a18.14LBM 27.28
b18.21LBM 27.30-33, Man 14.22-29

Numbers 18

Libai hameigini maru tiloma binigo mo miaga biabe bilobi maru ti biamogo bilobi dabo helenego ogo

Anduane Homogohanda Aronohondo lamialu lalu, Í̠nibi í̠ igini bu karubi í̠ ariaLibaiali bu karubi tígua i̱nagaBalai Anda kagoha biabe tiga tiga bulene ngadagua ndo kagua bialu harimiyagua nde mo ko holene tíniha anda ibiragola ko tíni bibahendeme birimidagonaga genda yu holeberemi. Ai í̠nibi í̠ igini bu karubi tígualoma binigo mo miaganaga biabe bialu haga ngagoha mo ko hene wiagua nde genda tíni hangume yu holene wulebira. Í̠nibi í̠ igini bu karubi tígua i̱naga biabe bialu kamigola í̠naga mamali Libai aguane í̠ni aria bu karu tigua í̠ biamogo bialu Balai Andanaga biabe ngaru mandagi bialu halimu. Tigua biabe í̠na mo meregobi bialu tininaga biabe Balai Anda kagoha bialu haga wiyarubi bialu holebira. Anigo uruni tigua biabe bialu howa mbirale tamuHobane Loma Bia Hene kagoha ngarubi lomabu delaga dabu ngagobi mbirago ela holene nawi. Tigua uruni mbirago ela hayagua nde í̠nibi ti heba homolene wulebira. Libai hameigini tí bibahendeme í̠ baba biabe bialu howa Balai Andaha biabe bulene damene ngaru biai holebira. Anigo agali maru i̱na ti biabe ogoniha bialu habe naledogo ibu nabulebira. Í̠nibi í̠ igini karu tibi nde Balai Anda Hobane Loma Bia Hene biagohabi lomabu delaga dabu ngagorianibi tíni hangume biabe bialu holene wulebira. Ani beremigola i̱na Isaraele wali agalihondo lone keba halu ti mo ko naholebero. Haleha. Isaraele hameigini maru hearuni helowa i̱nimeore í̠ aria Libaiali hearu dabarugo í̠bi í̠ igini karubi tíhondo mugube ngialu biabe duniniore ogoni bialu halimulo dabarugoni. Agali uruni ti i̱ninagaore howa i̱naga Balai Anda kagoha biabe bialu holebira. Anigo í̠nibi í̠ igini karubi tí hangume anda tamu Hobane Loma Bia Heneore kagohabi lomabu delaga dabu ngagoriabi biabe bulene ngaru bialu holeberemi. Tí loma binigo mo ngiaga agali howa biabe duniniore ogoni bialu halimulo i̱nimeore tínihondo mo ngirugoni. Ani birugo ainde agali mbira i̱na ibu biabe ogoni bilo dabo hela nabinigo ibuwa biabe bialu hayagua nde ibu homelo bo wahalimu, lalu Anduane Homogohanda Aronohondo lamini.

Loma binigo mo miaga hearu tomo talebu mulene nga lenego ogo

Anduane Homogohanda Aronohondo lone lamialu lalu, Hale ha. Wali agali tigua nogo irani dai helo delararu aria ndo loma maru bo ngirarunaga mbirini ngaru tí nalu holene wulebira. Í̠bi í̠naga waneigini aguanene mani hama polobadarubi tí nalu holene wiaabo holebira. I̱ninagaore loma biaho wiabagi hene lomabu delaga dabu ngagoria lomabu dai helonaga ndo ngaru damene tí mo yulene urubi. Loma bini tí mo yuleberamidago widi loma bini ngagobi ko domo wahelonaga lomabu yalu íbu ngiragobi mbirale mbira yolo biadai bialu ngiragobi bibahendeore wali agalime i̱naga lomabu yalu ibiraru damene tíhondo mo ngiaore holebero. Í̠nibi í̠naga igini aguanene mani holobadarubi tí nalimulo ngulebero. 10 Tígua nogo loma binirubi mbirale maru loma bini ngarubi uruni bibahende de hondowa i̱ninagaore lomabu wiabagi heneore ngalo manda bulene nga. Anidagua bini ngago manda bialu agali igiribi tini hangume i̱naga Balai Anda tamuha howa tomo uruni nai holene nga.

11 Ani bialu loma maru Isaraele wali agali bu karume lomabu yalu ibirarubi tigua yamialu loma binigo mo ngiaga karu tinaga gime yuwa yaraga halu i̱hondo wigiwaga lalu mo loma biaga ale yalu ibirarubi í̠naga waneigini maha holobadaruhondobi ngerogo tínagaore wiaa̱i holebira. Í̠ damene i̱naga deni dodo nahe karu tigua tomo ogoni ta nabi nolene wulebira.

12 Isaraele wali agali tigua i̱hondo lomabu ngule mbirale bayaleore pigane dararu olibe lininaga welibiwaini iba ngarubi widi lini bayale ngarubi mali bibahendengi yalu ibiraru bibahende tíhondo mo ngiaabo holebero. 13 Tomo bayale loma bini uruni tí one waneiginiru i̱naga deni dodo nahe karu tigua ta nabi nolene wulebira.

