a27.1Lg 22.66
b27.3Md 26.14-15
c27.52 Sml 17.23
d27.9-10Seg 11.12-13
e27.11Mg 15.2, Lg 23.3, Yo 18.33, 18.37, 1Ti 6.13
f27.12Ais 53.7, Md 26.63, Yo 19.9
g27.14Yo 19.9
h27.18Yo 11.47-48, 12.19
i27.20Ab 3.14
j27.24Man 21.6-9, Md 27.4
k27.25Yos 2.19, 2Sml 1.16, Md 23.35, Ab 5.28
l27.28Lg 23.11
m27.29Iba 69.19, Ais 53.3
n27.30Ais 50.6, Md 26.67
o27.31Ais 53.7
p27.34Iba 69.21, Md 27.48
q27.35Iba 22.18
r27.38Ais 53.12
s27.39Iba 22.7, 109.25
t27.40Md 26.61, Yo 2.19
u27.42Yo 11.50
v27.43Iba 22.8
w27.46Iba 22.1, Hi 5.7
x27.48Iba 69.21
y27.51Har 26.31-33, Mg 15.38, Lg 23.45, Hi 10.19-20
z27.55-56Lg 8.2-3
aa27.56Md 20.20
ab27.58Man 21.22-23
ac27.60Ais 53.9
ad27.63Md 12.40, 16.21, 17.23, 20.19, Mg 8.31, 9.31, 10.33-34, Lg 9.22, 18.31-33, Yo 2.19-21
ae27.65Dan 6.17
af27.66Dan 6.17

Matthew 27

Yasu Pailate hearia haru penego ogo

(Maga 15.1, Lugu 23.1-2, Yone 18.28-32)

Egerebagiore hayagolaloma binigo mo miaga haguane hearumebiagali ala hene miniwi hearumebi Yasu homelo bole lo manda bialu hene. a  Tigua Yasu ege pume hende howa Lomonaga hondo haga Pailate hearia haru pene.

Yudasa homenego ogo

(Abosolo 1.18-19)

Tigua Yasu homelo bole manda bu wiyago hondowa ndelaga Yudasa biago ibu mini burugu lowa muni kuni tara pale pira tebira (30) biago loma binigo mo miaga haguane hearubibiagali ala hene miniwi hearubi hearia yalu dai bini. b  Yalu dai buwa mialu howa lalu, Agali ko mbira nabiore heago bame habe manga ndelarugo ko timbuniore biru, lene.

Ani lamiyagola tigua ladai bialu lalu, Í̠nime birigodago ina mitangi nabi kama. Í̠naga koyane, lene.

Ani ladai biyagola Yudasahanda muni biaruni Anduane Homogonaga andaha ba dai bialu tagira puwa ibuni eanogo dalu homene. c 

Ani biyagola loma binigo mo miaga haguane biarume muni biaru iluwa lalu, Muni ogoni agali darama pelalu belo mirimadago inanagaMana lowini ngagome lalu, Anduane Homogonaga anda muni wiagaha wulene nawi, lo nga, lene. Tigua, Aguaore bimi̱ya, lalu lo mbiraore howa agali dindime be wabiaganaga dindi yolo buwa, Dindi ogoni wali agali mbiraha howa ibini homarago hora helonaga tu wimi̱ya, lene. Ani binigo manda buwa áyu dindi ogoni mini Darama Dindi lagane nga.

Ani biyagome Ngode Datagaliwabe manalatagi haga Yaremaiahanda lowinigo heneneore lola hene. Ibugua lowinigo ogo, Tigua muni kuni tara pale pira tebira (30) biaru Isaraele wali agalime agali ogoninaga yolo buleberama layago mo yuwa d  10 muni ogonime agali dindime be wabiaganaga dindi yolo bini. Anduane Homogohanda i̱hondo, Bia, lo wiyadagua tigua bini, lalu gilibu nga.

