a3.2Dag 26.60
b3.4LBM 10.1-2, Dag 26.61
c3.12-13Har 13.2

Numbers 3

Arono igini henerume binigo ogo

Anduane Homogo ibugua Mosesela Hari Sainai heagoria bi laribingi howa Mosese Aronola libu damene ogodagua hene. Arono igini maria henego wahene Nadaba hene. Mende Abihu halu tebone Eleasa halu mane Idama hene. a  Ani hemigola Mosesehanda tinaga haguaneni weli odo wialu ti agaliloma binigo mo miaga helo dabo helene. Anigo ti Sainai dindi ko yobi wiagoha hemingi howa Nadaba Abihulame ira hagua ngabiagainisenesi lomabu delalibu lalu Anduane Homogohanda lamiyagola ndo libuni manda bialu lomabu delalu hene. Ani bialu hebiria Anduane Homogohanda libu homelo bo wahene. Anigo libunaga waneigini mbira nahe homene. Ani biyagola igiri kirali Eleasa Idamala libu aba Arono heangi loma binigo mo miaga agali howa biabe bialu hene. b 

Libai hameiginiru loma binigo mo miaga helo dabo helaga binigo ogo

Anduane Homogohanda Mosesehondo lamialu lalu, Libai hameigini karu haru ibuwa tiloma binigo mo miaga Arononaga biabe biaga helo dabo helabe. Tigua i̱nagaBalai Anda kagoha biabe bulene ngago bialu howa loma binigo mo miaga karunaga biabe birago biamogo bialu wali agali karubi biamogo bialu helo dabo helabe. I̱na Isaraele wali agali tihondo lamirudagua Libai hameigini tigua i̱naga Balai Andaha ngaru bibahende baya hangu handayaho holebira. Libai hameigini karu tinaga biabe bulene mbiraore hangu nga. Tigua Aronobi ibu iginirubi loma binigo mo miaga karunaga biabe bialu haabo holebira. 10 Aronobi ibu iginirubi tigua dege loma binigo mo miaga howa tinaga biabe bulene alego bialu holebira. Anigo agali Arono aria ndo mbirame loma binigo mo miaganaga biabe ngago bialu heagua nde agali ogoni homelo bo wahalimu, lene.

11 Ani lowa Anduane Homogohanda Mosese lamialu lalu, 12 Áyu Libai hameigini karu ti i̱ninaga wali agaliore helo helarogoni. Bamba i̱na Iyibialirunaga igini wahene hearu damene bibahende bo wahai halu Isaraele wali agali tí igini wahene bibahende i̱ninagaore helo dabalu tínaga nogo tara tara kamirunaga igini wangabe pigane wirago bibahendebi i̱ninaga helo helalimu larugoni. Anigo áyu howa ai uruni bibahende tíninaga helalu Libai hameigini i̱ninagaore helarogoni. Tínaga igini wahene i̱nihondo ngulenedaguabi tínaga nogo tara tara karume igini wangabe pigane wirago i̱hondo ngulenedaguabi uruni bibahendenaga Libai hameigini ti i̱ninagaore hai helarogoni. Anduane Homogo i̱ore kogoni, lene. c 

Libai hameiginirunaga mini gili binigo ogo

14 Dindi ko yobi Sainai wiagoria howa Anduane Homogohanda Mosesehondo lamialu lalu, 15 Libai hameigini karu bibahende dagalai halu tinaga one waneiginirubi bibahende daga lalu mini gilibu wibe. Ani bialu igiri gali ege mbira bolangua hene taba yidarunaga minibi gilibu wiai halimu, lene. 16 Ani layagola Mosesehanda nde Anduane Homogohanda bibe lalu lamiyago bibahende biai hene. 17 Ani bialu Libai igini tebirali Gesonobi Kohadabi Merari imaru hene. 18 Gesono igini kira Libini Simeila hene. 19 Kohada igini nde maria Amaramabi Isihabi Heberonobi Usielebi uruni hene. 20 Merari igini nde kira Mali Musila hene. Libai aria tinaga aguanene mani henerume tinaga hameigini agali uruninaga mini dege laabo haga hene.

