a121.1Iba 87.1, 123.1
b121.2Iba 115.15, 124.8
c121.3Iba 41.2, 66.9, 127.1
d121.6Ais 49.10, Mo 7.16
e121.7Iba 91.10-12
f121.8Iba 113.2, 115.18

Psalms 121

Anduane Homogo ibu inanaga mamage hagane kago ogo

I̱na hari wedaruha de handadaga berogoni. a 
I̱ ani bia berogonigoyu
mbirali i̱ biamogo bule ibulubadago agohayagi howa ibulubadabe.
Anduane Homogo ibugua hari daligabi dindi timbuni o kamagobi wabinigo b 
ibunime dege i̱ biamogo biaga kagoni.
Ibugua í̠ pilope nahabelo handayaho holebira. c 
Ibu u napaliaga howa í̠ mamage kaore dege halu egabi laga biaga kagoni.

O larogo bayuwa hale habe.
Anduane Homogo ibu Isaraele wali agalinaga mamage haga kago howa
ibu u emene mbira napaliagaore ka.
Ibu umubi heba nalagaore kagoni.
Anduane Homogo ibugua í̠ kegoha kaware haparaho howa
í̠ mamage haabo haga kagoni.
Ibu ani kagola í̠ ibu gumbaha howa bayaleore dungulo holebere.
Horombe ni tandagabi daragome í̠ daba halu mo ko naholebira. d 
Mbiraga ege daragomebi í̠ mo ko naholebira dege.

Mbirale ko hiriribi tara tara ngarume í̠ mo ko mbira holilono e 
Anduane Homogo ibugua í̠ handayaho mamage holebira.
Í̠ í̠ni andagani palialu tagira pu haregoriani f 
ibugua mamage hama ibagabu holebira.
Í̠ andagani daibu paleregolabi
ibugua dege mamage holebira.
Áyubi awebi ibugua ani biaabo holebira.
Copyright information for `HUI