Pailatehanda Yasuhondo, Yu wali agalinaga handame haga kini í̠ kebe, lenego ogo

(Maga 15.2-5, Lugu 23.3-5, Yone 18.33-38)

11 Tigua Yasu haru puwa Lomonaga hondo haga heagoria bi maru hale helo haru puwa helene. Ibugua Yasuhondo lalu, Yu wali agalinaga handame haga kini í̠ kebe, lene.

Ani layagola Yasuhanda ladai bialu lalu, Í̠na o laregoni, lene. e 
12 Loma binigo mo miaga haguane hearumebiagali ala hene miniwi hearumebi ibuhondo bi maru ladai bilo lamiyagola Yasu ibu ladai nabiore hene. f 

13 Ladai nabiyagola Pailatehanda ibuhondo lalu, Tigua í̠hondo bi o laragoni hale nahe kebe, lene.

14 Ani layagola Yasuhanda bi mbira ladai nabuleore hayagola Lomonaga hondo haga biagome mogolo hene. g 

Yasu homelo ba, lenego ogo

(Maga 15.6-15, Lugu 23.13-25, Yone 18.39—19.16)

15 Bolangua Halu Penegonaga Horo harangi wali agali bu hearume mbira garabaya henego Lomonaga hondo haga heagohondo lalu, Golope ha larama, laragola ibugua golopeore haga hene. 16 Ani biaga henego ogoningi agali mini lene mbira mini Barabasa garabaya hene. 17 Wali agali bu hearu mo mogo bu hayagola Pailatehanda tihondo lalu, Barabasa golope hoabe be YasuMbirali Dabo Helene ka lagago golope hoabe, lene. 18 Yu wali agali haru hagame henge lowa Yasu ibu hearia minu yalu ibiyagoni Pailatehanda manda buore howa ani lene. h 

19 Pailate ibu daba ki bialu biraganeni berearia ibu oneme bi lawia hayagola mbirame lama ibalu howa lalu, Abale mbiraga emaga handalu hewaria agali ko mbira nabiore ogoni mitangi bialu tandaga emene ndo narugo ibuhondo mbira bulene nawiore, laya, lene.

20 Loma binigo mo miaga haguane hearumebiagali ala hene miniwi hearumebi wali agali hearuhondo lalu, Pailatehondo Barabasa golope halu Yasu ira bangani ba para ha ladaba, lene. i  21 Ani layagola Pailatehanda wali agali bu hearuhondo lalu, Agali kira kago labo ago golope hoabe, lene.

Tigua ladai bialu lalu, Barabasa golope ha, lene.

22 Ani layagola Pailatehanda lalu, Anidago YasuMbirali Dabo Helene ka lagagohondo i̱na agi buabe, lene.

Ti bibahendeme ladai bialu lalu, Ibu ira bangani ba para habe, lene.

23 Ani layagola Pailatehanda lalu, Anidago ibugua ko agi biyabe, lene.

Ani layagola tigua hongo howa dalimu laga laga bialu lalu, Ina nahondoleorego ibu ira bangani ba para habe, lene.

24 Ani layagola Pailatehanda bulene mbira nawi ti gungu bibehe heago hondowa ibunaga bi emene hayagola wahalu wali agali bu hearuni wanakuini howa iba bereago gime ta̱la̱ muwa gi domo wahalu howa lalu, I̱na agali ogoni gi ela halu homelo ba naloleberogo. Ogoni tínime beramigoni i̱ ndo, lene. j 

25 Wali agali bu hearume ladai bialu lalu, Ibu homaragonaga pani nolene wiagua inanenibi ina waneigininibi ibira helo larama, lene. k 

26 Ani layagola Pailatehanda Barabasa golope howa ibugua ami agali hearuhondo, Yasu tibume badaba, lowa lalu, Ibu homelo ira bangani ba para hole haru pudaba, lene.

