a143.2Lm 3.20, Ga 2.16
b143.5Iba 77.5, 77.10-11
c143.8Iba 5.8, 25.1, 46.5
d143.10Iba 31.14, 119.12, 139.24

Psalms 143

Anduane Homogohondo biamogo bia lalu bi lenego ogo

Anduane Homogo-o i̱na í̠hondo bi larogo hale habe.
Í̠ mini tigabiorebi mini bilinahebi kegome
i̱na biamogo bia lalu koru hale habe.
Í̠na godi larengi í̠naga biabe biahaga i̱ kogo godini heloleni nahelabe. a 
Í̠naga deni mbirali ibuha ko nawi mbira naheore ndobe.

Waitigi bu karume i̱ talima ibaga bialu i̱ bopeore henego ko.
Tigua i̱ arumaha minu dariba ho wiradagua bidagola
i̱ wali agali bamba homo gialo wahene ngaligobi kogoni ndobe.
I̱ ani bidagome i̱ mini tumutumu bialu
mini dege dindi ho kogoni.

Bambaore biniru i̱na lone mitangibu dai bero. b 
Mbirale bayale damene bibahende í̠na biriruni mitangi bialu
biabe bayale birirubi mitangibu dai berogoni.
I̱na i̱naga gi yaraga halu í̠hondo bi lalu kogoni.
Wali agalime iba noa howa kembobe lebola haradagua
i̱naga dininime í̠naga bi mana lo ngeru noa halu hame timbuniore lo kogoni.

Anduane Homogo-o i̱na mini dunubia ho harugo ereba harago
ainde i̱na bi larogo áyu ogoni abale hale habe.
I̱ abale homalu homene dininiru piagane ngagoha poligo
í̠ ha do nahabe.
I̱na í̠hondo mini mbiraore wu kogonigo c 
egerebagi bibahendengi í̠naga gubalini holene ngegoni i̱ mo mitangi biaabo helabe.
I̱na í̠hondoore bi lalu haga kogonigo
ai hariga i̱na pialu holiyago í̠nime mo walia habe.

Anduane Homogo-o í̠na i̱ handayaho habelo í̠ni keria eberogoni.
Waitigi bu karunaga giha koria i̱ mo wialu haru dai bibe.
10 I̱naga Ngode Datagaliwabe í̠niore kego d 
i̱na í̠naga hame ngego hangu taluwa bialu holiya i̱ lawai habe.
Í̠na i̱hondo bayale bialu
i̱ tigabi holene ngagoria ibagabu holiya haru habelo hamelo kogoni.

11 Anduane Homogo-o í̠nime bule lalu abale lo wiridagua
i̱ mo wialu bayuwa haru dai bibe.
Í̠ bayaleore biaga kegome i̱ha genda bibahende íbu ngagoria kogola
í̠nime i̱ pele ngibe.
12 I̱ í̠ninaga biabe biahaga kogo manda buwa
í̠na i̱hondo gubaliniore ho haga kegonigo i̱ waitigi bu karu homelo babe.
I̱ bope haga karu bibahendeorebi bo wahai habe.
Copyright information for `HUI