a147.3Iba 51.17, Ais 57.15, 61.1, Lg 4.18
b147.4Pig 15.5, Ais 40.26
c147.10Iba 33.16-18, Hos 1.7

Psalms 147

Anduane Homogo Hongo Haiheore kagonaga mini yaraga halu iba gana lenego ogo

Anduane Homogonaga mini yaraga hami̱ya.
Iname inanaga Ngode Datagaliwabe mini yaraga halu
ibuhondo iba ganaru lolene bayaleore ogoni.
Iname ibunaga mini yaraga holene bayale tigabiore nga.
Anduane Homogohanda Yarusaleme lone mo heya ho helowa
ibunaga wali agali dindi taraha garabaya pu haga bini hearu haru dai biragoni.
Wali agali tini bu miniha genda timbuni yu haga bidaru a 
ibugua mo karulape helaga ka.
Ibugua tinaga dere bidaru dabi helo kabu bia haga kagoni.

Ibugua yakundi hari daligani bu karuni bibahende daga lai howa b 
ti mbira mbiranaga mini lai haga ka.
Inanaga Anduane Homogo ibu mini leneore howa hongo haiheore ka.
Ibunaga mini gigabi ngago iname manda biai habe nahe kama.
Ibugua wali agali tini mo dindiha haga karu mo yaraga hagago
nde wali agali ko biaga karu ti dindiha hengedape haga ka.

Anduane Homogonaga mini yaraga halu ibuhondo iba ganaru lolene nga.
Inanaga Ngode Datagaliwabehondo ngida ale balu
bi bayale mo bila howa bayale bolene nga.
Ibugua hari daligaha beraliba helame haga.
Iba dalu dindini ibilaragola
hari bare bare ngaruha datani bayale anda helaga biaga ka.
Ibugua ema bialu piaga karubi bedarubi tomo nelo mialu
ega igini bedarume tomo noa halu bi laragola hale howa
ibugua ti tomo nelo mia dege biaga ka.

10 Anduane Homogohanda nogo hosinaga hongobi c 
ami agalinaga hongobi hondowa turu haga ndo ka.
11 Wali agali ibu mitangi bialu mo dunini howa
ibunaga gubalini holene wiaabo ka manda bialu
ibuhondo mini mbiraore wiaga karu ti hondowa ibugua turuho haga ka.

12 Yarusaleme wali agaliru-o Anduane Homogonaga mini yaraga hadaba.
Saiono wali agaliru-o tínaga Ngode Datagaliwabenaga mini yaraga holene nga.
13 Ibugua Yarusalemenaga pabe panga kago mo hongo howa
wali agali bu karu bayaleore biamogo bialu haga ka.
14 Ibugua tínaga dindi tubari handayaho halu
widi bayaleru tí mabuha anda haga biledagola
tígua widi lini dewaore nalu tombeho haga kamigoni.

15 Ibugua bi mbira dindihondo laragola
bi ogoni hale halu abaleore biai haga.
16 Ibugua dindiguni timbunirume dindini dungume helalu
puyabume abalu pulo yalu piagadagua pibiya pulo yu purogo lelaga ka.
17 Iba angeni iba mu wiame kadagua
ibugua dalu ibilaragola dindiguni wiame helaga biaga.
Ibugua dindini dagare ogonibi ibilaragola
mbiralime dagare bidago bilowa dagare nahe tingi halu donge ho habe naheore ka.
18 Mani howa ibugua bi laragola dindiguni ngaru mo iba bu hinilaga.
Ibugua puyabu ibilaragome iba bedago mo ema bia halu pelaga ka.

19 Ibugua ibunaga bi lowiniru Yagabahondo lamini.
Ibunaga bi mana Isaraele wali agaliruhondo mini.
20 Ogonidagua ibugua hameigini tara tara dindi bibahendeha karuhondo nalami.
Tigua ibunaga bi mana lo ngago manda nabi ka.

Iname Anduane Homogonaga mini yaraga hami̱ya.
Copyright information for `HUI