a3.2Lg 1.80
b3.3Ab 13.24, 19.4
c3.4-6Ais 40.3-5
d3.6Iba 98.2, Ais 52.10
e3.7Md 12.34, 23.33
f3.8Yo 8.33, 8.39
g3.9Md 7.19
h3.10Ab 2.37
i3.11Lg 11.41, 2 Ko 8.14, Ya 2.15-16, 1 Yo 3.17
j3.12Md 21.32, Lg 7.29
k3.14Har 23.1, LBM 19.11
l3.16Md 3.11, Ab 13.25
m3.17Mai 4.12, Md 13.30
n3.19-20Md 14.3-4, Mg 6.17-18
o3.21Yo 1.32
p3.22Pig 22.2, Iba 2.7, Ais 42.1, Md 3.17, 17.5, Mg 1.11, Lg 9.35, Yo 1.32
q3.23Lg 4.22, Yo 6.42
r3.271 Bit 3.17-19, Esr 3.2
s3.312 Sml 5.14
t3.32Lud 4.17-22, 1 Sml 16.1-13
u3.33Pig 29.35
v3.36Pig 11.10-26
w3.38Pig 4.25—5.32

Luke 3

Baboraya biaga Yonehanda bi mana lamialu henego ogo

(Madiu 3.1-12, Maga 1.1-8, Yone 1.19-28)

Agali Taiberiasa ibu dindi dewa handame haga Kini howa mali pira mbirani duria (15) ibugua handame howa heangi Pondiasa Pailate ibu Yudia gabumane haru haga heangibi Herodo ibu Galili haru haga heangibi Herodo hamene Pilibi ibu Idureabi Taragonaidisibi haru haga heangibi Lisaniasa ibu Abilene haru haga heangibi Anasabi Kaiabasabi libuLoma Binigo Mo Miaga Haguane Timbuni heangibi ogoningiore Segaraia igini Yone ibu dindi ko wali agali nahaga wiagoria howa Ngode Datagaliwabehanda ibuhondo bi lamini. a  Ngode Datagaliwabehanda ibuhondo bi lamiyagola Yonehanda dindi bibahende iba Yodana piyagohayagi ibaga bialu wali agalihondo mana lamialu lalu, Ngode Datagaliwabehanda tí ko birimigo domo wahelo bu mini beregedowa baboraya bilimu, lalu lamini. b  Ngode Datagaliwabe bi manalatagi haga Aisaiahanda mbiwia halu ibunaga mbugani bi gilibu wini ngago ogo, c 

Dindi ko wali agali nahaga wiagoria howa mbiralime olalu,
Anduane Homogo ibilo hariga ba hole manda manda bialu halimu.
Hariga ogoni tigabiore ba halimu.
Ulini hombene bibahende ngaru mo donde lai halu
dindi hari emene timbunibi godo gege biai halimu.
Hariga pidipodabi ngago tigatiga wilo bo tiga bialu hariga ko ngago bayuwa mbara lalu mo tiga bilimu.
Wali agali bibahendeme Ngode Datagaliwabenaga pele mulene handai holebira, lalu ka, d 
lenego gilibu nga.

Wali agali dewaore Yonehanda ti baboraya bia helo ibu hearia iba ho wiaabo hene. Ani biyagola Yonehanda tihondo lalu, Tí ko nogombi ale kamigo Ngode Datagaliwabehanda pani áyuore wia holebirago nanole yo pialu polene nga lalu tí aiwa langiyabe. e  Tígua ko bialu harimigo wahalu mini beregedai kamigo walia holenaga mana bayale bialu halimu. Tínime lalu, Inanaga mamali Abarahama hene, lolene nawi. I̱na tíhondo bi mbira langerogo Ngode Datagaliwabehanda ege to̱le̱ o ngaruni mo yuwa Abarahamanaga aguanene bu hinu helabehe kagoni laro. f  Ira karu dibule ayu ira teneha mo yu íbu nga. Ira lini bayale nadaga karu bibahende dibai howa ira dedagoria delolebira, lene. g 

10 Ani layagola wali agali hearume Yonehondo lalu, Bi larigo iname agi bulene wiaruabe, lene. h 

11 Ani layagola ibugua ladai bialu lalu, Mbiralime aga kira wu kago mendego nawi kayagua ogoni mulene nga. Mbiralime tomo nolene wu kayagua ibugua maruhondo talebu mulene nga, lene. i 

12 Dagiyi muni mo mogo biaga maru hearu Yonehanda ti baboraya bia helo ibuwa tigua ibuhondo lalu, Lawai haga-o iname agi bulene wiaruabe, lene. j 

13 Ani layagola Yonehanda tihondo ladai bialu lalu, Dagiyi muni tigatiga hangu ngi lolene nga, lalu lamini.

14 Ani layagola ami agali maru hearume Yonehondo lalu, Inamebi agi bibehe kamabe, lene. k 

Ani layagola Yonehanda tihondo ladai bialu lalu, Wali agalinaga muni page bialu gingila namilimu. Godi lalu howa ke̱ halu nde nalalimu. Amime yolo ngirago karulape ngira manda bulene nga, lene.

