a144.3Yob 7.17-18, Iba 8.4
b144.15Iba 33.12

Psalms 144

Kini mbirame ibu wayali henegonaga Anduane Homogohondo ka̱i̱ lenego ogo

I̱na Anduane Homogonaga mini yaraga harogoni.
I̱ biamogo biaga hongo timbunihe ibu kagoni.
Ibugua i̱ wai buliya baya hangu biawai halu
i̱ mo manda mandabu helaga kagoni.
Ibugua i̱ handayaho haga howa ibunime i̱ ho hagira bu haga ka.
I̱naga humbi alebi pele ngiagabi ibu hanguore kagonigo
i̱na ibuha mini mbiraore wu kogome
ibugua i̱ mo wialu haru dai biaga kagoni.
Ibugua hameigini tara tara dindi bibahendeha karu i̱ andaneha hai helaga kagoni.

Anduane Homogo-o ina wali agali agi ale kamagola a 
í̠na mitangi ho haga kebe.
Ina bame nahabane mbira kamagonidago
ainde í̠na irane aginaga ina mo galone harilibe.
Ina wali agali bameore ne harigaha buhe̱ halu
mbira hangu tagira pialu ereba hagagobi kamagoni ndobe.
Inanaga dindini holene tubagiore
bame ni daragola munini emene howa abale ereba haraligobi kamagoni.

Anduane Homogo-o hari li kagoni kambulaki bialu abale dalia.
Í̠naga gime dindi hari wedaru ela hariyagua ira hagua timbuni tagira ibulebira.
Hari daba mo bia halu waitigi bu karuni bo purogo lela.
Ti gerai lalu ibida purogo lelo í̠naga timume bo pelabe.
Í̠na hari daligaha howa gi dogolape halu
i̱ iba andaneha bedogo wahalu tagira ibuliya gini yamia.
Agali dindi tarani howa ibini bu karunaga andaneha koria
í̠na i̱ abale mo wialu golope habe.
Agali uruni tiha henene lolene mbira nawiore howa
tigua gi doladaga halu henene larama lowa ke̱ dege hagane ka.

Ngode Datagaliwabe-o i̱na iba gana gahenge wabialu í̠hondo lolebero.
I̱na ngida ale balu í̠hondo iba gana lolebero.
10 Í̠na kinirume wai bialu wayali helo biamogo biaga howa
í̠naga biabe biahaga Debidi i̱nibi nde biamogo bialu haru dai biaga kegoni.

11 Waitigi i̱ bope haga bu karunaga giha koria haru dai bibe.
Agali dindi taraha howa ibini bu karunaga andaneha koria
í̠na i̱ abale mo wialu golope habe.
Agali uruni tiha henene lolene mbira nawiore howa
tigua gi doladaga halu henene larama lowa ke̱ dege hagane ka.

12 Ina igini igiri daliahe kaore
ira hongone karu hongohe anda hagagobi helo hamelo kamagoni.
Ina wane bedarubi baya dege halu kini andaga kagoha
mo yári bia hene ngagobi berelo hamelo kamagoni.
13 Inanaga tomo wiaga andaha tomo bayale dewaore wu to̱latagi helo hamelo kama.
Inanaga dindini nogo sibi karume igini daosini dewaore honoyu helo hamelo kama.
14 Nogo bulumaga bu karumebi igini dewa honoyu kagola
mo ko nahelobi maru homa nabilobi hamelo kamagoni.
Inanaga hariga polene ngagoria
wali agaliyaguabi waneiginiyaguabi mbiragome
ibuha genda tandagaru tagira ibiragola
dugu bima pelo hame naledema.

15 Dindi mbiraha wali agali bayale urunibi bu karu ti turu ho ka. b 
Wali agali Ngode Datagaliwabe ibuni tinaga Anduane Homogo ka lalu haga karu
tibi turuore ho kagoni.
Copyright information for `HUI