Ami agalirume Yasu mege binigo ogo

(Maga 15.16-20, Yone 19.2-3)

27 Ani biyagola Pailatenaga ami agali hearume Yasu haru halu gabumane haru haganaga andagahayagi haru piyagola ami agali bibahende bu hearuni ibu heagoria ho mabu bupe hene. 28 Ani buwa tigua ibunaga labolabo golo wahowa labolabo daramabi mbira mo karula hene. l  29 Ani buwa tigua pu aniheme bo buwa Yasunaga haguaneni karula howa Yasunaga gi tigahayagi gewa mbira mo ya ho helowa tigua ibu buhayagi bulu paligi bialu howa mege bigi bini. Mege bialu lalu, Yu wali agalinaga Handame Haga Kini haabo habelo, laga bini. m  30 Ani lowa tigua hamiaga toloba halu gewa mo ya ho helayago yamuwa haguaneni baga bini. n  31 Tigua mege biai howa labolabo daramabi karula hayago golowa ibuninaga labolabo biago karula dai buwa ira bangani ba para hole haru tagira pene. o 

Yasu ira bangani ba para henego ogo

(Maga 15.21-32, Lugu 23.26-43, Yone 19.17-27)

32 Ti tagira pole pialu hearia Sairiniali mbira mini Saimono ibalu hearia lola hene. Lola howa ami agali biarume ibu Yasunaga ira banga yilo ibuhondo, Ya ya, layagola yini. 33 Ti pialu dindi mbira mini Gologoda ogoriani anda pene. Gologoda inanaga bi lalu, Haguane Kuni. 34 Ogoriani howa tiguawaini ibabi marasini kaubibi mandagi bimaga maga buwa Yasu nelo miyagola ibu na hondowa na nabi wahene. p 

35 Tigua Yasu ira bangani ba para howa ibunaga labolabo biago ái ibu harabe hondole tadu bialu berene. q  36 Ani buwa tigua ibu handadaga ho berene. 37 Ira banga daligani bi ogo gilibu wini. Yu wali agalinaga Handame Haga Kini Yasu ogoni, lalu gilibu wini. 38 Ani buwa tigua agali ko biaga kirabi Yasu heba mendego gi tigahayagi mendego gi lehayagi lowa ti ira banga tebirani ba para hene. r 

39 Wali agali ti hearia bolangua haga bialu piyarume Yasuhondo ma bonge laga bialu tongoyongo bi laga bini. s  40 Tigua lalu, Í̠na Anduane Homogonaga anda gialope howa horo tebira howa bia dai bulebero larigodago í̠ Ngode Datagaliwabe Iginiore keyagua í̠ nahomolenaga ira banga ogoriani howa í̠ni pele mialu dalerene, lene. t 

41 Ogonidagua degeloma binigo mo miaga haguane hearumebiMana lowinigo lawai haga hearumebiagali ala hene miniwi hearumebi mege bialu lalu, 42 Ibugua wali agali maru nahomelonaga pele mialu kaligodago ibuni pele namibehedane wiaruabe. Ibu Isaraele wali agalinaga handame haga kini ndodabe. Áyu ogoni ibu ira bangani howa daliyagua iname ibuhondo mini mbiraore wuleberama. u  43 Ibugua Ngode Datagaliwabehondo mini mbiraore wuwa lalu, I̱ Ngode Datagaliwabe Igini kogoni, layagodago áyu Ngode Datagaliwabehanda ibu pele mirabe handami̱ya, lene. v 

44 Agali ko biaga kirali Yasu heba ira banga mendehayagibi mendehayagibi ba para hayago labomebi ogonidagua dege mege bini.

