a12.1Man 23.25, Mg 2.23-28, Lg 6.1-5
b12.2Har 20.10, Md 12.10, Lg 13.14, Yo 5.10, 7.23
c12.3-41 Sml 21.1-6
d12.4LBM 24.9
e12.5Dag 28.9-10
f12.6Md 12.41-42, Lg 11.31-32
g12.7Hos 6.6, Md 9.13
h12.10Lg 14.3
i12.11Har 23.4-5, Man 22.4, Lg 14.5
j12.14Md 26.4, 27.1, Mg 3.6, Lg 6.11, Yo 7.1, 7.19, 11.53
k12.15Mg 3.7-10
l12.16Md 8.4, Mg 3.12
m12.18-21Ais 42.1-4, Md 3.17, 17.5
n12.22Md 9.32-33
o12.24Md 9.34, 10.25, Mg 3.22, Lg 11.15
p12.25Md 9.4, Yo 2.25, Mo 2.23
q12.28Dan 2.44, 7.14,Lg 1.33, 17.20-21, Ab 10.38, 1Yo 3.8
r12.29Ais 49.24, Lg 11.21-23, 1Yo 4.4
s12.30Mg 9.40, Lg 9.50, 11.23
t12.31Mg 3.28-29, Lg 12.10, Ab 7.51, 1Ti 1.13, Hi 6.4-6, 10.26, 1Yo 5.16
u12.32Md 11.19, Lg 12.10, Yo 7.12, 7.52, 1Ti 1.13
v12.33Md 7.16-20, Lg 6.44
w12.34Md 3.7, 15.18, 23.22, Lg 3.7, 6.45
x12.38Md 16.1, Mg 8.11, Lg 11.16, Yo 6.30, 1Ko 1.22
y12.39Md 16.4, Mg 8.12, Lg 11.29-32
z12.41Yna 3.5
aa12.421 Kin 10.1-10, 2Bit 9.1-12, Md 12.6
ab12.43Yob 1.7, Lg 11.24, 1Pi 5.8
ac12.45Hi 6.4, 2Pi 2.20-22
ad12.46Md 13.55, Mg 3.31, Yo 2.12, Ab 1.14
ae12.50Yo 15.14, Lm 8.29, Ga 5.6, 6.15,Kl 3.11, Hi 2.11

Matthew 12

Sabada horongi biabe nabiaga winigo ogo

(Maga 2.23-28, Lugu 6.1-5)

Lu ndo emene tigi mbira dege howaSabada horongi Yasu ladi ale mini widi teha pialu howa ibunaga talima piaga biaru garibi layagola widi biagonaga lini deago dowa nama nama pene. a  Ani biyagolaPerisi agali hearume Yasuhondo lalu, InanagaMana lowini ngago Sabada horongi nabulene wini ngago í̠naga talima piaga biarume pugualu bialu karuni handa, lene. b 

Ani layagola Yasuhanda tihondo ladai bialu lalu, Debidibi ibunaga agalirubi tomo nawiyagola garibi lowa Debidihanda bini gilibu ngago tí nahende kamibe. c  Ibu Ngode Datagaliwabenaga andaha anda puwa mberedi Ngode Datagaliwabehondo loma bialu mini wiago muwa ibunibi ibunaga agalirubi heba nene. Ani binigo Mana lowini ngago mberedi ogoni nanolene wini nga manda buwa nene.Loma binigo mo miagane agali degeme nolene nga lowini. d  Ani buwa Mosese heneyangi Mana lowini ngago de nahende dege kamibe. Bi ogodagua lalu bi lowini ngagoni. Sabada horo bibahendengi loma binigo mo miaga agali karume Ngode Datagaliwabenaga andaha howa Sabada horonaga bulene bi lo ngago pugualu haga howa, Tí ko birimida, nalagago manda nabi dege haabo kamibe. e  Ngode Datagaliwabenaga anda goyane hene howa mbirale mbira áyu ogoria ngago duniniore nganenaga tí langero. f  Anduane Homogonagambugani lo ngago ogo, I̱na mbirale loma bialu irani bo delolene hame nale biamogo bulene hame ledogo, lalu gilibu nga. Anigo bi i̱na larogo irane ogo ale laralo manda bidamile tígua wali agali ko nabi karuhondo, Tí ko birimida, nalaga kamile. g  Ogoninaga Agali Hole Ibiyago ibu Sabada horonaga Anduane ka, lene.

