a22.4Md 21.36
b22.6Md 21.35
c22.8Md 10.11-13, Ab 13.46
d22.112 Ko 5.3, Eb 4.24, Mo 3.4, 19.8
e22.13Md 8.12, 25.30, Lg 13.28
f22.14Md 20.16, 2Pi 1.10, Mo 17.14
g22.15Mg 3.6
h22.16Mg 3.6, 8.15, 12.13
i22.21Pig 1.27, Lm 13.7
j22.23Ab 23.8
k22.24Man 25.5
l22.29Yo 20.9
m22.301 Yo 3.2
n22.32Har 3.6, Md 8.11, Mg 12.26, Lg 20.37, Ab 7.32
o22.33Md 7.28
p22.37Man 6.5, 10.12, Lg 10.27
q22.39LBM 19.18, Mg 12.31, Lm 13.9, Ga 5.14
r22.40Md 7.12, Lm 13.10, Ga 5.14, 1Ti 1.5
s22.42Yo 7.42
t22.43Iba 110.1, Md 26.64
u22.44Iba 110.1, Ab 2.34, 1Ko 15.25, Hi 1.13
v22.46Mg 12.34, Lg 14.6, 20.40

Matthew 22

Bi yobage lowa, Wali dabu bialu tomo dawa wini, lenego ogo

(Lugu 14.15-24)

Yasuhanda wali agalihondo bi yobage lowa lamini. Ani lowa lalu, Ngode Datagaliwabehanda Handame Ho Kagoria ogo ale nga. Kini mbirame ibu igini wali dabu biyagola tomo dawa manda manda bu wini. Manda manda bu wiai howa ibugua ibunaga biabe bia haga hearuhondo, Wali agali ibalimu laruruhondo áyu ibilo lamule pudaba, lene. Ani lamule pialu hearia wali agali biaru ti ibulene manga hai hene. Ani biyagola nde ibugua biabe bia haga maruhondo, Bi ogo lama pudaba, lowa lalu, Áyu tomo nole ibalimu. Nogo bulumaga timbunibi igini habanehebi podo baga buwa bibahendeore manda manda bu wiai kogo, laya lalu dabu beramagonaga tomo nami̱ya ibalimu lole pudaba, lene. a  Ani layagola ti ibulene manga dege halu tininaga biabe bialu heneha biabe bima pugu pugu bini. Mbiragome ibuni mabuha biabe bima pene. Mendegome ibuni tirugu andaha biabe bima pene. Marume biabe bia haga biaru minu balu homelo bene. b  Ani biyiyagola handame haga kini biagome keba taraore howa ibunaga wai biaga agali hearuhondo, Agali uruni bibahende bo wahai halu tinaga tanobi heda hai hole pudaba, lene. Ani biyagola ibugua ibunaga biabe bia haga biaru olowa tihondo lalu, I̱na tomo manda manda bu wiai howa wali agali ibai halimu larugo hale halu nole ibulene nakarulape hayada. c  Ai hariga emene pedaruhabi timbuni pedaruhabi puwa wali agali handaramigo bibahende haru ibai hole pudaba, lene. 10 Ani laya handala biabe bia haga biarume hariga emene timbunibi peadagua puwa wali agali ko bayalebi ta nabi mo mogo bialu haru ibai howa tomo nole wali agalime anda biagoni to̱lai hene.

11 Wali agali ibai hayagola kini biagome wali agali bereago hondo pialu hearia mbirali dabu biagane aga nakarule berearia hendene. d  12 Hondowa ibugua lalu, Hambiya-o dabu biagane aga nakarule ogoria agua anda ibiribe, lene. Kini biagome ani layagola agali biagome mbira ladai nabiore berene. 13 Ladai nabiyagola kini biagome ibunaga biabe bia haga biaruhondo lalu, Ibunaga gi gebi minu kabu buwa aruma kagoha ba tagi hadaba. Ogoniha howa ibugua dugu bialu ibunaga ne gingirulo hayaga bialu wulebirago wilo, lene. e 

14 Ani lene lowa Yasuhanda lamaro bialu lalu, Dewa labe nahe ibalimu lenego mbira mbira hangu dabene, lene. f 

Dagisi muni mulene ngabe nawibe, lenego ogo

(Maga 12.13-17, Lugu 20.20-26)

15 Perisi agali hearume puwa, Iname Yasuhondo bi aguaore hale halu minami̱yadabe, lalu ndi lalu hene. g  16 Ani lowa tigua tininaga talima piaga marumebiHerodonaga aria marumebi, Agua lole pudaba, lene. Tigua Yasu hearia puwa lalu, Lawai haga-o iname manda bialu hemaria í̠na mana lamiriligo tiga tigaore larili manda birima. Ani buwa í̠na agali mini timbuniwi hongohe karu hondowa gi nahe maru karumebi í̠ hondowa larago mitangi nabi howa Ngode Datagaliwabehanda hame ledagonaga mana wali agalihondo lawai hariligo tiga tigaore larili. h  17 Ai bi mbira langibelo inanagaMana lowini ngago manda bialu Lomonaga Kini kagohondo dagisi muni mulene ngabe be nawibe. Í̠na manda bidedagua ina langi, lene.

18 Ani layagola Yasuhanda tinaga miniha dama mini wialu yageyage palu howa layagoni manda buwa tihondo lalu, Tí tombene hondo kihe kamiru-o tígua i̱ aginaga minule nde larimibe. 19 Muni kuni dagisinaga meramiligo i̱ hondoliya walia ha, lene.

