaga karuhondo minu mulebira. Ani minu miragola tigua ibu ira bangani ba para haragola horo kiru howa tebonengi ibuni mo heya holebira, layagoni, lene. Ani layago hale howa wali biarume Yasuhanda bi ogoni ala layago mitangi buwa homali biagoria howa dai buwa mbirale handayagobi hale hayagobi ibunaga talima piaga bereali biarubi maru hearubi lamiai hene. d  10 Wali uruni mini Magadala wali Meribi Yoanabi Yamese ai̱ya Meri imaru tibi wali maru heba piyarubi o biyaruniabosolo agali biaru lamiai hene. e  11 Wali biarume ani layagola abosolo agali biarume wali bame mini nawi howa lara manda buwa ti mini kira kira wu hene. f  12 Ani biyagola Pida ibu abale heyalu egeanda biagoha gerai puwa bulu paluwa handa anda halu hearia maru nahende labolabo ibu kabu bini biago dege wiaria hendene. O biyiyago hondowa ibu mini dege dindi ho yalu andaga dai bini.

Agali kirali Emaiasa harigani pialu henego ogo

(Maga 16.12-13)

13 Horo ogoningi Yasu haruru piaga henego agali kirali Yarusaleme howa kilomida bearia (11) agima bolangua halu dindi mbira mini Emaiasa pole pene. 14 Harigani pialu howa mbirale biyarunaga libuni lade̱le̱ bigi bima pialu hene. 15 Ani lade̱le̱ bigi bima pialu hebiria Yasu ibuni kaware ibalu libu piyadagua pene. g  16 Ani biyagola handa handayago aguabe tobane buwa libugua ibu ogoore kagonilo manda nabi hene. h  17 Ani buwa Yasuhanda libuhondo lalu, Harigani ibaabo halu howa agi dege lade̱le̱ bigi bima eberabibe, lene.

Ani layagola libunaga dengui dara biniore howa ema nabi hondo hene.
18 Agali mendego mini Kiliobasa henegome ladai bialu lalu, Mbirale abe lebe dege biyago manda nabini í̠ dege mbiraha howa áyu íbu kebe, lene. i 

19 Ani layagola ibugua ladai bialu lalu, Mbirale agilebe, lene. j 

Libugua ladai bialu lalu, Nasareteali Yasuni mbirale biyaruni. Agali ogonime Ngode Datagaliwabe manalatagi haga howa ibugua mana lawai hayagobi biabe biyagobi bibahende hongo taraore howa biyagoni lowa Ngode Datagaliwabehandabi wali agali bibahende kamarumebi ani manda bu harima.
20 Inanagaloma binigo mo miaga haguane hearumebi haru haga hearumebi ibu minuwa wai biaga ami agali hearuhondo minu miyagola tigua ibu homelo ira bangani ba para haya. k  21 Ani biyagola iname ibu Isaraele wali agali pele mialu golope holebira mitangi bu harima. Anigo mbirale uruni biyago horo áyu kamagoni tebone. l  22 Ogonigo wali marume áyu egerebagi muna biyagola egeanda biagoha hondo pialu dai buwa ina mo mogola haya. m  23 Tigua ibu tingini handa nabi dai bialu howa lalu, Ina de gandeba ale handalu dahuliyalirume ina langialu ibu heyu ka laya, lama dai biya. 24 Ani langiyagola ina heba haga marume egeandaha pialu hearia wali biarume layadaguaore hondowa tigua ibu handa nabi dege, lene. n 

25 Ani layagola Yasuhanda libuhondo lalu, Libu mini nawi haabo kabigo dege agidabe. Ngode Datagaliwabe manalatagi haga henerume mana bibahende lowini ngago tendoreore manda bigi berabigo dege agidabe. 26 Mbirali Dabo Helenego ibulebira lowinigo ibugua mbirale uruninaga tandaga nalu howa ibuninaga mini daliga taraore karulai holene irane ndo winibe, lene. o  27 Ani lowa Yasuhanda Anduane Homogonagambugani Mosesehandabi mana latagi haga henerumebi gilibu wini wiaru pigane ogoriani howa lama pialu ibuninaga bibahende lowini wiaru libuhondo garealo miai halu hene. p 

28 Libu pole biyagoria anda polene kaware howa Yasu ibu bola balu pole biyagola 29 libugua bime mo luma howa lalu, Alendo halu ne lolebiaruago áyu oali iya baba ho hama, lene. Ani layagola ibu libu heba andaga pu hene. 30 Ibu libu heba tomo nole biruwa ibugua mberedi mo yuwa Ngode Datagaliwabehondo ka̱i̱ lowa gaibu ki howa libuhondo mini. q  31 Ani biyagola libunaga de mo ngala hayagola ibu Yasuore bedagoni lole biyagola o birayagoriani howa ereba halu libugua ibu de nahende hene. 32 Ani biyagola libuni lade̱le̱ bialu lalu, Harigani ibalu howa ibugua iyahondo Anduane Homogonaga mbugani bi lo wiaru bayuwa garealo ngiai hayagola iyanaga bu miniha irame daradagua biayua handarini, laga bialu berene.