Agali mbira gi kohe henego ogo

(Maga 3.1-6, Lugu 6.6-11)

Yasu ibu dindi ogoni wahalu puwangoai hagane anda mbiraha pene. 10 Anda ogoniha agali mbira gi mbariane kohe henego íbu hene. Agali maru hearume Yasuhondo, Í̠na koore biri, loa howa tigua ibuhondo lalu, InanagaMana lowini ngagomeSabada horongi mo dabi holene lalu lo ngabe be nalowibe, lene. h 

11 Ani layagola Yasuhanda ladai bialu lalu, Aniyagua tínaga nogo sibi mbira Sabada horongi uliha pilayagua agua buleberami. Nogo sibi anduaneme uliha howa Sabada horongi dugu baraga naholebirabe. i  12 Nogo sibi emene bagi hene ale lowa agali dunini timbuniore ka hendedeni. Anigo inanaga Mana lowini ngagome Sabada horongi mbirali biamogo bulene nga laga ndobe, lene. 13 Ani lowa ibugua agali gi kohe biagohondo lalu, Í̠naga gi mbariane dogola, lene.

Agali biago ibugua gi dogo layagola lone bayale ho dai bialu gi mendeyagi heagobi dege hene.
14 Ani biyagolaPerisi agali biarume ibu helalu puwa, Yasu homelo agi bimabe, lalu lo manda bialu hene. j 

Ngode Datagaliwabenaga Biabe Bia Haga dabo helenego ogo

15 Yasuhanda ibu bole lo manda bialu heago hale howa dindi ogoniha nahe wahalu piyagola wali agali dewa bu hearubi ibu piyadagua pene. Pialu howa ibugua bibahende warago bo wigi biaru mo dabi haga bima pialu howa k  16 tihondo, I̱na o beroruniore maru lamulemeni, laga bima pene. l  17 Ibugua ogoni bima penedagoni Ngode Datagaliwabehanda ibunaga manalatagi haga Aisaiaha howa mbiwia henego lola hene. Bi mbiwia henego ogo,

18 I̱naga biabe bia haga i̱na dabarugo o kagoni. m 
I̱na ibu gubalini howa turu ho kogoni.
I̱na i̱ Dinini ibuniore hole pu larogola
ibugua i̱naga daba ki bulene ogobiore nga lalu wali agali dindi tara tarani bu karuhondo lo pebe bialu holebira.
19 Ibugua lai lalubi ga̱ lalubi nalolebira.
Harigani howa awa lalu nalolebira.
20 Gambe mbira podabehe ema bialu duru lalu kago podope naholebira.
Ira hale mbira hundibehe auhe dalu kago ba hundiaore naholebira.
Tigatiga bulene ngaru bolangua hai helo ibugua bia ho wiaabo holebira.
21 Wali agali dindi tara tarani karume ibu mitangi bialu mini dunu bia ho holebira,
lalu gilibu nga.

Yasu dama Heyolabelanaga te ogo

(Maga 3.20-30, Lugu 11.14-23)

22 Ani biyagola howa wali agali maru hearume agali mbiraha dama daraga hayagola howa debi ko halu bibi nalabehe henego Yasu hearia haru ibini. Haru ibiyagola Yasuhanda dama wara tagi hayagola agali biago debi handabehe halu bibi labehe hene. n  23 Yasuhanda ani biyagoni hondowa wali agali dewa bu hearume miniha mogo lai howa lalu, Ibu Debidi Iginidabe, lene.