Ani layagola tigua muni kuni biago mo yalu ibiyagola
20 ibugua tihondo lalu, Muni kuni ogoriani dengui ngagobi mini gilibu ngagobi ainagadabe, lene.

21 Tigua ladai bialu lalu, Lomo Kini kagonagada, lene. i 

Ani layagola Yasuhanda tihondo lalu, Anidago mbirale Lomo Kini kagonaga ngago nde ibunihondo milimu. Mbirale Ngode Datagaliwabenaga ngago nde ibunihondo milimu, lene.

22 Ani layagola hale howa tigua mogo timbuniore lowa ibu helalu pene.

Homenego agua heyuledabe, lenego ogo

(Maga 12.18-27, Lugu 20.27-40)

23 Horo ogoningiSadiusi agali maru hearume Yasu hearia ibuwa wali agali homeneyaru naheyulebira lole ibini. j  24 Tigua lalu, Lawai haga-o Mosesehanda lalu, Agali mbira waneigini nahe howa homayagua homayago hameneme wali dalo biago dabu bu aribia howa waneigini homayagonaga hono wia holene nga, lo nga. k  25 Anigo igiri karia hamenema ogoriani henego wahenegome wali dabu bu howa waneigini nahe heaore homayagola wali dalo bereagola ibula pagu bini biagome dabu bini. 26 Dabu buwa nde ogonidagua dege bialu ibu hamene tebonegobi ani dege bima pialu karia hamenema biaru homo mundula piai hene. 27 Ani bialu mahaore wali biago homa maro bini. 28 Ani binigo igiri karia biaru bibahendeme wali o biago dege dabu biyago horo mbiru homeneru mo heya harangi wali biago agonaga one birulebirabe, lene.

29 Ani layagola Yasuhanda tihondo ladai bialu lalu, Anduane Homogonagambugani bi lo ngagobi Ngode Datagaliwabe hongohe kagobi manda nabi kamigo mini pu tara ho kamigoni. l  30 Ogoninaga wali agali homeneru mo heya harangi wali agali dabu bulene nawiore ndobe. Ti dahuliyali dahuliya andaga karu ale dege holebira. m  31 Anigo wali agali homeneru mo heya holenenaga larogo Ngode Datagaliwabehanda tíhondo ibunaga mbugani lowini ngago daga nale dege kamibe. Ibugua lalu, 32 I̱ Abarahama Aisaga Yagaba imarunaga Ngode Datagaliwabe kogoni, lalu lo nga. Ngode Datagaliwabe ibu wali agali holenehe kagonaga kagoni homenenaga ndo ka, lene. n 

33 Ibugua mana ani lawai hayago hale howa wali agali bu hearume mogo lai ho hene. o 

Ngode Datagaliwabehanda mana lo wialu duniniore lo ngago ogo

(Maga 12.28-34, Lugu 10.25-28)

34 Yasuhanda bi layagolaSadiusi biarume bi ladai bibe nahe heago hondowaPerisi agali hearu mandagi mogo buwa 35 ti aria mbira ibu Mana lowinigo lawai haga heagome Yasuhanda bi nakarulape larabe hondole bi maru Yasuhondo hale hene. 36 Ibugua lalu, Lawai haga-oMana lowinigo ngagoni duniniore agobe, lene.

37 Ani layagola Yasuhanda ibuhondo ladai bialu lalu, Í̠na Anduane Homogo í̠naga Ngode Datagaliwabe kago í̠naga gubalinimebi minimebi mandamebi gubalini ho habe. p  38 Bi mana bibahende lowini ngago duniniore ogoni. 39 Bi mana duniniore mende ogonibiore lowini ngago ogo, Í̠ni gubalini harilidagua maru karu ta nabi gubalini ho habe. q  40 Mosesehanda Mana bibahende lowinigobi Ngode Datagaliwabe manalatagi henerume lawai halu howa lenegobi bi mana kira ogoni laboni lowini ngago mo tene howa lalu habe, lene. r 

Mbirali Dabo Helenego ibulebira lowinigonaga hale henego ogo

(Maga 12.35-37, Lugu 20.41-44)

41 Perisi agali maru mandagi mogo bu hearia Yasuhanda tihondo lalu, 42 TíguaMbirali Dabo Helenego ibulebira lowinigo ibu ai kalo manda bu kamibe. Ibu ainaga aguanene kabe, lene. s 

Ani layagola tigua ladai bialu lalu, Ibu Debidi aguanene ka, lene.

43 Ani ladai biyagola Yasuhanda tihondo lalu, Anidago Ngode Datagaliwabe Dinini ibugua Debidiha mo bila hayagola Debidihanda ibu Anduane Homogo layago agidabe. Debidihanda lalu, t 

44 Anduane Homogohanda i̱naga Anduane Homogohondo lalu,
Í̠naga waitigi karu í̠naga geme hengedai habelo i̱na mo heloliya
í̠ i̱naga gi tigahayagi ogoria birabe,
laya. u 
45 Ani binidago Debidihanda ibu Anduane Homogo layagonaga Mbirali Dabo Helenego ibulebira lo wia ibu Debidinaga aguanene agua habehebe, lene.

46 Yasuhanda ani layagola mbiralime ladai bibe naheoreyagola howa horo ogoningi howa be lirayagi tigua Yasuhondo bi mbira lone hale naheore hene. v 

Copyright information for `HUI