a4.2Har 34.28, 1 Kin 19.8
b4.4Man 8.3
c4.6Md 28.18, Yo 12.31, 14.30, Mo 13.2, 13.7
d4.8Man 6.13-14, 10.20
e4.10Iba 91.11
f4.11Iba 91.12
g4.12Man 6.16, 1 Ko 10.9
h4.13Hi 2.18, 4.15
i4.16Md 2.23, Mg 6.1, Ab 13.14, 17.2
j4.17Ais 61.1-2
k4.18-19Ais 61.1-2
l4.22Iba 45.2, Md 13.54, Mg 6.2, Lg 3.23, Yo 6.42
m4.23Md 4.13, Yo 2.12
n4.24Yo 4.44
o4.251 Kin 17.1, 17.7, 1 Kin 18.1
p4.261 Kin 17.8-16
q4.272 Kin 5.1-14
r4.30Yo 8.59, 10.39
s4.31Md 4.13, Mg 1.21, Lg 4.23
t4.32Md 7.28-29, Yo 7.46, Ta 2.15
u4.33Md 8.29, Mg 1.23, Lg 8.28
v4.34Lg 1.35, 4.41, Yo 6.69
w4.41Md 8.29, Mg 1.25, 1.34, 3.11-12
x4.43Lg 8.1
y4.44Md 4.23

Luke 4

Dama Heyolabeme Yasu ko mo bia habehedabe hondole ba hendenego ogo

(Madiu 4.1-11, Maga 1.12-13)

Yasu ibu iba Yodanaha howa dai biyagola Ngode Datagaliwabe Dinini Yasuha ho to̱laihe howa ibugua dindi ko wali agali nahaga wiagoria Yasu haru pu hene. Ani haru pu hearia dama Heyolabeme horo pira mariani (40) Yasu ko mo bia habehedabe hondole ba handalu hene. Ani ba handalu hearia Yasu tomo nane hangu heane horo ogoni piai hayagola Yasu ibu garibilo hene. a 

Ani bu heago hondowa dama Heyolabeme Yasuhondo lalu, Í̠ Ngode Datagaliwabe Igini keyagua ege to̱le̱ ogo mo mberedi bu hina, lene.

Ani layagola Yasuhanda ladai bialu lalu, Anduane Homogonagambugani lo ngago ogo, Wali agalinaga holene tomo noleneme hangu miaga ndo, lalu gilibu nga, lene. b 

Ani layagola dama Heyolabeme Yasu haru iraga halu wali agali dindi bibahendeni karu abaleore de pandi mugu laradagua ibuhondo walia hene. Ani walia halu lalu, Bibahende ogoni i̱hondo ngiai henego i̱na mua biragohondo mibehe ko. Í̠na bulu paluwa i̱hondo bi pupu wiriyagua bibahendeore ogoni í̠na karulowa haru hai habelobi ti bibahende karume í̠naga mini yaraga hai helobi ngiai holebero, lene. c 

Ani layagola Yasuhanda ladai bialu lalu, Anduane Homogonaga mbugani lo ngago ogo, Anduane Homogo tínaga Ngode Datagaliwabe ibu andaneha haabo halu ibuni hangu mitangi bialu ibunaga minini howa lotu lalu halimu, lalu gilibu nga, lene. d 

Ani layagola dama Heyolabeme Yasu Yarusaleme haru pialu Anduane Homogonaga anda daligaoreni helowa ibuhondo lalu, Í̠ Ngode Datagaliwabe Igini keyagua ogoriani howa í̠nime porabupe harene. 10 Ogoninaga Anduane Homogonaga mbugani bi mbira lo ngago ogo, Ngode Datagaliwabehanda ibunaga dahuliyaliru lamialu hondo hole pudaba lolebira, lalu e  11 bi mendebi ogodagua dege lo nga, Ege to̱le̱ ngagome í̠naga ge nabehedagola dahuliyali uruni tinaga gime í̠ taba yaraga holebira, lalu gilibu nga, lene. f 

