a135.8Har 12.29
b135.9Har 7-14—10.29
c135.11Dag 21.21-35, Yos 12.7-24
d135.15-18Iba 115.4-8, Mo 9.20

Psalms 135

Anduane Homogonaga mini yaraga halu iba gana lenego ogo

Anduane Homogonaga mini yaraga hami̱ya.
Anduane Homogonaga biabe biahaga kamiru
tígua ibunaga mini yaraga hadaba.
Tí Anduane Homogo inanaga Ngode Datagaliwabenaga anda pabe timbuni kago tamuha haga kamiru
tígua ibunaga mini yaraga hadaba.
Ibu bayaleore kagonaga iname ibunaga mini yaraga hami̱ya.
Ibugua inahondo dara howa bayale biaabo haga kagonaga
iname ibunaga mini yaraga halu iba ganaru lami̱ya.
Anduane Homogohanda Yagaba ibunaga helo dabenedagua
ibugua Isaraele wali agali ibuninagaore helo dabo helene ka.

Anduane Homogo ibu mini leneore howa
dama mitangi bialu bi pupu wulenaga gime wabini ngaruni
ibugua bolangua haiheore kago i̱ manda bidogoni.
Anduane Homogohanda mbirale ibunime bule hame ledadagua
hari daligahabi dindinibi biaga ka.
Iba solowarahabi iba andanehabi bibahendeoreni
ibugua bua biradagua biai haga ka.
Ibugua harini ginu dindi bibahendeha wiame helalu
hari daba bilaragola howa iba dalu ibilalu
puyabu tara tara ibuni andagaha wia do ho winiru mo heya halu
dindi bibahendeha pulame helo pelaga ka.

Iyibi dindini Iyibialinaga igini wahene bibahende bo wahai halu
tinaga nogo igini pigane wini hearubi bibahende bo wahai hene. a 
Iyibi dindiha dege ibugua kinibi ibunaga agali haguane hearubi bibahende pani nelo mialu
agalime nabiagane alebi nahendene ale dewaorebi bialu hene. b 
10 Anduane Homogohanda hameigini tara tara dindi dewaoreni hearu bo wahaga bialu
kini hongohe bu hearunibi bo wahai haga bini.
11 Ibugua Amoro wali agalinaga Kini Sihono bo wahalu c 
Basana wali agalinaga Kini Oga bo wahalu
Kenana dindiha kini dewa bu hearubi bo wahai halu bini.
12 Ibugua dindi uruni ibunaga wali agaliruhondo mini.
Isaraele wali agali hearu tihondo dindi uruni bibahende miai hene.

13 Anduane Homogo-o wali agali bibahendeme í̠ Ngode Datagaliwabeore kagonida lalu latagi haabo holebira.
Wali agali mani holebirarubi ti bibahendeme í̠ ogonibiore ke lalu manda bulebira.
14 Anduane Homogohanda ibunaga wali agali handayaho haabo holebira.
Ibugua dara holene nawi howa ibunaga biabe biahaga karu dara haabo holebira.

15 Hameigini dindi tara taraha bu hearume dama mitangi bialu d 
mbirale bi pupu wulenaga ngolo silibarume wabu helaga biaga.
Mbirale uruni tininaga gi degeme wabigi bini.
16 Mbirale uruni wabu helayaru tinaga ne hariga ngagoyu bi nalaga nga.
Tinaga de heledagoyu mbirale deme nahandaga nga.
17 Tinaga hale wabu heledagoyu bi hale nahagabi
tiha bu he̱bi nalagabi nga.
18 Mbirale uruni ale wabu helayarubi
uruni yu tiga biaga agali karubi
tini nde mbirale urunibi dege helo hamelo kogoni.

19 Isaraele wali agaliru-o Anduane Homogonaga mini yaraga hadaba.
Anduane Homogonagaloma binigo mo miaga kamiru tíguabi ibunaga mini yaraga hadaba.
20 Libai agali kamiru tíguabi Anduane Homogonaga mini yaraga hadaba.
Wali agali Anduane Homogo mitangi bialu lotu laga kamiru tí bibahendeme
ibunaga mini yaraga hadaba.
21 Anduane Homogo ibunaga dalu Saiono Yarusalemeha howa wali agali bu kamiru
tígua ibunaga mini yaraga hai hadaba.
Copyright information for `HUI