Psalms 108

Ngode Datagaliwabehanda ibunaga wali agali biamogo bilonaga bi lenego ogo

(Iba Gana 57.7-11, 60.5-12)

Ngode Datagaliwabe-o i̱ mini bilinahe howa
í̠hondo mini mbiraore hongohe wu kogonigo
i̱na iba ganaru lalu
í̠naga mini yaraga halu holebero.
I̱ni padogoria heyuwa i̱na ngida aleru barogome
ni tagira ibilo mo heya holebero.
Anduane Homogo-o i̱ dindi tara tara ngaruha pu howa
í̠hondo ka̱i̱ laabo holebero.
Hameigini tara tarabu karuha pialu
i̱na í̠naga mini yaraga hama polebero.
Anduane Homogo-o í̠naga gubalini haabo holene emene ndoore
hari daliga elahe wu kegoni.
Í̠naga mini bilinahe ngego timbuni yangale howa
hari mindini elahe wu kegoni.

Ngode Datagaliwabe-o í̠ni timbuniore dunini kego wali agalime handai helo
hari daligani mo walia habe.
Dindi bibahendeha í̠naga wá holenebi mini lene holenebi
panigi mo walia habe.
Í̠na ina gubalini timbuni ho haga kegonigo
bayale hai holoma̱ya i̱naga bi larogo hale habe.
Í̠naga hongo timbuni ho kegome ina pele ngibe laro.

Ngode Datagaliwabehanda ibuninaga andaha howa lalu,
I̱na wai bialu bo podahana hai halu wayali harugo
Segeme dindibi Sugodo dindiha dindi ulini bugubugu wuyu pedarubi
dindi uruni i̱naga wali agaliru ti helo
i̱na ti tu wu ta hai holebero.
Gileada dindibi Manase dindibi i̱ninagaore nga.
Eberaimi ibu i̱naga ege manda ale nga.
Yuda ibu kininaga haru haga halimbu ale nga.
Moaba dindi i̱naga wayawaya biaga ndisibe ale wialu
Idomo dindi i̱nagaore ngo lalu i̱na i̱naga ge su golowa
dindi ogoriani ba amu holebero.
I̱na Pilidialiru balu wayali howa
turu halu ga̱ lalu harugoni, laya.

10 Ngode Datagaliwabe-o pabe hongohe bu mabubi tano ngagoha
i̱ aiwa haru anda polobadabe.
Idomo dindiha i̱ aiwa haru polobadabe.
11 Ngode Datagaliwabe í̠na ina erembira ngiribe.
Í̠na inanaga ami agali karu biamogo nabuleorebe.
12 Agalinaga hongome ina biamogo bulene emene nakarulapego
ina waitigi bu karu baba wai buluma̱ya
í̠nioreme ina biamogo bibe.
13 Ngode Datagaliwabe ibu ina heba kayagua nde
iname wai bialu wayali holeberema.
Waitigi karu ibunime bope hai holebira.
Copyright information for `HUI