12 Ani layagola Yasuhanda ladai bialu lalu, Anduane Homogonaga mbugani ogodagua lo nga, Anduane Homogo tínaga Ngode Datagaliwabe ibunaga hongo abidabe hondole bahanda nabilimu, lalu gilibu nga, lene. g 

13 Dama Heyolabeme Yasu ko tara tara mo bia habehedabe ba handayagola nabialu binini awe dai bule mitangi bialu ibu Yasu helalu pene. h 

Yasuhanda Galilini biabe pigane tenialu bialu henego ogo

(Madiu 4.12-17, Maga 1.14-15)

14 Ngode Datagaliwabe Dinini ibugua Yasu mo hongo hayagola ibu Galili dai bini. Yasuhanda biyagoni marume loyogo lalu howa wali agali bibahende ogoriani hearume hale hai hene. 15 Ani biyagola Yasuhandangoai hagane andaruha howa mana lawai hayagola wali agali bibahende hearume ibunaga mini yaraga halu hene.

Nasarete wali agalime Yasu hame nale henego ogo

(Madiu 13.53-58, Maga 6.1-6)

16 Yasu ibu Nasareteni halu anda henegoria pu howa ibuSabada horongi biaga winidagua bialungoai hagane andaha anda pene. Anda puwa ibugua Anduane Homogonagambugani howa bi daga lole heyalu i  17 mbirali heagome manalatagi haga Aisaianaga mbuga ibuhondo miyagola Yasuhanda mbuga ogoni angalalu bi mbira gilibu wini wiago handa walia howa daga lalu henego ogo, j 

18 Anduane Homogonaga Dinini ibu i̱ha kagoni. k 
Irane i̱na wali agali yagibano karuhondo bi mana debene lamuliya ibugua i̱ dabene.
Wali agali dariba ho ngaruhondo golope holene nga lalu lamulenebi
deme nahandabehe karu lone de hendelo mo bayale holenebi
garabaya biabe ale bia haga karu golope holenebi
Anduane Homogohanda ibunaga wali agalihondo pele mulene tu áyu nga lalu lamulenebi ogoni bibahende ibugua, Í̠na ani bule pu, lalu
lenego gilibu nga, lene.

20 Ani daga lai howa Yasuhanda mbuga biago payuwa hondo haga biagohondo mialu mana lawai hole berene. Ani biyagola wali agali bibahende biru wiarume ibu handaya ho berene. 21 Ani bu bereagola ibugua tihondo lalu, Bi ogoni Anduane Homogonaga mbugaha howa daga larugola tígua hale ho birarimiore áyu ogoni lola haragoni, lene.

22 Ani layagola wali agali biru wiarume miniha mogo lowa lalu, Bi baya gibiore lagadago ibu Yosebe igini ndobe, lene. l 

23 Yasuhanda tihondo lalu, Bi mbira laramiligo tígua i̱hondo lalu, Anogoda-o í̠ni mo dabi harene, loleberami. Tígua i̱hondo bi mendebi lalu, Kabaniamani howa mana bialu harigo hale harimago oali howabi bialu harene, loleberami. m  24 Galone mbira ogo i̱na langerogo. Ngode Datagaliwabe manalatagi hagame ibuni dindini howa bi laragola wali agali karume hale nahaga ka, lene. n 

25 Yasuhanda ani lowa lalu, Hale hadaba. Elaya ibu heneyangi Isaraele dindini howa wali dalo dewa biru winigo ogoni heneneore laro. Biru wiyangi mali tebira mane ogonaga ege waragaria dalu naibi gaea hangu bia ho wiaabo hene. o  26 Ani biyagola Ngode Datagaliwabehanda Elayahondo, Isaraele wali agali biamogo bule pu, nale howa wali dalo mbira Saidono dindinaga tano mbira mini Sarebadani berenego, Biamogo bule pu, lene. p  27 Ngode Datagaliwabe mana latagi haga Elaisa ibu heneyangi Isaraele dindini howa wali agali ge hamua dewa bu hene. Ani bu henego ti mbira mo dabi nahe Siria agali mbira mini Naimana ibu dege mo dabi hene, lene. q 

