a149.5Yob 35.10

Psalms 149

Anduane Homogonaga mini yaraga halu iba gana lenego ogo

Anduane Homogonaga mini yaraga hama.
Ibuhondo iba gana gahengeru lami̱ya.
Wali agali ibuhondo mini bilinahe haga kamiru
tígua ibu mitangi bialu lotu lole ngoai ho kamigoria ibunaga mini yaraga hadaba.
Isaraele wali agaliru-o ibugua tínaga Wabiaga ka mitangi bialu turuho hadaba.
Saiono wali agaliru-o tínaga kini ibu kagonaga turu timbuni ho hadaba.
Tígua mali lialu ibunaga mini yaraga hadaba.
Tabageru balubi ngida ale balubi ibunaga mini yaraga hadaba.

Anduane Homogohanda ibunaga wali agaliruhondo gubalini ho kagoni.
Ibugua wali agali tini mo dindiha haga karunaga mini yaraga halu
wai bialu wayali helo biamogo biaga ka.
Ngode Datagaliwabenaga wali agali tí wayali harimigonaga turuho holene nga. a 
Mbiraga tíninaga dagiani biruwa tígua turu halu iba ganaru laabo holene nga.
Tigua Ngode Datagaliwabenaga mini yaraga halu bi dalimu lalu
wai biagane ayu tibu ne gadeleru tíni gime yu howa ga̱ ladagadaga bialu turu ho holene nga.
Tígua ayu tibu yu howa hameigini tara tara dindi bibahendeha karu baba wai bialu
wali agali Anduane Homogo manda nabi karu ti ko biyarunaga pani mialu
bo wahai holene nga.
Waitiginaga kinibi agali haguane bu karubi
pu seni aeaneme wabini ngagome tinaga gi geru minu dabaho helolene nga.
Ngode Datagaliwabehanda hameigini tara tara dindi bibahendeha bu karu
pani mulene nga layadagua tígua milimu.
Ngode Datagaliwabenaga wali agali kagome wayali ogonibi holebira.

Anduane Homogonaga mini yaraga hami̱ya.
Copyright information for `HUI