a138.6Ais 57.15, Ya 4.6, 1 Pi 5.5
b138.7Iba 23.3-4

Psalms 138

Anduane Homogohondo ka̱i̱ lenego ogo

Anduane Homogo-o i̱ninaga miniha hongo timbuniore howa
í̠hondo ka̱i̱ larogoni.
I̱na mbirale dama mitangi bialu gime wabini ngagoria howa
í̠naga mini yaraga halu iba gana lalu kogoni.
Í̠naga anda loma bia hene kago handade halu i̱na ge duli hanga ho biruwa
í̠naga mini yaraga halu kogoni.
Í̠naga gubalini holene wiaabo kegonagabi
í̠ mini bilinahe kegonagabi i̱na ani lalu kogoni.
Í̠naga minibi í̠na mana ogo bulene nga lenerubi duniniore nga lalu
inahondo mo walia harigonaga i̱na iba gana ogo lalu kogoni.
I̱na í̠ olarugola í̠na i̱naga bi hale howa
í̠ninaga hongo timbuniore kegome i̱ mo hongo haabo harigola kogoni.

Kini dindini bu karu bibahendeme í̠na bi lowiriru hale howa
tigua í̠naga mini yaraga holebira.
Tigua í̠na bibahende birirunaga iba ganabi
í̠ mini timbuni lene kegonaga iba ganabi lalu holebira.
Anduane Homogo-o í̠ daliga duniniore kegoni howa a 
wali agali mini mo dindiha haga karu mitangi bu haga ke.
Wali agali mine haga karu ti nde í̠naga deni ha do habe nahe ka.

I̱ha genda íbu mabu biragola b 
í̠nime i̱ handayaho halu pele ngiaga kegoni.
Waitigi bu karume i̱hondo keba haragola
í̠na i̱ pele ngialu í̠ninaga hongome i̱ bayuwa mo wiaga kegoni.

Anduane Homogo-o mbirale i̱hondo bulebero lalu lo wiriruni
biaiore holebere lo manda bido.
Í̠naga gubalini holene wiaabo haga kegoni.
Í̠na biabe bule biriruni bibahende bu maro bibelo hameledo.
Copyright information for `HUI