28 Yasuhanda ani layagola wali agali ngoai hagane andaha biru wiarume hale howa ti keba timbuni hene. 29 Tigua keba timbuni howa heyalu anda bu heagoriani howa Yasu minu yalu tagira pene. Tinaga tano ogoni hombeneni hene. Tigua Yasu hombeneni minu yalu puwa bare bayanoha howa bape hole manda biyaria 30 Yasuhanda wali agali dewa bu heagoha bolo baga bialu puabo hene. r 

Agali mbira dama daragahe henego ogo

(Maga 1.21-28)

31 Yasu ibu puabo halu Galilinaga tano mbira mini Kabaniama anda puwaSabada horongi ibugua wali agali hearuhondo bi mana lawai hene. s  32 Yasuhanda hongo holene taraore yu howa lawai hayagola wali agali bu hearume hale howa miniha mogo lai hene. t  33 Ngoai hagane andaha agali mbira dama koore daragahe hene. Ibugua ga̱ timbuni lalu lalu, u  34 Nasareteali Yasu-o ina kamagoha í̠na agi bule ibiribe. Ina bo wahole ibiribe. Í̠ mbira Ngode Datagaliwabenaga bi lamule piaga loma biahe biago kego mandabu kogoni, lene. v 

35 Ani layagola Yasuhanda dama biago talialu, Bi nalabe. Agali helalu í̠ tagira pu, lene. Ani layagola damame agali biago wali agali hearu wanakuini howa mo pila halu mo ko nahe howa tagira pene.

36 Wali agali bibahende bu hearume miniha mogo lai ho howa tini dege dege laga laga bialu lalu, Ibugua bi layagoni agi alebe. Damarume ibugua tagira pudaba laradagua pelo pudaba lolene hongo yu kagoni, lene. 37 Yasuhanda biyagoni wali agali dindi ogoriani hearume hale hai hene.

Yasuhanda wali agali dewa mo dabi haga binigo ogo

(Madiu 8.14-17, Maga 1.29-34)

38 Ani buwa Yasuhandangoai hagane andaha howa pialu Saimononaga andaga pene. Saimono imane ibu poboyogo warago timbuni bo winigo tigua Yasu lamini. 39 Lamiyagola Yasu ibu wali warago bo wiagoria puwa, Dabi ha, layagola poboyogo ala biyago ereba halu dabi hene. Dabi howa wali ogonime heyalu ti tomo nelo mule manda manda bini.

40 Alendo ni paliyagola wali agalime tinaga damene warago tara tara bo wiaru Yasu hearia mo yalu ibini. Mo yalu ibiyagola Yasuhanda ti hangu hangu gime ela haga bialu ti bibahende mo dabi hai hene. 41 Wali agaliha howa damarubi tagira pugu bialu ga̱ lalu, Í̠ Ngode Datagaliwabe Igini kegoni, laga bini. w 

Ani bigi biyagola dama biarume Yasu ibuMbirali Dabo Helenego ibulebira lowinigo ibuore kalo mandabu henego Yasuhanda dama biaruhondo, Bi naladababe, lene.

Yasuhandangoai hagane andaruha mana lamialu henego ogo

(Maga 1.35-39)

42 Muna biyagola Yasu heyalu dindi ogoniha howa tagira pialu mbirali naheore wiagoha pene. Wali agali hearume tai bima mama pene. Tigua ibu handa walia howa ibu napelo hongo hene. 43 Ani biyagola Yasuhanda tihondo lalu, Ngode Datagaliwabehanda Handame Ho Holenenaga Bi Mana Debene wali agali maruhondobi lamulene ngo. Ani buliya Ngode Datagaliwabehanda i̱hondo, Pu, laya, lene. x  44 Yasuhanda ibaga bialungoai hagane andaruha bi mana lamigi bima pene. y 

Copyright information for `HUI