Yasu tongolo minigo ogo

(Maga 15.33-41, Lugu 23.44-49, Yone 19.28-30)

45 Horombe hanuniore howa dindi ogoni bibahendeha aruma ha ho wiaabo howa 46 alendo ni gai layahayagi wá hodai bini. Ani biyagola Yasuhanda bi dalimu lowa lalu, Eloi Eloi lema sabagadanai. Inanaga bi lalu, I̱naga Ngode Datagaliwabe-o i̱naga Ngode Datagaliwabe-o í̠na i̱ aginaga wahalu piribe, lene. w 

47 Bi layago hale howa wali agali maru ogoniha hearume lalu, Ibu Elaya olarua, lene. 48 Mbiragome abale gerai puwa mbirale tara dahundu alewaini iba kaubi bereagoha ibira howa ira ngunini mo gedo lowa Yasunaga ne hambuni ngelene. x 

49 Ani biyagola marume lalu, Elaya ibu pele mule ibirabe handami̱ya emene hondo hama, lene.

50 Ani layagola howa Yasuhanda bi dalimu halu mende lowa buhe̱ ereba halu tongolo mini.

51 Tongolo miyagola Anduane Homogonaga andaha labolabo timbuni gerela ho winigo hanuni daligani howa buda ki bini. Dumbirumbi emene ndo bialu to̱le̱ timbuni kambulo baga bialu y  52 homali wiaruni tawa bu baga biyagola wali agali dewa Ngode Datagaliwabehondo mini mbiraore wu heaore homeneru mo heya hene. 53 Wali agali o biarume homali helalu puwa Yasu homowa mo heya hayagola ti Tano Mbira Loma Bia Hene wiagoria anda piyaria wali agali dewaoreme ti handai hene.

54 Ami haru haga heagobi ibu heba ami agali hearubi Yasu handaya ho hayarume dumbirumbibi mbirale bibahende biyagoni hondowa gi halu mogo tara lowa lalu, Ibu Ngode Datagaliwabe Igini heneneoredago, lene.

55 Ogoniha wali dewa Galili howa Yasu biamogo bima haruru ibiyarubi uruni heba Magadala wali Meribi Meri mende Yamese Yosebela ai̱yabi Sebedi onebi ti haru amura howa handaya ho hene. z, aa 

Yasu tingini hora henego ogo

(Maga 15.42-47, Lugu 23.50-56, Yone 19.38-42)

57 Horo ogoningi alendore hayagola Arimadia howa agali homogo mbira mini Yosebe ibu Yasu talima piaga henego dindi ogoriani anda ibini. 58 Ibuwa ibu Pailate hearia puwa, Yasu tingini mule poabe, lene. Ani layagola Pailatehanda maruhondo lalu, Yasunaga tingini Yosebe milalimu, lene. ab  59 Ani layagola Yosebehanda Yasunaga tingini muwa labolabo peleore gahengeme kabu bini. 60 Ani buwa ibugua ibuninaga egeanda áyuore dege guabu winigoha yalu puwa hora hene. Hora howa ege to̱le̱ timbuni wiago muwa panga paya anda halu pene. ac  61 Magadala wali Meribi Meri mendegobi egeanda biagoha handa amu ho berene.

Egeanda mamage henego ogo

62 Horo mendeSabadangiloma binigo mo miaga haguane hearubiPerisi hearubi mo mogo bialu Pailate hearia puwa 63 lalu, Haru haga-o agali ke̱ haga o biagoni homa nabi howa lalu, Horo kiru howa tebonengi i̱ni mo heya holebero, layago manda bidama. ad  64 Anigo ibunaga talima piaga karume aribia halu ibu tingini mo yalu puwa wali agali karuhondo lalu, Ibu ibuni mo heya halu piyada, loligo horo tebiru ogoni bolangua helo ibunaga egeanda mamage bayuwaore halimu labe. Tini ke̱ abale hayago emene bayale lowa mani ke̱ timbuniore holigo í̠na ani bilimu lalu lamibe, lene.

65 Ani layagola Pailatehanda tihondo lalu, Tígua ami mamage haga agali maru haru puwa egeanda bayuwa mamage helo manda bilimu, lene. ae 

66 Ani laya handala puwa tigua ege to̱le̱ panga paya anda hayago hada buwa mamage haga biaruhondo, Mamage bayuwaore ho halimu, lalu pene. af 

Copyright information for `HUI