24 Ani layagola hale howaPerisi agali hearume lalu, Ani ago dama bibahende karunaga haguane Heyolabe kagome ani bilonaga hongo miyago yu howa biragoni, lene. o 

25 Yasuhanda tinaga miniha tongoyongo paluwa lalu hearuni manda buwa tihondo lalu, Dindi mbiraoreni howa tale bigi bigi bu howa wai bia a̱i̱ na̱i̱ biyagua lu bia ho wiaabo naholebira. Ogonidagua dege tano mbirani wali agali bu kayaguabi hameigini mbiraore bu kayaguabi tale bigi bigi bu howa wai biyagua hangu hangu haga haga bu holebira. p  26 Anigo dama Heyolabeme haru kagoria howa marume maru baba hoba migi migi bialu wai bialu kayagua ogoni abale tale bigi bigi bu henego bia ho wiaabo habe nahe holebira. 27 Bi o larogoni tígua i̱hondo dama daraga karu wara tagi holene hongo dama Heyolabeme miya larimigonaga laro. Anidago tí baba haga kamirume dama daraga karu wara tagi helo hongo miyadago aiwabe. Aniyagua tínaga aria karu biabe biragome tí kagua manda birimigo walia haga ka. 28 Anigo ogoninaga irane i̱na dama daraga karu wara tagi holiyanaga hongo dama Heyolabeme ngiya larimigo ndo. Ngode Datagaliwabe Dinini ibugua i̱hondo hongo ngiyagoni karulo howa bero. O berogoni Ngode Datagaliwabenaga Handame Ho Holene tíni kamigoria abaleore íbu nga lalu walia haragoni. q 

29 Mbiralime agali hongohe kagonaga andaha ibunaga mbirale ngaru mo kayu bule pobe nahe holebira. Ibugua agali hongohe biago ala gi gebi minu huba bu wiyagua nde mani ibunaga andaha mbirale ngaru mo kayu bule pobehe holebira. r 

30 Mbirali i̱ aria ndo kago ibu i̱la waitigi ibuni ho ka. Ani buwa mbirali i̱la mo mogo bulene hame nale kagome waro hila halu bo purogo la haga ka. s  31 Anigo i̱na tí langerogo wali agalime ko biyagobi mege biyagobi domo wahabehe holebira. Mbiralime Ngode Datagaliwabe Dinini mege biyagua ibunaga ko ogoni domo wa naholebira. t  32 Mbiralime Agali Hole Ibiyago mege biyagua ko ogoni biyago Ngode Datagaliwabehanda domo wahabehe ka. Mbiralime Ngode Datagaliwabe Dinini mege biyagua ko ogoni biyago Ngode Datagaliwabehanda áyubi awebi domo wa naholebiraore. u 

Irame lini daganegonaga te ogo

(Lugu 6.43-45)

33 Ira bayale kagome linibi bayale dege daga ka. Ira ko kagome linibi ko dege daga ka. Ira bibahende lini darago hondowa ira ogobiore kalo manda beramili. v  34 Tí nogombi ale kamiru. Tígua tíni ko ngubi howa bi bayale agua loleberamibe. Bu habaneha to̱lo ngagobi ne harigaha la tagi haga. w  35 Mbirali bayale kagome ibuninaga bu habaneha bayale ngagobi bia tagi haga ka. Mbirali ko kagome ibuninaga bu habaneha ko ngagobi bia tagi haga ka.

36 Bi o langerogo wali agaliru tígua nagalone larimigonaga irane Daba Ki Bulene Horo harangi hangu hangu howa ladai buleberami. 37 Horo ogoningi tínaga bi larimigome tí dabalu karulape harimi nakarulape harimi lalu walia holebira, lene.

