a27.7Dag 36.2
b27.12-14Man 3.23-27, 32.48-52
c27.171 Kin 22.17, Ese 34.5, Md 9.36, Mg 6.34
d27.18-19Kis 24.13
f27.21Har 28.30, 1 Sml 14.41, 28.6
g27.23Man 31.23

Numbers 27

Selobehada wane berearu dindi tu wa minigo ogo

Selobehada ibu Hebe igini hene. Ani bialu Hebe ibu Gileada igini hene. Gileada ibu Magiri igini hene. Ani bialu Magiri ibu Manase igini halu Manase ibu Yosebe igini hene. Selobehada ibu wali dabu bialu ibu oneme wandari duria taba henene. Wandari uruni mini Mala Noa Hogola Miliga Tirisa imaru uruni berene. Wandari uruni tigua puwa Anduane HomogonagaBalai Anda heago haneni pu howa Mosesebiloma binigo mo miaga Eleasabi Isaraele wali agali bu hearubi tinaga deni pu hene. Ani pu howa wandari uruni tigua lalu, Ina aba dindi ko iba dalu naibaga wiagoha homayagoni. Ibu agali mine halu Anduane Homogo kagohondo erembira miaga Kora aria ndo hene. Ibunime ko tara binigome ibu igini mbira nahonowi halu homayagoni. Ibunaga mini ereba nahe wiaabo helo ibu igini mbira nahedago ai ina Isaraele hameigini kamaruni aria mbirago homo amolelo waholene karulapedabe. Anidagua bulene nakarulapedago ina abanaga dindi podo wini ngago inane mo ngilimulo hamelo kamagoni, lalu lamini.

Ani layagola Mosesehanda tinaga bi layago hale howa Anduane Homogohondo bi la halu hene. Ani la hayagola Anduane Homogohanda ladai bialu lalu, Selobehada wane urunime tinaga bi layadagoni tigabioredago ti aba damenerunaga dindi ngago tini helo mo milimu. a  Isaraele hameigini karuhondo ogodagua labe. Agali mbira ibu igiri nahonowi wandari hangu aba heneyagua nde wandari uruni ti abanaga dindi tini helo mulene nga. Ibu wanebi mbira nahonowi dege homayagua ibu hamene karume karulolene wulebira. 10 Ibu hamene naheyagua nde ibu aba hamene karume karulolene nga. 11 Ai ibu hamene nahe aba hamenebi naheyagua nde ibu hameigini kagome karulolene nga. Isaraele wali agalirume I̱ Anduane Homogo i̱na bi áyu langerogodagua baya hangu talialu bulene nga, lalu Anduane Homogohanda lene.

Anduane Homogohanda Yosua dabenego ogo

(Mana Loyane 31.1-8)

12 Anduane Homogohanda Mosese lamialu lalu, Hari Abarimini irigi howa dindi Isaraele wali agalihondo muleberogo amu ngagonigo handa amuha hole pu. b  13 Hondowa í̠ hamene Arono homayadagua í̠bi homoleberego irane 14 Sini dindi ko wali agali nahaga Meribani howa wali agali hearume gomogomo dewa lene. Ani layangi libu kirabalime i̱naga bi larugo mo wahowa i̱naga hongo holene tigabi ogobi lalu mo walia naharibigonaga í̠ homolebere, lene. Iba Meriba ogoni dindi ko wali agali nahaga Sini dindiha dindi emene mbira Kadese ngagoria dugualu pora.

15 Mosesehanda Anduane Homogohondo bi ogodagua lalu. 16 Anduane Homogo Ngode Datagaliwabe-o wali agali bibahendenaga holene tene í̠ kegoni. Í̠naga wali agali nogo sibi haru haga nahe mbaule holigo agali mbira dababelo. Agali ogoni ibugua wali agali haru helobi wai birangi haru bamba helobi ani dababelo hameledo, lene. c 

18 Ani layagola Anduane Homogohanda Mosesehondo lalu, Nunu igini Yosua ibu miniwi kago ibunaga haguaneni gi wibe. d  19 Loma binigo mo miaga Eleasa halu wali agali bibahende kagoria Yosua helowa í̠na biabe bibahende biriligo ibugua bia aribia helo lalu bibahendenaga deni latagi habe. 20 Isaraele wali agali bibahendeme ibunaga bi larago hale halu bilo í̠naga hongo maru ibuhondo mibe. 21 Anigo Yosua ibugua i̱naga hame hondole lowa loma binigo mo miaga Eleasa karia puwa ibunaga deni holebira. Eleasa ibugua ege to̱le̱ kira manane handagane mbira mini Urimu mende mini Tumimu ogonilabome i̱naga hame mo walia holebira.
(27.21)Urimu Tumimu bi ogolabo irane mbuga Haru Tagira Penego 28.30 handabe.
Ani walia haragola hondowa Eleasa ibugua Yosuahondobi Isaraele wali agali bibahendehondobi ogo ale bidaba lalu lamulebira, lene. f 

22 Mosesehanda Anduane Homogohanda layadagua bibahende biai hene. Ibugua Yosua haru puwa loma binigo mo miaga Eleasabi Isaraele wali agali bibahendebi heagoria haru íbu helene. 23 Anduane Homogo ibugua bibe layadagua Mosese ibugua Yosuanaga haguaneni gi wialu, I̱na biabe biagane bibahende ngaru í̠na bialu habelo, lalu lene. Ani layagola Yosua ibugua Isaraele wali agalinaga haru hagane ha aribia hene. g 

Copyright information for `HUI