a4.1Mg 3.7-9, Lg 5.1-3
b4.2Md 13.34, Mg 4.33-34
c4.8Md 13.8, Lg 8.8, Yo 15.5, Kl 1.6
d4.12Ais 6.9-10, Yo 12.40, Ab 28.26-27
e4.18Md 26.31
f4.19Md 19.23-24, 1Ti 6.9, 6.17
g4.21Md 5.15, Lg 11.33
h4.22Md 10.26, Lg 12.2
i4.24Md 7.2, Lg 6.38
j4.25Md 13.12, 25.29, Lg 19.26
k4.27Ya 5.7
l4.29Yol 3.13, Mo 14.15-18

Mark 4

Bi yobage lowa, Tomo egene polama pene, lenego ogo

(Madiu 13.1-9, Lugu 8.4-8)

Yasuhanda iba Galili bereago angeni howa bi mana lone lawai halu hene. Wali agali dewaore íbu ngoai howa ibu bereagoria ho mabu biyagola ibu iba taluni ubade ho biralu wali agali ti iba angeni hene. a  Yasuhanda bi yobage lowa mana dewaore tihondo lawai halu lalu, b 

Hale hadaba. Agali mbirame ladi ale mini widi egene mabuni ba a̱i̱ na̱i̱ bima pene. Ba a̱i̱ na̱i̱ bima piyagola egene maru hariga teneni ibira ho wiaria egame ibuwa mo nai hene. Egene maru ege to̱le̱ dindi mbaliahe wiagoriani ibira hayaru abale anda halu pini dindiha puabo naheyagola yuni emene doai lalu tagira ibiyago ni daba hayagola gau lai hene. Ani buwa egene maru dindi pu kuabu anihe pini gandula anda hene wiagoriani ibira hayaru ani heba mandagi anda hamaga ho gengedalu oge hayagola lini nade hene. Egene maru dindi bayale wiagoria ibira hayaru anda halu lini dewa dene. Irane marume lini pira tebira (30) dene. Irane marume pira waragaria (60) dene. Irane marume pira pira (100) dene, lene. c 

Ani lowa Yasuhanda lamaro bialu lalu, Tí hale kamiyagua nde hale haramine, lene.

Bi yobage lolene irane winini lenego ogo

(Madiu 13.10-17, Lugu 8.9-10)

10 Yasuhanda bi ogoni layagola howa hale hayaru maru ibunaga talima piaga homberiali biaru heba Yasu ibu hangu hearia ibuwa tigua ibuhondo lalu, Bi yobage lalu larigo irane aginaga lalu laribe, lene. 11 Yasuhanda tihondo ladai bialu lalu, Ngode Datagaliwabehanda Handame Ho Kagonaga manda bulene ala pani nahe ngelenego áyu tí manda bilimulo langero. Wali agali tagira karuhondo bi yobage hangu lamialu kogo 12 irane ogo, d 

Tigua deme handaya haabo hara tiraga galone handa walia naholebira.
Tigua haleme hale hara tiraga minime manda nabulebira.
Tigua handa walia ha minime manda bia ani bidale tinaga mini beregedo kale.
Ani beregedale tigua ko biyago Ngode Datagaliwabehanda domo wa kale,
lene.

Bi yobage lenegonaga lone garea lo minigo ogo

(Madiu 13.18-23, Lugu 8.11-15)

13 Yasuhanda tihondo lalu, Bi yobage larugo galone manda nabi kamibe. Manda nabi kamiyagua nde bi yobage bibahende larogo agua manda buleberamibe. 14 Agali biagome tomo egene polayadagua Ngode Datagaliwabenaga bi mana polaga ka. 15 Wali agali maru tomo egene harigani ibira hayago ale karume bi mana hale haragola dama Heyolabeme abale ibalu bi mana bu habaneha polayago mo yalu piaga. 16 Ogonidagua wali agali maru tomo egene ege to̱le̱ dindi mbaliaheni ibira hayago ale karume bi mana hale howa turu halu mo yaga. 17 Ani buwa tinaga bu habaneha anda puabo habe nahedagola ti ha wiaabo nahaga. Ani buwa marume tigua bi mana mo yayago hondowa ti mo tandaga haragolabi mo ko holene íbu ngagolabi ti abaleore yu wahalu piaga. 18 Wali agali maru tomo egene dindi anihe pini gandula anda hene wiagoria ibira hayago ale karume bi mana hale howa e  19 dindini holene mitangi bialu mini tumutumu wu holenebi dindinaga mbirale dewa ngaru minime wua hai holenebi mbirale tara tara ngago dimagoli holenebi urunime bi mana hale hayago ho gengedalu oge haragola lini nadaga ka. f  20 Anigo wali agali maru tomo egene dindi bayaleni ibira hayago ale karume bi mana hale howa mo yai halu tiha lini pira tebira (30) da pira waragaria (60) da pira pira (100) daga bigi biaga ka, lene.

