Psalms 124

Anduane Homogo ibugua ibunaga wali agali biamogo biaga kago ogo

Anduane Homogohanda ina biamogo nabinidale ina nde abiore kamaledabe.
Bi o larogoniore Isaraele wali agali tígua bi ogodagua ladai bidaba-o.

Inanaga waitigi hearume ina bo anda ibiyangi
Anduane Homogo ibugua ina mo wialu biamogo nabinidale
inanaga waitigi biarume tinaga keba holeneme ina bibahende mo ko howaore bo wahai kale.
Iba li ibalu mbirale ibame hilu dambiho yalu puabo hagadagua
inanaga waitigirume ina bamba bo mburi lalu erebaho wa heledale ndobe.
Iba li hongoheore ibiyagome ina bibahende mbelelo yalu pialu
yu ereba kagola homai kamale ndobe.
Homabehego nahome yopene harimago kamagoni, lalu ladai bilimu.

Inanaga waitigi bu hearume ina bibahende bo mburi laihe nale
Anduane Homogo ibunime ina bibahende hatali wu haabo hayagonaga
iname ibuhondo ka̱i̱ laaboore hami̱ya.
Agalime ega gono wedaria ega mbira gono dagoha da puda halu kundulo mialu
ibida porayadagua ina pirimagoni kamagoni.
Ina gono wearuha do ngamalego Anduane Homogo ibugua gono kundulupe helaga biyagome
ina yo pialu pene kamagoni.
Anduane Homogo ibugua hari daligabi dindi timbuni o kamagobi wabinigo
ibunime dege ina biamogo biaga kagoni.
Copyright information for `HUI