21 Gesono ibu hameigini kira henego mbirago Libini ibu damene halu mendego Simei damene hene. 22 Ani howa tinaga igiri emene ege mbira pu bolangua henego dagalamaga halu daosini kariani handari duria (7,500) bibahende hene. 23 Agali uruni tinaga balai anda Anduane Homogonaga Balai Anda kagonaga erembiraha ni paliragohayagi biaga hene. 24 Ani bialu Gesono hameigini Laele igini Eliasaba ibu agali uruninaga haguane hene. 25 Agali uruni tinaga biabe Anduane Homogonaga Balai Anda heago handayaho howa Balai Anda dangini dambi haga wiagobi anda ogoninaga panga payaga labolabo wiagobi 26 labolabo mbira Balai Andala lomabu delaga dabula tu wiaki haga gerelape heagobi pabe panganaga labolabo heagobi handayaho haga wini. Tinaga biabe uruni damenego handayaho haga wini.

27 Ani bialu Kohada ibu hameigini maria hene. Uruni mbirago Amarama ibu damenerubi mendego Isiha ibu damenerubi tebonego Heberono ibu damenerubi manego Usiele ibu damenerubi hene. 28 Ainde hameigini maria uruni tinaga igini gali ege mbira bolangua henego bibahende dagalamaga howa daosini halirani handari tebira (8,300) bibahende hene.
(3.28)Hiburu bi lalu gilibu wini ngagoha howa daga daosini halirani handari waragaria (8,600) hene leda. Anigo bamba Girigi bi lo beregedo winidagoha agali marume Girigi bi lo beregedalu gili binidagoha daosini halirani handari tebira (8,300) hangu hene leda. Daga daosini halirani handari tebira ogoni tigabi nga lo manda bidamago irane hobane 39 howa dagalamaga halu daosini pira kirani kira (22,000) bibahende hene leda. Daga daosini halirani handari waragaria (8,600) ogoni ani ngelarimayagua nde daga bibahende lamaga halu daosini pira kirani kira halu handari tebira (22,300) bibahende holebirada.


29 Hameigini uruni tigua tinaga balai anda dindi abene unurahayagi bulene wini. 30 Ani bu heagola Usiele igini Elisabana ibu tinaga haguane hene. 31 Agali uruni tigua handayaho howa biabe bialu helogo Habo Nalolene Bi lo winigonaga Mbogoyi wiagobi dagia tebolo wiagobi lamu hale wiagane irane biagobi lomabu delaga dabu kira hayago labobi ndisi beru belediru loma binigo mo miaga biaru tiguaHobane Loma Bia Hene tamuhabi labolabo Hobane Loma Bia Heneore hobaanda hene biagobi uruni bibahendeore handayaho hai haga wini. Tinaga biabe mbirale uruni damenego baya hangu handayaho haga hene.

32 Loma binigo mo miaga Arono igini Eleasa ibu Libai hameigini uruni bibahendenaga agali haguane hene. Ibugua agali uruni Anduane Homogonaga Balai Anda heagoha biabe bulene wiago damene bilonaga haru haga hene.

33 Merari aria hearu ti nde hameigini kira henego Mali ibu damenerubi Musi ibu damenerubi hene. 34 Tinaga igiri gali ege mbira bolangua henego damene dagalamaga halu daosini dege waragariani handari kira (6,200) bibahende hene. 35 Abihaili igini Suriele ibu agali uruninaga haguane hene. Uruni tinaga balai anda Anduane Homogonaga Balai Anda henegonaga abene uyurayagi bini. 36 Ani bu howa tinaga biabe Balai Anda henegonaga anda gene heneru handayaho hene. Anda gene bibahende heneru hongo howa helonaga mbogoyi boronosime dindiha wabu berelaga biyarubi ira anda háinaga libu helayarubi anda gene uruni damenego handayaho hene. Tinaga biabe mbirale uruni handayaho haga hene. 37 Ani heagola Balai Anda hagira bu yaanda halu pabe bini heagonaga gene bu hearubi gene hongo howa yilo mbogoyi dindiha wabu bereledagobi labolabo anda hái heago hongo howa yu helo pu dariba holenaga ira gelo dindiha wearubi pabe ogoninaga labolabo daba heagobi uruni bibahende handayaho hai haga hene.

