a115.4-8Iba 135.15-18, Yar 10.5, Mo 9.20
b115.13Mo 11.18, 19.5

Psalms 115

Ngode Datagaliwabe mbiraore howa ibuni hangu heneneore kagoni ogo

Anduane Homogo-o í̠na ina horo bibahendengi gubalini haho wiaaboore halu
mini bilinahe howa ina yu wanahagaore kegoni.
Í̠ aniore biaga kegonaga iname inanenaga mini mo yaraga holene nawiore.
Iname í̠naga mini hanguore mo yaraga haabo holene nga.

Wali agali hameigini tara tara paluyu pedarume inahondo hale halu,
Tínaga Ngode Datagaliwabe hayuagoni agoha kabe,
lalu kagoni irane aginagadabe.
Inanaga Ngode Datagaliwabe ibu dahuliya andagani kagoni.
Ibu hongo haihe howa
ibuni mbirale mbira bule manda biyagua
ta nabi biai habehe kagoni.
Wali agali tara tara karume muni ngolomebi silibamebi a 
mbirale mbira gime wabuwa tinaga bi pupu wiagane uruni laga ka.
Bame wali agali tini degeme wabu helene urunihondo
tinaga bi pupu wiagane laga kagoni.
Mbirale gime wabini uruni
ti ne hariga wia ngagoyu bi nalabehe.
De kagoyu tinaga deme nahandabehe.
Tinaga hale kagoyu hale nahabehe.
Ngui hariga ngagoyu nguime nga nahabehe.
Tinaga gi kagoyu ema bialu mbirale mbira ela nahabehe.
Ge kagoyu ibaga bialu pobe nahe.
Tinaga ne harigaha howa bi mbira latagi habe nahe kagoni.
Wali agali uruni wabiaga karumebi mo dunini haga karu tinibi
mbirale tini wabini urunibi dege helo hame ledo.

Isaraele wali agali kamiru
tí Anduane Homogohondo mini pagaho halimu.
Ibugua tí biamogo bialu de handayaho haga kagoni.
10 Ngode Datagaliwabenagaloma binigo mo miaga Arono aria kamiru
tí Anduane Homogohondo mini pagaho halimu.
Ibugua ti biamogo bialu de handayaho haga kagoni.
11 Wali agali ibu mitangi bialu lotu laga kamiru
tí Anduane Homogohondo mini pagaho halimu.
Ibugua ti biamogo bialu de handayaho haga kagoni.

12 Anduane Homogo ibugua ina mbirale burupale kama aleru mitangi bialu biamogo biaga kagoni.
Ibugua Isaraele wali agalibi
Ngode Datagaliwabenaga loma binigo mo miaga karu ariabi
ibunime ti mo gumbila holebira.
13 Anduane Homogo ibugua wali agali emene timbunibi b 
ibu mitangi bialu ibu andaneha haga karu
ibunime ti mo gumbila holebira.

14 Anduane Homogo ibugua tíhondo waneigini dewaore ngialu
tinaga waneigini mani hama poraru tihondobi
waneigini dewaore milo hamelo kogoni.
15 Anduane Homogo dindibi hari daligabi bibahende wabini kagome
tí mo gumbilaore helo hamelo kogoni.

16 Hari daliga bibahende Anduane Homogo ibuni hangunaga ngagonigo
ai dindi timbuni o ngagoni ina wali agali holoma̱yanaga ngini.
17 Wali agali homalu dinini humbirini andaga pugu biyagoni
tigua humbirini andaga pu howa Anduane Homogonaga mini mo yaraga nahaga.
18 Ai ina wali agali dindini dére emabu kamaru
iname Anduane Homogonaga mini mo yaraga halu ibuhondo ka̱i̱ lami̱ya.
Áyu kamangibi manibi ka̱i̱ laaboore hami̱ya.
Anduane Homogonaga mini mo yaragaore haabo holene nga.
Copyright information for `HUI