14 Mbirale bibahende Isaraele wali agali tigua i̱hondo lomabu ngini ngaru tinime yolo biadai nabule larugo uruni bibahende tínaga dege wiai holebira. a 

15 Isaraele wali agali tinaga igiri wahene taba hanaragobi nogo igini wangabe pigane hono wiragobi bibahende i̱ninaga lalu lomabu yalu ibugu biraru bibahende tíninaga ngelarogoni. Anigo mani Isaraele wali agali tinime tinaga waneiginibi nogo i̱naga deni dodohe kagobi yolo biadai bule layagua nde ani bilo hondo halimu. 16 Isaraele tinaga igiri gali ege mbira hangu penego muni kina pira duria (50) hangume yolo biadai bulene nga. 17 Anigo nogo bulumaga meme sibiru pigane wini karu ti yolo biadai bulene nawi. Ogoni loma bialu i̱ninaga bo deloleneore nga. Tígua nogo uruni balu darama lomabu delaga dabu ngagoha odoba halu habane damene kago loma bialu dabu ngagoriani delalimu. Anidagua deledemigola nga baya tara birago i̱na nga halu turu holeberogo ani bilimu. 18 Ani bialu loma urunibi tínaga dege nogo bo delaragonaga galukunibi ge tigahayaginaga burulene ngarubi tígua gime yaraga howa i̱nihondo wigiwaga lalu ngiaga biagobi tí mo nolene nga.

19 I̱na Isaraele wali agalirume i̱nihondo mbirale lomabu ngiraru bibahende tíhondobi mo ngialu tínaga waneigini aguanene mani holobadaruhondobi miaabo holebero. Anidagua larogoni habo nalolene bi tí bababi tínaga waneigini aguanene mani holobadaru bababi wiaabo helonaga lo wero, lene.

20 Anduane Homogohanda Aronohondo laabo halu lalu, Tígua Isaraele wali agalinaga dindi ngaru aria mbirago mani tí waneigini bu holebiraru tinaga mo wia holenaga na mo wilimu. Tí mbirale burupale kamiru tínaga Anduane Homogo i̱ni kogome karulape ngialu haabo holebero, lene.

Anduane HomogohandaLibai hameiginiru mbirale migi binigo ogo

21 Anduane Homogohanda laabo halu lalu, Isaraele wali agali tigua tinaga tomo bibahende tale buwapini damenego i̱hondo yu ibalu ngiragola i̱na tomo i̱hondo ngirago Libaiali karu hangu mo mulebero. Tomo mbirale o ngulubadaruni tigua i̱nagaBalai Anda kagoha biabe bialu handayaho kagonaga yolo ogoni holebira. b  22 Maniore howa horo bibahendengi Isaraele wali agali bu karu aria mbira i̱naga Balai Anda kago kaware polene nawiorego napolebira. Mbirali ibu doga halu Balai Anda kago kawareni piyagua nde tiha pani nolene wulebirago i̱na ogoni ibu homelo bo waholebero. 23 Áyu ogoni howa Libai hameigini karu ti hangume i̱naga Balai Anda handayaho howa biabe bialu holebira. Tigua biabe ogoni baya hangu bulene ngago nabi hayagua nde tinime bia ko hayadagonaga pani nolene wulebira. Mana ogoni wiaa̱i̱ halu tinaga waneigini aguanene mani holobadarume yu haabo holebira. Libai aria karu tinaga dindi lenego mbira Isaraeleali maru ti ngadagua nawi kagoni 24 irane wali agalime tinaga tomo mbirale ngaru pinigo i̱naga lomabu yalu ibirago ogoni Libaiali tininaga mo miruli. Anidagua bulenaga ai ti Isaraele dindiha Libai hameigini karu ti dindi tu wa mia nabilimu laru, lalu Anduane Homogohanda lene.

Libai aria tigua wali agalime pini pini yalu ibiyago mo wigi binigo ogo

25 Anduane Homogohanda Mosese lamialu, 26 Libai hameigini karuhondo bi ogodagua labe. Isaraele wali agali maru karu tigua tinaga pini pini Anduane Homogo mule yalu ibiraru ibugua Libai hameigini tí mo ngulebira. Ani biragola tígua nde mbirale uruninaga pini pini damenego Anduane Homogo ibunihondo lomabu milimu. 27 Ani beramigola loma uruni widi bayale gahenge lomabu miagago alebi waini iba bayale gahenge lomabu miagago alebi tígua lomabu meramigo Anduane Homogo ibuni hondolebira. 28 Isaraele wali agali tigua tinaga pini pini lomabu minigo aria ngiraru yu howa nde ogoninaga pini pinigo tale bialu Anduane Homogohondo mulene wini ngago manda bialuloma binigo mo miaga Aronohondo milimu. 29 Tígua tomoru baya hangu tale bigi bialu bayaleorego Anduane Homogonaga mo bagiho ngelowa ibuni mo milimu. 30 Ani bialu tígua tomo bayale uruni Anduane Homogohondo mo miai howa ibira harago Libai aria kamiru tí mo yalimu. Tomo hangaga agali kagome ibunaga tomo pini pini lomabu mialu ibira harago mo yagadagua ani mo yulene nga. 31 Tomo uruni Anduane Homogonaga Balai Anda kagoha biabe bialu kamigonaga yolo ogonigo tí one waneigini baba ibira hene ngago tí nolene nga. 32 Tígua tomo bayale damenego lomabu mialu ibira hene ngago tíni narimiyagua nde tíha mo ko hene mbira nawulebira. Anigo Isaraele wali agalinaga lomabu yalu ibiyaruni lomabu mia nabi tíni ala nalu harimiyagua nde tígua mo ko hai haramigome ai tíha mo ko hene wialu pani nolene wulebira. Ani ngagola Anduane Homogohanda tí balu homelolebira, lalu Mosesehanda lene.

Copyright information for `HUI