a102.24Yob 36.26, Iba 90.2, Ais 38.10, Hab 1.12
b102.25-27Hi 1.10-12
c102.27Ais 43.10, Mal 3.6, Ya 1.17

Psalms 102

Igiri daliaheme genda yu howa bi lenego ogo

Anduane Homogo-o i̱na í̠hondo bi larogo hale habe.
Í̠na i̱ biamogo bibelonaga í̠ olalu kogo hale habe.
I̱ genda timbuni yu kongi
í̠na i̱ yu wahalu napobe.
I̱na í̠ olarogola bi larogo hale halu abale biamogo bibe.

I̱naga holene emene tigi mbira hangu ira hagua bialu abaleore pu ereba hagagobi kogoni ndobe.
I̱naga tingini poboyogo bialu
ira timbuni dedagola poboyogo biraligobi bialu helo kogoni ndobe.
Datani gaule agalime hengedalu piagadagua
Ngode Datagaliwabehanda i̱ hengedo wahenego kogoni.
I̱naga tiniha tomo nolene garibi nale ko.
I̱ tandaga timbuni howa e̱ lalu ngogoni.
I̱naga tingini timbuni nahe yólalu kuni hangu haragonida.
I̱ mo ko henego koore
dindi ko wali agali nahaga ngagoha ega e̱wa̱tia biragagobi
dindi labu ngagoha ega halengau biragagobi bedogonida.
I̱ dagiani palia padogoyu
ai i̱ paliahondo nahe yangayanga bu wiaabo kogoni ndobe.
Ega warakuli anda dangini hangu biragadagua
i̱ni hanguore bedogonida.
Mbiraga horombebi waitigi bu karume
i̱hondo bi ko dege lalu haabo ka.
Tigua i̱ mini lowa mege bialu ha haga bialu ka.

Í̠na i̱hondo keba timbuni ho kegome
i̱ nde beru dugu nalu
de iba pugulope halu
gabo beha iba biraradagua bedago nalu bedogonida.
Í̠na i̱ minalu mbirale ko ngaru mo wahagadagua
mo wahenego bedogonida.
11 I̱ dindini lu holene nawi
tubagiore alendo halu ni dadai biraligobi kogoni.
Datani gaule ngaligobi bedogonida.

12 I̱ ogonibigoyu nde Anduane Homogo-o í̠ kini haluheore kegoni.
Wali agali maha ho aribia holebirarume
í̠ manda biai holebiragoni ndobe.
13 Í̠na Saiono tano ngago mitangi bialu dara holeberego manda bido.
Í̠na dara howa biamogo bulene horo biagoni abale tagira ibiyada.
Horo ogoni áyu ngagoniore ndobe.
14 Saiono tano bo gialabagabu wahayago
í̠naga biabe biahaga karume tano ogoni mitangi timbuni bialu hamelo ka.
Áyu tano ogoni mo ko hai hene ngagoyu
tigua dara ho haabo ka.

15 Hameigini tara tara dindi bibahendeni palima pedarume
Anduane Homogohondo gi hai holebira.
Dindi bibahendeni kini karume
ibunaga hongo timbuni kago hondowa
ti gi hai holebira.
16 Mani howa Anduane Homogohanda Saiono tano lone biadai birangi
ibunaga hongo ogobi lalu walia holebira.
17 Ibugua ibunaga wali agali yu wahene karume olaragola hale holebira.
Tigua ibuhondo bi lararu hale howa erembira mialu napolebira.

18 Anduane Homogohanda mbirale áyu inahondo biraruni
ina waneigini aguanene mani holobadarume hendelo mbugani gilibu widaba.
Wali agali mani holebirarume Anduane Homogohanda biniru te hale howa
ibunaga mini yaraga halu holebira.
19 Iname bi ogodagua gilibu wimi̱ya.
Anduane Homogo ibuni haga daligaoreha howa handape haya.
Ibu dahuliya andagani howa dindiha handadaliho haya.
20 Wali agali garabaya bini hearume
tandaga nalu howa dugu biayuago hale haya.
Hale howa ibugua agali godi hale hagame bo waholene nga lene hearu
ti homa nabilonaga biamogo bialu golope haya, lalu gili bulene nga.
21 Ibugua ani biyago hale howa Saiono dindini wali agali bu karume
Anduane Homogonaga mini latagi halu
Yarusalemeni howa ibunaga mini yaraga halu holebira.
22 Hameigini tara tara dindi bibahendeni palima pedarubi tinaga kini karubi
ti bibahendeme Anduane Homogo mitangi bialu
lotu lole íbu ngoai harangi ani lalu holebira.

23 I̱ wene igiri daliahe dege hewaria
Anduane Homogohanda i̱naga hongo bope ho heledagonida.
Ibugua i̱ dindi ogoriani lu naholiya
i̱naga holene mo tubagi ho heledagoni ndobe.
24 I̱naga Ngode Datagaliwabe-o í̠ haluhe haabobo bu kegoni. a 
I̱ agali wahe ndo wene igiri daliahe dege kogonigo
í̠na i̱ áyu ogoni yamia nabibe.
25 Bambaore í̠na dindi bibahende wabiniyagoni. b 
Í̠ninaga gimeore hari daliga li kago wabialu
mbirale karubi ngarubi bibahende wabiai hariya.
26 Aga labolaboru goba halu budahole biagadagua
dindi harila mo ko holebiragoyu
í̠ni hangu haabobo bu haga kegoni.
Agalime aga labolabo goba haragola wahagadagua
dindi harila ereba hai haragola lone nahondoleberemaore.
27 Í̠naga holene ala henegobi dege haho wiaabo haga kegoni. c 
28 Í̠ ani kegoni howa inanaga waneiginiru ti bayale helo
í̠na handaya ho holebere.
Tinaga aguanene maniore hama polobadarubi
ti í̠ni andaneha bayale haabo holebira.
Copyright information for `HUI