38 Mosesebi Aronobi Arono igini bu hearubi tinaga balai anda ni tagira ibiragohayagi Anduane Homogonaga Balai Anda heago haraba wiagoria bialu haga wini. Ani bialu agali uruni ti hangume Balai Anda Hobane Loma Bia Hene heagoha anda puwa biabe bulene winiru bialu wali agalinaga lomabu yalu ibirago mo migi bialu hene. Agali hameigini mendeme biabe ogoni biyagua nde Isaraele wali agali bu hearume agali ogoni homelo bo wahaga wini. 39 Libai hameigini bibahende dagalamaga halu daosini dege pira kirani kira (22,000) hene. Agali daga lenego bibahendeore igiri gali ege mbira bolangua henegoria howa dagalama pialu agali waheni dagalairi henego ogoni. Mosese Aronola libugua Anduane Homogohanda daga lalibu lalu lamiyadagua ani dagalai hene.

Isaraelealinaga igini wahene Anduane Homogohondo mulene winigo Libai hameigini ti ha aribia henego ogo

40 Anduane Homogohanda Mosesehondo lamialu lalu, Isaraele wali agalinaga igini wahene taba hanarago i̱ninagaore holebira. Ani holebirago walime igini wahene taba hono bedago ege mbira poragola ibunaga mini gilibu wilimu. 41 Ani wialu igiri emene uruni ti wahalu helo. Anduane Homogo i̱ore kogonigo i̱na Libai hameigini ti i̱nagaore helo hela aribia holebero. Ani bialu Isaraelealinaga nogo bulumaga igini wangabe pigane wirago i̱ninaga holebira larugoni wahalu Libai hameigini karunaga nogo igini wangabe pigane wirago i̱ninaga ha aribia helo, lalu Anduane Homogohanda lene. 42 Ani layagola Anduane Homogohanda bibe layadagua bialu Mosesehanda igiri gali 43 ege mbira bolangua heneru damene bibahende mini gilibu wiai hene. Ani gili biai howa dagalalu hearia daosini dege pira kirani kira halu handari kirani pira kariani tebira (22,273) bibahende hene.

44 Anduane Homogohanda Mosesehondo lone lamialu lalu, 45 Áyu Isaraele wali agali bibahendenaga igini wahene taba hanarago i̱nihondo ngulene winigo wahalu Libai hameigini bibahende i̱nihondo lomabu ngibe. Isaraele wali agalinaga nogo bulumagaru igini wangabe pigane wirago i̱nihondo lomabu ngulene winigo wahalu Libai hameigini karunaga nogo bulumagaru ha aribia halu i̱ninaga helo lomabu ngulene nga. 46 Isaraeleali igini wahene dewaore halu handari kirani pira kariani tebirame (273) Libai hameigini bolangua hayadago ai tínaga igiri uruni Isaraele wali agali tíni yolo biadai bilimu. Igiri bolangua howa handari kirani pira kariani tebira (273) hayadago yolo biadai bilimu, lene. 47 Igiri mbira mbiranaga muni kina pira duria (50) dege degeme yolo biadai bulene nga. 48 Muni uruni yalu puwa Arono halu ibu igini karuhondo milimu, lene. 49 Mosese ibugua Anduane Homogohanda bibe layadagua bialu Isaraeleali igini wahene maru bolangua hayaru yolo biadai binigonaga muni mo mogo buwa kina dege daosini pira mbirani tebirani handari waragariani pira duria (K13,650) mialu Arono halu ibu igini biaruhondo mo mini.

Copyright information for `HUI