Agalime nabiagane ale bia, lenego ogo

(Maga 8.11-12, Lugu 11.29-32)

38 Ani layagola Mana lowinigo lawai haga maru hearumebiPerisi agali maru hearumebi laraga halu lalu, Lawai haga-o agalime nabiagane ale mbira hondoa ho kamago í̠na mbira bia, lene. x 

39 Ani layagola Yasuhanda mogo lo hondowa lalu, Wali agali áyu karume ko dege bialu Ngode Datagaliwabe mo tene nahaga haabo kago agidabe. Tígua i̱hondo agalime nabiagane ale mbira bia larimibe. Agalime nabiagane ale mbira Ngode Datagaliwabe manalatagi haga Yonahondo biyago dege binigo mitangi bulene nga. y  40 Yona ibu wena timbu mbiranaga tombeha horo tebiru mbi tebiru lowa berenedagua Agali Hole Ibiyagome nde horo tebiru mbi tebiru lowa dindiha wiai holebira. 41 Daba Ki Bulene Horo harangi Nineba wali agalime wali agali áyu karu baba heyuwa tihondo. Tí nakarulapeore birimi, lalu hongo howa lolebira. Irane ti Yonahanda Ngode Datagaliwabe bi mana latagi hayago hale howa mini beregedalu ko bibahende wahai hene. Anigo i̱na tíhondo heneneore larogo áyu ogoriani kago ibu Yona henegobi ndo ibu duniniore ka, lene. z  42 Daba Ki Bulene Horo harangi Siba wali agalinaga Kuini wali ibugua wali agali áyu karu baba heyuwa tihondo, Nakarulapeore birimi, lalu hongo howa lolebira. Irane wali ogonime Solomonohanda mini gigabiwi howa bi mana wále lawai hayagola hale hole ibuni dindi kaundiaore howa ibaabo hene. Anigo i̱na tíhondo larogo áyu ogoriani kago ibu Solomono henegobi ndo ibu duniniore ka, lene. aa 

Dama mbira lone dai binigo ogo

(Lugu 11.24-26)

43 Agali mbiraha dama daraga hayago wara tagi haya handala dama biago ibu puwa ibuni holenaga dindi tuhe mbira agiha ngabe hondole dindi bibahendeha tai bialu haga. Tai bialu howa mbira handa walia naheyagua ab  44 ibuni hangu lo manda bialu lalu, I̱ni andaga biagoriani dai bulebero, lo manda biaga. Ani lalu ibuni andaga biagoha dai buwa handalu karia mbira nahe bayale gini bu waho ngaria handa walia haga. 45 Hondo wialu lone tagira puwa ibuni ko kagobi ndo lowa dama karia koorene ko karu haru dai bialu anda puwa anda ogoniha haga. Ani buwa dama biarume ibuha karulai haragola agali biago abale ko hayago emene ko lowa mani ko timbuniore holebira. Wali agali ko ngubi áyu o karuha ogonidaguaore bulebira, lene. ac 

Yasu ai̱ya hamenerunaga te ngago ogo

(Maga 3.31-35, Lugu 8.19-21)

46 Yasu ibu wali agali hearuhondo bi lamialu hearia ibu ai̱ya hameneru ibini. Ti tagirani howa, Ibu baba te lole kama, lene. ad  47 Ani layagola wali agali hearuni mbiragome Yasuhondo lalu, Í̠ ai̱ya hameneru í̠ baba te lama lole li tagirani ka, lene.

48 Ani layagola Yasuhanda ladai bialu lalu, I̱ ai̱ya ago i̱ hamenebi arube, lene. 49 Ani lowa ibugua ibunaga talima piaga biaruhondo gi dola amu howa lalu, I̱ ai̱ya hamenerubi o karunigo de handadaba. 50 Wali agalime i̱ Aba dahuliya andaga kagome hame ledadagua bialu karu i̱ hamenebi i̱ mbalinibi i̱ ai̱yabi ka, lene. ae 

Copyright information for `HUI