a28.1Iba 83.1, 88.4, 143.7
b28.2Iba 5.7, 138.2
c28.3Iba 26.9, 55.21, Yar 9.8
d28.42 Ti 4.14, Mo 18.6, 22.12
e28.5Yob 34.27, Ais 5.12
f28.7Iba 13.5, 18.2, 22.4
g28.91 Kin 8.51-53, Iba 78.1

Psalms 28

Anduane Homogohondo biamogo bia lalu bi lenego ogo

Anduane Homogo-o í̠ ege to̱le̱ ale hongohe kego a 
í̠na i̱ biamogo bibelo olalu kogoni.
I̱na í̠ olarogo haleore habe.
Í̠na i̱naga bi larogo hale halu i̱ biamogo nabiriyagua nde
i̱ agali homene dindiha pu karu ale holeberodalo manda bido.
I̱na i̱ biamogo bia lalu í̠ olalu kogola b 
í̠na i̱naga bi hale habe.
I̱na í̠ninaga anda loma bia heneha í̠ keria i̱naga gi yaraga halu
í̠hondo bi lalu kogola hale habe laro.
Í̠na mini kowi karu heba i̱ bope nahabe. c 
Uruni tigua mana ko biaga howa
bi bayale dege lalu
miniha handabe manga holene ngaru doho haga kago
i̱ ti heba mo ko hamaga nahabe.

Tigua ko uruni biyagonaga pani nelo mibe. d 
Ko biaganego pani nelo mo mibe.
Tinime mana ko bibahende biyarunaga
tini biyagobi pani nelo migi bibe.
Agali ko uruni tigua Anduane Homogohanda biabe timbuni bini ngaru mitangi nahagabi e 
bibahende wabini ngaru mitangi nahagabi ka.
Tigua ani bialu kagonaga pani mialu
ibugua ti bo wahaiore holebira.

Anduane Homogohanda i̱na dugu bialu biamogo bia lalu olalu harugola
ibugua hale hayagonaga i̱na ibunaga mini yaraga harogoni.
Anduane Homogo ibugua i̱ handaya howa f 
i̱naga humbi ale kagoni.
Ibu karulapeore kago mitangi bialu
i̱ ibuha hanaho kogoni.
Ibugua i̱ biamogo biaga kago
i̱na turu halu iba ganaru lalu
ibunaga mini yaraga halu kogoni.

Anduane Homogohanda ibunaga wali agaliru baya hangu handayaho haga.
Ibugua agali kini helo ibunime dabo helayagobi
biamogo bialu mamage ho haga ka.
Anduane Homogo-o í̠naga wali agali pele mialu g 
ti í̠ninagaore helo dabo helarigo
í̠nime bayuwa biamogo bibe.
Nogo sibi haru haga ale howa
í̠na wali agali uruni tinaga haru haganeore í̠ni howa
ti bayuwa handaya halu haru haabo habe.
Copyright information for `HUI