15 Wali agali hearume ti miniha turu howa Yone mitangitangi bialuMbirali Dabo Helenego ibulebira lenego Yone ibu ka bada lo mitangi bini. 16 Ogonidagua mitangi biyagola Yonehanda ti bibahendehondo lalu, I̱na tí ibame baboraya bialu kogo maha mbirali i̱ emene ko̱ kogobi ndo ibu daliga timbuniore kago ibulebira. I̱ bayale ndo howa ibunaga ge habe gamu i̱na gololene nakarulapeore kogoni. Ibugua Ngode Datagaliwabe Dininimebi ira hungu biragomebi tí baboraya bia holebira. l  17 Ladi ale mini widi ibunaga lini aeanela dambialu mo tale bilo ibugua mbirale baraga hagane nama tabuli ale yu ka. Tale biai howa ibugua widi lini do hagane andaha do hole wuwa aeane biaru ira hundia nabiaga daabo kagoria delolebira, lalu lamini. m 

18 Yonehanda wali agalihondo bi tara tara laga bialu Bi Mana Debene lamialu, Tígua bu mini beregedalimu, lalu lamialu hene.

Herodohanda Yone garabaya binigo ogo

19 Gabumanenaga haru haga Herodohanda ibu hamene Pilibinaga one Herodiasa dabu bialu heagolabi mana ko dewa bialu heagolabi de hondowa Yonehanda Herodo talini. n  20 Ani taliyagola Herodohanda ko timbuni bialu Yone garabaya bini.

Yonehanda Yasu baboraya bia henego ogo

(Madiu 3.13-17, Maga 1.9-11)

21 Yonehanda wali agali bibahende hearu baboraya bia hai howa ibu Yasu baboraya bia hene. Ani biyagola Yasu ibu Ngode Datagaliwabela bi lalu hearia hari daliga budalu o  22 Ngode Datagaliwabe Dinini ega malibu alego Yasuni dalini. Ani biyagola dahuliya andaga howa bi ladali halu lalu, I̱ Iginore i̱na í̠ gubalini ho howa í̠hondo turu timbuni ho kogoni, lene. p 

Yasu mamali hama peneru uru

(Madiu 1.1-17)

23 Yasuhanda ibunaga biabe pigane tenialu biyangi ibunaga mali pira tebira (30) agima hene. Wali agali hearume Yasu ibu Yosebe igini ka mitangi bu hene. Yosebe ibu Hilai igini hene. q  24 Hilai ibu Maligi igini Maligi ibu Yanai igini Yanai ibu Yosebe mende igini hene. 25 Yosebe ibu Madadaiasa igini Madadaiasa ibu Amoso igini Amoso ibu Nahumu igini Nahumu ibu Eseli igini Eseli ibu Nagai igini hene. 26 Nagai ibu Meada igini Meada ibu Madadaiasa mende igini Madadaiasa ibu Semene igini Semene ibu Yosege igini Yosege ibu Yoda igini hene. 27 Yoda ibu Yoanana igini Yoanana ibu Lesa igini Lesa ibu Serubabele igini Serubabele ibu Sealadiele igini Sealadiele ibu Neri igini hene. r  28 Neri ibu Melegi igini Melegi ibu Adi igini Adi ibu Kosama igini Kosama ibu Elemadama igini Elemadama ibu Ere igini hene. 29 Ere ibu Yosua igini Yosua ibu Eliese igini Eliese ibu Yorimi igini Yorimi ibu Madada igini Madada ibu Libai igini hene. 30 Libai ibu Simiono igini Simiono ibu Yuda igini Yuda ibu Yosebe tebone igini Yosebe ibu Yonama igini Yonama ibu Eliagimu igini hene. 31 Eliagimu ibu Melea igini Melea ibu Mena igini Mena ibu Madada igini Madada ibu Nadana igini Nadana ibu Debidi igini hene. s 

32 Debidi ibu Yasi igini Yasi ibu Obede igini Obede ibu Boasa igini Boasa ibu Salamono igini Salamono ibu Nasono igini hene. t  33 Nasono ibu Aminadaba igini Aminadaba ibu Adamini igini Adamini ibu Arani igini Arani ibu Heserono igini Heserono ibu Perese igini Perese ibu Yuda igini hene. u  34 Yuda ibu Yagaba igini Yagaba ibu Aisaga igini Aisaga ibu Abarahama igini Abarahama ibu Tera igini Tera ibu Neho igini hene. 35 Neho ibu Serugu igini Serugu ibu Leu igini Leu ibu Pelege igini Pelege ibu Ebere igini Ebere ibu Sela igini hene. 36 Sela ibu Kainana igini Kainana ibu Arabagada igini Arabagada ibu Seme igini Seme ibu Noa igini Noa ibu Lamege igini hene. v  37 Lamege ibu Medusela igini Medusela ibu Inogo igini Inogo ibu Yarede igini Yarede ibu Mahalalele igini Mahalalele ibu Kenana igini hene. 38 Kenana ibu Inoso igini Inoso ibu Sede igini Sede ibu Adama igini Adama ibu Ngode Datagaliwabe igini hene. w 

Copyright information for `HUI