a139.1Iba 17.3, Yar 12.3
b139.22 Kin 19.27, Md 9.4, Yo 2.24-25
c139.3Iba 17.3, Yar 12.3
d139.4Hi 4.13
e139.7Yar 23.24, Yna 1.3
f139.12Yob 34.22, Dan 2.22, Hi 4.13
g139.15Yob 10.8-9, Aga 11.5
h139.23Yob 31.6, Iba 26.2
i139.24Iba 5.8, 143.10

Psalms 139

Ngode Datagaliwabe ibugua ina manda biai halu de hondo kago ogo

Anduane Homogo-o í̠na i̱ ba handalu ai ogobiore kalo manda biaiore kegoni. a 
I̱na mbirale bigi berogo bibahendeore í̠ manda biaiore ke. b 
Í̠ kaundiaore uyura howabi i̱naga miniha mitangi berogo damene bibahendeore manda biai kegoni.
I̱ biabe bialu koyaguabi o ha̱lo bedoyaguabi c 
í̠na i̱ handaya kegola dege bialu kogoni.
I̱na bigi berogo damene bibahendeore manda biai ho kegoni.
Bi mbira naledoore ogo ale lolebira lowa d 
í̠ abale manda bu bolangua kegoni.
Í̠na i̱ homabu bupe halu
í̠naga hongome i̱ pabe tigila haradagua bidegola kogoni.
Í̠na i̱ ogobiore kagoni lowa baya hanguore bilibele lo manda biai ho kegoni.
Manda bulene daligaore ogonibi i̱na mandabu mibe naheoreda.

Í̠ ke handala i̱ ibida pole pialu ha do hole ani pobehe kobe. e 
Í̠ nahego mbira dindi agohayagi ngabe.
Dahuliya anda iraga halu ibiruyagua í̠ ebere ke.
Humbirini andaga dalipe halu
ni bu karu baba bia tagoho hole yupe haruyaguabi
í̠ niguniha ha dege bulebere.
Yagalo yalu pialu ni tagira ibagahayagi ha do hole piruyaguabi
o ndo ni paliagahayagi pu haruyaguabi
10 dindi gibuni gibuni urunihabi í̠ ha dege bulebere.
Í̠na i̱ biamogo bulebi haru holebi ha dege bulebere.
11 Aruma holeneme i̱ budambi heladaba lalu
wá emeneore mbira nahe aruma dumbilinioreha ha do hole lalu manda biruyaguabi
í̠ ha dege bulebere.
12 Í̠na i̱ arumaha ndo koria hondolebere. f 
Mbiraga dumbilini mbauleyaguabi
í̠na i̱ horombe hau hanunini koria handaradagua hendede.
Handalu keria wá arumala tu nangaria hendede.
Mbiragabi horombeni handaradagua dege hendede.

13 I̱naga tingini gi gebi embone minibi tara tara hama pedaruni
í̠na wabu helene kogoni.
Í̠na i̱ ai̱ya tombeha i̱ mo gimbu bialu berelariyagoni.
14 Í̠na mbirale bigi berego taraore bigi biagayagonagabi
í̠ timbuni gibi baya buruguleore howa i̱ manda biai ho kegonagabi
i̱na í̠naga mini mo yaraga haro.
Ina wali agalime í̠ hondowa mo yo handabe nahe kamagoni.
15 I̱ ai̱ya tombeha biruwa i̱naga kuni dameneru wene hole mo gimbu gimbu bigi bialu heagola g 
i̱ tombeha bira do howa anda haga bialu hewago
í̠ manda bu harigo kegoni.
16 I̱ ai̱yahanda i̱ taba nahene tombeha berewago í̠ handarigoni.
Í̠na ani bialu nde i̱ dindini howa mali ogodagua holebira ogoangi homolebira lalu manda buwa
í̠naga mbugani gilibu wu kegoni.
I̱ ai̱yahanda i̱ taba naheneha abogo ibu lu ogodagua helo lalu
mali podo manda bu winigo í̠naga mbugani gilibu wiai kegoni.
17 Anigo Ngode Datagaliwabe-o í̠naga mitangi bulene daligaore tara
i̱ aleme manda bibe nahedagolabi daga labe nahedagolabi
i̱ mogolo kogoni.
18 Daga laruyagua iba angeni iba mu ngaru emene karulape lowa
í̠naga mitangi bulene daga nalabeheore la dege bialu
lo umulowa paliahondo howabi dengala howabi í̠ heba dege halu
i̱na í̠ manda biai habe naheore kogoni.

19 Ngode Datagaliwabe-o wali agali mini kowi bu karuore homelo bowaore ha nabira lalu kogoni.
Wali agali bame irane nawini bo wahama ibaga biaga karu
ti baba i̱ mandagi habe mangabago
tiore erebaha nabira lalu kogoni.
20 Ko biaga uruni tigua í̠ lalu bi ko laga bialu
í̠naga mini mo ko hole lalu lo guraga bialu ka.
21 Anduane Homogo-o í̠ handabe manga haga karu
i̱na uruniore handabe manga ho ko.
Í̠hondo waitigi ho karu
i̱na ti mo yo hondowa de handape ho kogoni.
22 I̱na ti handabe manga timbuniore ho ko.
Ti i̱ waitigi ka lo kogoni.

23 Ngode Datagaliwabe-o í̠na i̱naga bu habanehabi minihabi hai bialu h 
ko mbira ngabe hondole mitangihabi tayabume halu manda bibe.
24 Í̠na ani taya bialu mana ko mbira i̱ha au ngabe handalu i 
í̠naga haabo holene harigani puabo holiya i̱ haru habe.
Copyright information for `HUI