a29.1-2Iba 96.7-9
b29.22 Bit 20.21
c29.10Pig 6.17, Yob 38.8, 38.25, Iba 28.8

Psalms 29

Anduane Homogohanda dalu puyaburuha howa bi latagi hagago ogo

Dahuliyali kamiru-o a 
Anduane Homogo kagonaga mini mo yaraga hadaba.
Wá taraore holenebi hongo holenebi
ibuni hangu kago turu timbuni hadaba.
Anduane Homogo ibuni baya buruguleore kagonaga mini yaraga hadaba. b 
Ibu mitangi bialu ibunaga wanakuihayagi bulupalialu
ibunaga mini yaraga halu lotu ladaba.

Anduane Homogonaga bi larago
iba solowara bedarume hale hai haga.
Ngode Datagaliwabe ibuni mini leneore kagome
ibunaga bi hari kulu laradagua biayua.
Iba solowara berearuha daligani
ibunaga bi timbu hari kili kulu laradagua biayuagoni.
Anduane Homogonaga bi hongohe gibi taraore layuagoni.
Wali agali bibahende bu hearume ibunaga bi laragola
hale howa mogo lalu gi hai haga.

Anduane Homogo ibunaga bime
ira tamia hearu bo dangia lahole biagaya.
Ira tamia Lebanono dindi hene heaguabi aniore biagaya.
Anduane Homogohanda Lebanono dindiha hari timbuni wearu mo emabia haragola
nogo bulumaga iginime pogoladagadaga biagadagua bilaga ka.
Hari Hemono wedago nogo bulumaga wangabe daluame
pogoladagadaga biradagua ani bilaga ka.

Anduane Homogohanda bi laragola
hari daba migimege lalu wá timbuni hagimbu biagaya.
Ibunaga bi laragome dindi ko wali agali nahaga ngaru
mo birila gimbu biagaya.
Kedese dindi ko iba dalu naibaga ngaru
mo birila gimbu biagaya.
Anduane Homogohanda bi hongo howa laragola
nogo gabua karume hale halu mogolo puwa
igini abale wupe hagaya.
Ibugua bi hongo howa laragome
ira yuni karu gilopaya bilagaya.
Ibunaga anda kagoha wali agali bibahendeme lalu,
Ngode Datagaliwabe ibu mini leneore ka, lagaya.

10 Anduane Homogo ibugua iba solowara timbuni bedaru handameho haga. c 
Ibu Kini timbuniore howa hondo haabo haga kagoni.
11 Anduane Homogohanda ibunaga wali agali bu karu
mo hongo haabo haga kagoni.
Ibugua ti mo bayale heledagola
ti mo palia holene karulo haabo haga ka.
Copyright information for `HUI