33 Ani biya handala libugua abale heyalu Yarusaleme ibunaga talima piaga beariali (11) biarubi wali agali marubi ngoai ho hayagoria abale dai biyagola 34 wali agali bu hearume libuhondo lalu, Anduane Homogo ibu heneneore heyu howa Saimono hendelo ha pani haya, lene. r 

35 Ani layagola libugua harigani biyagobi ibugua mberedi yamuwa gai biyagola ibu Anduane Homogoda lowa manda biribigobi baya hangu garealo miai haribi.

Yasu ibunaga talima piaga biaru hearia ha pani henego ogo

(Madiu 28.16-20, Maga 16.14-18, Yone 20.19-23, Abosolo 1.6-8)

36 Agali kira biago labome te lamialu hebiore Anduane Homogo ibuni ti heagoria abaleore ha pani howa lalu, Mo palia holene tí heba helo laro, lene. s 

37 Ha pani hayagola ti mogo taraore lowa homayago dinini daibu kabe toba ho hene. t  38 Ani bu heago hondowa ibugua tihondo lalu, Aginaga gi ho kamibe. Tínaga miniha mini kira wulene ogoni wiyadagoni agibe. 39 I̱ i̱niore kogo i̱naga gi gebi bayuwa handa beramine. Homene dininime dongonebi kunibi o kogobi nahagago tí manda bule tíni gime ela haramine, lene.

40 Ani lowa ibugua ibunaga gi gebi tihondo walia hene. 41 Walia hayagola ti turu ha howa lulunda hope howa mini mbiraore wibe nahe hene. Ani bu heagola Yasuhanda tihondo lalu, Tomo mbira ngamibe, lene. u  42 Ani layagola tigua wena hiru winigo miyagola 43 ibugua tinaga wanakuini howa nene.

44 Ani buwa ibugua tihondo lalu, Abale tí baba harimangi howa i̱na mbirale heneneore biyaruni langiai harugoni. I̱na ogonidagua bulebira lalu Mosese heneyangiMana lowinigo gilibu ngarunibi Ngode Datagaliwabe manalatagi haga henerume gilibu ngarunibi Iba Gana mbugani gilibu ngarunibi bibahende lola hai helo lowini, lene. v 

45 Ani lowa Anduane Homogonagambugani bi gilibu ngagoni manda biai helo ibugua tinaga mini mo wála hene. w  46 Ani buwa tihondo lalu, Anduane Homogonaga mbugani lo ngadagua ogo,Mbirali Dabo Helenego ibu tandaga noleneore wulebira. Tandaga nowa horo tebonengi tongolo miyagoria howa mo heya holebira. x  47 Ani biragola ibunaga minini howa wali agalime mini beregedalu dai bilobi ko biyago domo wahelobi mana ogoni Yarusaleme ala lamima pialu mani dindi bibahendeha lamima tagira polene nga. y  48 Mbirale uruninaga walia hagane tí kamigoni. z  49 I̱ Abahanda ngulebero lo wiyadagua i̱nime tíni hole dalilolebero. Anigo tíni hongo holene daliga howa dalu helo Yarusaleme ogoriani hondo holene nga, lene. aa 

Yasu dahuliya andaga iraga halu penego ogo

(Madiu 16.19-20, Abosolo 1.9-11)

50 Ani lowa Yasuhanda ti Yarusaleme howa haru tagira pialu amuraore Bedani puwa ibunaga gi yaraga halu Ngode Datagaliwabehanda ti biamogo bilo lalu ti mo turu hene. 51 Ibugua ti mo turu howa ti hea handala ibu dahuliya andaga iraga halu pene. ab  52 Ani biyagola tigua ibuhondo mitangi bialu ibunaga mini yaraga halu turu timbuniore holene tiha to̱lai ho yalu Yarusaleme dai bini. ac  53 Ani dai buwa tigua horo bibahendengi Anduane Homogonaga andaha howa Ngode Datagaliwabehondo ka̱i̱ lalu haabo hene. ad 

Copyright information for `HUI