Lamu hale te ogo

(Lugu 8.16-18)

21 Ani lowa Yasuhanda tihondo lalu, Mbiralime lamu hale delowa ndisime dambi ho wiagabe be paliagane dagia andaneha wia do hagabe. Lamu hale delowa dagia daligani wiaga ndobe. g  22 Mbirale wia do kago mo pani hai halu mbirale yi ho ngago mo pani ho ngelolebira. h  23 Tí hale kamiyagua nde hale haramine, lene.

24 Ibugua laabo halu howa tihondo lalu, Mana hale haramigo bayuwa mitangi bilimu. Wali agali marume birago tígua hondowa dabaramilidagua Ngode Datagaliwabehanda tígua beramigobi hongo howa dabolebira. i  25 Mbiralime mbirale mbira yu kagohondo Ngode Datagaliwabehanda dewa mo tago halu mulebira. Mendealime mbirale mbira nayi howa emeneore yidogoni karulape dege yidolo kago Ngode Datagaliwabehanda yamulebira, lene. j 

Tomo egene anda haganenaga bi yobage lalu lenego ogo

26 Yasuhanda laabo halu lalu, Ngode Datagaliwabehanda Handame Ho Kagoria ogo ale nga. Agali mbirame tomo egene mabuni polalu howa 27 mbiraga pali egerebagi heya bigi bialu ka tambu tomo egene polayago doai lalu anda haga. Agua bialu anda harabe ibu manda nabi haga. k  28 Tomo egene dindiha howa anda harago yuni ala anda halu mani pabua balu lini daga. 29 Ani buwa maniore boga bialu ladi ale mini widi lini dolene tu haragola agalime ayu tibu wangobime gandulaga, lene. l 

Bi yobage lowa iramasada egenenaga te lenego ogo

(Madiu 13.31-32, 34, Lugu 13.18-19)

30 Yasuhanda ogonidagua dege lalu, Ngode Datagaliwabehanda Handame Ho Kagoria agi ale lamabe. Bi yobage irane aginaga lalu garea lo lamabe. 31 Ngode Datagaliwabehanda Handame Ho Kagoria ogo ale nga. Agalime iramasada egene mbira emene koore ngago mabuni hangaragola 32 egene ogoni anda halu maru kagobi ndo ibu timbuniore anda ho haga. Ani anda howa magane timbuni kagola egame gumbaha tinaga anda biaga, lene.

33 Yasuhanda wali agali hearuhondo bi mana lamialu ti manda bua kadagua manda bilo bi yobage hangu dewa ogonidagua lalu lamialu hene. 34 Ibugua tihondo mana lamialu bi yobage dege lalu lawai hene. Yasubi ibunaga talima piaga biarubi tini hangu howa ibugua bi yobage layarunaga irane bibahende lamiai hene.

Yasuhanda puyabu ibalahondo bi lenego ogo

(Madiu 8.23-27, Lugu 8.22-25)

35 Horo ogoningi dege ni paliyagola Yasuhanda ibunaga talima piaga biaruhondo lalu, Iba timbuniore domalu ange edeyagi ma, lene. 36 Ani lowa wali agali dewa bu hearu helalu iba talu Yasu pu birayagoria ibunaga talima piaga biarubi ti haru biralu pene. Iba talu marubi ogoriani wini. Wali agali maru iba talu urunini biralu Yasu piyadagua haruru pene. 37 Pialu hearia puyabu timbuni hongo howa pulayagola iba yaribu buwa iba talu guaneha iba anda ibini. Iba anda ibuwa talu to̱lole bini. 38 Ani biyagola Yasu ibu iba talu ereneha haguanda howa palia hondo hearia tigua ibu mo barila halu lalu, Lawai haga-o heya. Ina homaramago nahende padebe, lene.

39 Ani layagola Yasuhanda heyuwa puyabuhondo, Pu nalabe, lalu ibahondobi, Yaribu nabibe, lene. Ani layaore puyabu pu nale ereba halu ibabi yaribu nabi nimu lowa bayaleore wini. 40 Ibugua tihondo lalu, Aginaga gi ho kamibe. Ngode Datagaliwabehondo mini mbiraore nawi kamibe, lene.

41 Ani layagola tigua gi timbuni howa tini bi lagalaga bialu lalu, Puyabubi ibabi ibugua bi layago hale hagadago agali ogoni ibu aidabe, lalu hene.

Copyright information for `HUI